អន្តរជាតិ
នយោបាយអន្តរជាតិ
រឿងអាស្រូវគ្រួសារអតីតមហេសីថៃSrirasmi លេចឡើងជាថ្មី
× កាលពីថ្ងៃសុក្រ ប៉ូលិសថៃបានដាក់ពន្ធនាគារឳពុកម្តាយរបស់លោកស្រី Srirasmiជាអតីតមហេសីព្រះអង្គម្ចាស់ស្នងរាជ្យថៃVajiralongkorn។ ពួកគាត់ទាំង២នាក់ជាប់ចោទថា ធ្លាប់បានប្រើឋានៈរាជវង្សរបស់Srirasmiដើម្បីអោយអាជ្ញាធរឃុំខ្លួនយុវនារីម្នាក់។
រឿងអាស្រូវគ្រួសាររបស់Srirasmiជាអតីតមហេសីព្រះអង្គម្ចាស់ស្នងរាជ្យថៃ Vajiralongkorn នៅមិនទាន់ផុតរលត់ស្រួលនៅឡើយទេ។ ឪពុកម្តាយរបស់លោកស្រីSrirasmiត្រូវបានប៉ូលិសឃុំខ្លួន កាលពីថ្ងៃសុក្រ ដោយសារតែ កាលពីពេលលោកស្រីនៅជាមហេសីរបស់ព្រះអង្គ Vajiralongkorn នៅឡើយ ឳពុកម្តាយលោកស្រីបានកុហកអាជ្ញាធរថា យុវនារីម្នាក់បានប្រមាថមហេសី Srirasmi។ ដូច្នេះ យុវនារីរូបនោះជាប់ចោទពីបទប្រមាថព្រះចេស្តា ធ្វើអោយអាជ្ញាធរចាប់ខ្លួននាងដាក់ពន្ធនាគារ។ កាលពីថ្ងៃសុក្រ ប៉ូលិសបានសួរចម្លើយ ឳពុកម្តាយរបស់លោកស្រី Srirasmiរាប់ម៉ោង ធ្វើអោយពួកគាត់ពិបាកទ្រាំ ក៏សម្រេចសារភាពទោសកំហុសទៅ។
គួររំលឹកថា កាលពីចុងឆ្នាំ២០១៤ ព្រះមហាក្សត្រស្នងរាជ្យ Vajiralongkorn បានបញ្ជាអោយដកហូតតំណែងគ្រប់សមាជិកក្រុមគ្រួសាររបស់មហេសីSrirasmiពីឋានៈរាជវង្ស ដោយសារតែសមាជិកគ្រួសារSrirasmiជាប់ពាក់ព័ន្ធនឹងអំពើពុករលួយដែលមិនធ្លាប់មាននៅប្រទេសថៃ។ ប៉ូលិសបានដកហូតទ្រព្យសម្បត្តិមានតម្លៃរហូតដល់២៥០ ០០០ ០០០ អឺរ៉ូ ពីគ្រួសារលោកស្រីSrirasmi។ ឳពុកមា និងបងប្អូនប្រុសស្រីរបស់លោកស្រីSrirasmiត្រូវប៉ូលិសចាប់ដាក់ពន្ធនាគារ។ រឿងអាស្រូវនេះបានធ្វើអោយព្រះអង្គVajiralongkornលែងលះជាមួយលោកស្រី។
យោងតាមអ្នកសង្កេតការណ៍នានា សកម្មភាពប្រឆាំងគ្រួសារអតីតមហេសីរបស់ព្រះអង្គម្ចាស់ស្នងរាជ្យ Vajiralongkorn បង្ហាញថា ព្រះអង្គម្ចាស់និងរបបសឹកបានព្រមព្រៀងគ្នាថា នឹងសំអាតរាល់អំពើពុករលួយនៅជុំវិញខ្លួនព្រះអង្គ មុននឹងអនុញ្ញាតអោយព្រះអង្គ Vajiralongkorn ឡើងគ្រងរាជបល្ល័ង្ក៕
© រក្សាសិទ្ធិដោយ thmeythmey.com