សង្គមអន្តរជាតិ
អន្តរជាតិ
បុរសចិនម្នាក់បញ្ចាំស្បែកជើងកីឡា២៨៣ គូដើម្បីយកលុយទៅកក់ថ្លៃទិញផ្ទះ
×
បុរសម្នាក់ដែលរស់នៅក្នុងទីក្រុងប៉េកាំង បានសម្រេចចិត្តយកស្បែកជើងកីឡាជាទីស្រលាញ់របស់ខ្លួនចំនួន ២៨៣ គូទៅបញ្ចាំ ដើម្បីយកប្រាក់ទៅបង់ថ្លៃកក់ផ្ទះល្វែងមួយ ដែលលោកចង់ទិញដើម្បីស្នាក់នៅក្រោយពេលលោករៀបការរួច។ នេះបើយោងតាមទូរទស្សន៍ CCTV ។
ប្រភពដដែលក៏បានផ្សាយថា បុរសដែលមានឈ្មោះហៅក្រៅថា Mick បានយកស្បែកជើងម៉ាក Jordan sneakers ដែលជាស្បែកជើងសម្រាប់លេងកីឡាបាល់បោះ សរុបចំនួន ២៨៣ គូទៅបញ្ចាំនៅហាងបញ្ចាំមួយក្នុងក្រុងប៉េកាំង ដើម្បីយកប្រាក់១៦០ ១២៥ ដុល្លារ ទៅបង់ប្រាក់កក់សម្រាប់ការទិញផ្ទះល្វែងថ្មីរបស់ខ្លួន។ ជាជំហានដំបូង ហាងបញ្ចាំនោះ បានវាយតម្លៃថាស្បែកជើងទាំងនោះ មានតម្លៃរហូតដល់ ២៨៨ ៣៥៥ ដុល្លារ។
បុរសវ័យ ៣០ ឆ្នាំ ដែលជាអ្នកគាំទ្រកីឡាករបាល់បោះដ៏ល្បីរបស់អាមេរិក លោក Michael Jordan នេះ បានចាប់ផ្ដើមប្រមូលទិញស្បែកជើង Jordan sneakers តាំងពីរូបគេមានអាយុ ១៤ ឆ្នាំមកម្លេះ។ ក្នុងពេលបច្ចុប្បន្ននេះ ស្បែកជើងកីឡា Jordan sneakers ថ្មីមួយគូ គឺមានតម្លៃប្រហែល ៣២០ ដុល្លារ។
លោក Mick បានប្រាប់សារព័ត៌មានក្នុងស្រុកថា លោកនឹងត្រឡប់មកលស់យកស្បែកជើងរបស់លោកទៅវិញ ក្នុងពេលឆាប់ៗនេះ នៅពេលដែលគាត់អាចរកប្រាក់បានគ្រប់គ្រាន់ ព្រោះថាស្បែកជើងទាំងនោះ ភាគច្រើនជាស្បែកជើងកម្រដែលផលិតមានចំនួនកំណត់៕
© រក្សាសិទ្ធិដោយ thmeythmey.com