ជាតិ
កុមារពិការភ្នែក យឿន ពិសី ក្លាយជាម្ចាស់ពាន Cambodia’s Got Talent
× យឿន ពិសី អាយុ១៥ឆ្នាំ បានក្លាយជាម្ចាស់ពានរង្វាន់ Cambodia’s Got Talent រដូវកាលទីមួយប្រចាំទូរទស្សន៍ហង្សមាស បន្ទាប់ពីរូបគេទទួលការផ្ញើរសារគាំទ្រលើសបេក្ខជន និងក្រុមសម្តែងចំនួន១៣ផ្សេងទៀត នាការបញ្ចេញសមត្ថភាពនៅវគ្គផ្តាច់ព្រ័ត្រកាលពីរាត្រីថ្ងៃទី២៧ ខែកុម្ភៈ ឆ្នាំ២០១៥ ។
ពិសី ជាសិស្សរៀននៅសាលាអង្គការកុមារពិការភ្នែក និងគរថ្លង់គ្រួសារថ្មី ខេត្តកំពង់ចាម។ កើតក្នុងគ្រួសារដែលមានកូន៧នាក់ ពិសីមានភ្នែកពិការតាំងពីកំណើតដូចជាបងប្រុសរបស់ខ្លួនផងដែរ។ កុមារកំសត់រូបនេះ បានចូលរួមប្រឡងក្នុងកម្មវិធី Cambodia’s Got Talent ដោយបានបកស្រាយបទ «ព្រះវិហារសាក្សីស្នេហ៍» នៅវគ្គដំបូង។ សំឡេងរបស់គេទទួលបាននូវការចាប់អារម្មណ៍យ៉ាងខ្លាំង ហើយចៅក្រម៣រូប គឺលោក ព្រាប សុវត្ថិ អ្នកនាង ខាត់ សុឃីម និងតារាកំប្លែង នាយ កុយ សុទ្ធតែបានគាំទ្រឲ្យគេឈានទៅកាន់វគ្គបន្ត។
នៅវគ្គពាក់កណ្តាលផ្តាច់ព្រ័ត្រ យឿន ពិសី បានបកស្រាយបទ «កំពូលភ្នំស្រួច» ហើយទទួលបាននូវការផ្ញើរសារគាំទ្រលើសគេក្នុងចំណោមបេក្ខជនដែលចូលរួមប្រជែងក្នុងសប្តាហ៍របស់ខ្លួន។ នៅវគ្គផ្តាច់ព្រ័ត្រ គេបានបកស្រាយបទចម្រៀងដែលរៀបរាប់ពីរឿងរ៉ាវពិតរបស់ខ្លួន។
ចំណាត់ថ្នាក់លេខមួយ នាំឲ្យ យឿន ពិសី ទទួលបានប្រាក់រង្វាន់ចំនួន១០០លានរៀល។ បេក្ខនារី ហ៊ុន ប៉ែន ដែលសម្តែងរបាំសហសម័យ និងក្រុមលោក វង្ស វណ្ណៈ និងកញ្ញា ផុង ចាន់ពិសី ដែលសម្តែងសៀកសហសម័យ ស្ថិតក្នុងចំណោមអ្នកដែលទទួលបានការផ្ញើរសារគាំទ្រច្រើនជាងគេ (Top3) ផងដែរ។
ទោះបីជាយ៉ាងណាក៏ដោយមតិមួយចំនួនបានរិះគន់ថា ជ័យលាភីដែល ពិសី ទទួលបានគឺកើតឡើងដោយសារតែការអាណិតពីសំណាក់ទស្សនិកជន ពីព្រោះអ្នកមានបេក្ខជនជាច្រើនដែលមានសមត្ថភាពលើសបេក្ខជនរូបនេះ៕
© រក្សាសិទ្ធិដោយ thmeythmey.com