ជាតិ
សេដ្ឋកិច្ច
អូស្ត្រាលី ព្រមព្រៀងផ្ដល់ថវិកា២៨លានដុល្លារដល់កម្ពុជា សម្រាប់ទិញវ៉ាក់សាំងCOVID-19 ជាផ្លូវការ
(ឆ្វេង)លោក ផាប្លូ កាង ឯកអគ្គរាជទូតអូស្ត្រាលីប្រចាំកម្ពុជា និងលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។
×![]()
ភ្នំពេញ៖ កម្ពុជាទទួលបានជំនួយឥតសំណងពីប្រទេសអូស្ត្រាលី ចំនួន៣៥,៧លានដុល្លារអូស្ត្រាលី (ប្រមាណ២៨លានដុល្លារអាមេរិក) សម្រាប់ទិញវ៉ាក់សាំងកូវីដ-១៩(COVID-19)។ ជំនួយឥតសំណងរបស់អូស្ត្រាលីនេះ អាចចូលរួមចំណែកក្នុងការចាក់វ៉ាក់សាំងបង្ការជំងឺកូវីដ-១៩ ដល់ពលរដ្ឋកម្ពុជា បាន ប្រមាណ១,៥លាននាក់។ នេះបើតាមយោងសេចក្តីប្រកាសព័ត៌មានរួមរបស់ក្រសួងសេដ្ឋកិច្ច និងហិរញ្ញវត្ថុ និងស្ថានទូតប្រទេសអូស្ត្រាលីប្រចាំកម្ពុជា នាថ្ងៃទី១កុម្ភៈ។ 
សេចក្តីប្រកាសព័ត៌មានដដែល បានបញ្ជាក់ថា ថវិកាដែលកម្ពុជាទទួលបានពីអូស្រា្តលីនេះ ក្រៅពីសម្រាប់ទិញវ៉ាក់សាំងកូវីដ-១៩ហើយនោះ ក៏មានមួយចំនួនសម្រាប់គាំទ្រដល់រដ្ឋាភិបាលកម្ពុជា ក្នុងការបែងចែក និងគ្រប់គ្រងវ៉ាក់សាំង, ធានាសុវត្ថិភាព និងប្រសិទ្ធភាពនៃវ៉ាក់សាំង និងដើម្បីធានាថា ពលរដ្ឋកម្ពុជាអាចទទួលបានកាន់តែឆាប់រហ័សនូវគោលដៅចាក់វ៉ាក់សាំងបង្ការជំងឺកូវីដ-១៩ ដល់ពលរដ្ឋកម្ពុជាឱ្យបាន៨០ភាគរយនៃពលរដ្ឋសរុប។
លោក ផាប្លូ កាង ឯកអគ្គរាជទូតអូស្ត្រាលីប្រចាំកម្ពុជា មានប្រសាសន៍ថា អូស្ត្រាលី រីករាយគាំទ្រកម្ពុជា ក្នុងគ្រាលំបាកនៃវិបត្តិកូវីដ-១៩នេះ។ លោកបានបញ្ជាក់ថា ថវិកាឥតសំណងរបស់រដ្ឋាភិបាលអូស្ត្រាលីចំនួន២៨លានដុលា្លរនេះ នឹងជួយដល់កម្មវីធីចាក់វ៉ាក់សាំងបង្ការជំងឺកូវីដ-១៩ ជូនប្រជាជនកម្ពុជា បានយ៉ាងហោចណាស់១លាន៥សែននាក់។
លោក ផាប្លូ កាង បន្តរៀបរាប់នៅក្នុងសេចក្តីប្រកាសព័ត៌មានខាងលើដូច្នេះ៖ «ការផ្តល់មូលនិធិសហប្រតិបត្តិការសម្រាប់អភិវឌ្ឍជាប្រចាំរបស់យើង នឹងផ្តោតលើការគាំទ្រដល់ការឆ្លើយតបផ្នែកសង្គម-សេដ្ឋកិច្ច របស់កម្ពុជាទៅនឹងជំងឺរាតត្បាត ហើយការផ្តល់ជំនួយជាវ៉ាក់សាំងកូវីដ-១៩ របស់អូស្ត្រាលីសម្រាប់កម្ពុជានេះ នឹងបំពេញបន្ថែមដល់កិច្ចខិតខំប្រឹងប្រែងស្តារសេដ្ឋកិច្ចតំបន់ឡើងវិញ»។
សម្រាប់ការផ្តល់ជំនួយជាវ៉ាក់សាំងបង្ការជំងឺកូវីដ-១៩ របស់អូស្ត្រាលីសម្រាប់កម្ពុជានេះ គឺជាជំនួយដែលបន្ថែមលើជំនួយអភិវឌ្ឍចំនួន៥០លានដុល្លារ ដែលរដ្ឋាភិបាលប្រទេសអូស្ត្រាលី នឹងផ្តល់ឱ្យកម្ពុជា ក្នុងឆ្នាំ២០២១ ដែលស្ថិតនៅក្រោមផែកការអភិវឌ្ឍសម្រាប់ឆ្លើយតបនឹងជំងឺកូវីដ-១៩កម្ពុជា-អូស្ត្រាលី។ នេះជាការលើកឡើងរបស់ លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។
រដ្ឋមន្ត្រីសេដ្ឋកិច្ចរូបនេះ បានបញ្ជាក់ថា ការផ្តល់ជំនួយជាវ៉ាក់សាំងបង្ការជំងឺកូវីដ-១៩ របស់ប្រទេសអូស្ត្រាលីមកកម្ពុជានេះ គឺជាការបង្ហាញជាថ្មី អំពីការប្តេជ្ញាចិត្តដ៏យូរអង្វែង និងការគាំទ្រប្រកបដោយនិរន្តរភាពរបស់រដ្ឋាភិបាលប្រទេសអូស្ត្រាលី ដល់ការអភិវឌ្ឍសង្គម-សេដ្ឋកិច្ច និងអនាគតរបស់កម្ពុជា។
បើតាមលោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ក្នុងវេទិកាសាធារណៈស្តីពី ការផ្សព្វផ្សាយច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២១ នាថ្ងៃទី២៧ មករា កម្ពុជាទទួលបានជំនួយវ៉ាក់សាំងពីបរទេសចំនួន១១លានដូស សម្រាប់យកមកប្រើប្រាស់ចាក់ការពារប្រជាពលរដ្ឋ ដោយក្នុងនោះ មាន៣លានដូសពីប្រទេសអូស្ត្រាលីតាមរយៈជំនួយឥតសំណងថវិកាខាងលើ៕
Tag:
វ៉ាក់សាំង
COVID-19
© រក្សាសិទ្ធិដោយ thmeythmey.com
