×![]()
ភ្នំពេញ ៖ តារាបង្ហាញម៉ូដ នាង គឹម រ៉ូហ្សា ក្នុងវ័យ២៥ឆ្នាំ មានរូបសម្ផស្សស្រស់សោភា និងទេពកោសល្យបង្ហាញម៉ូដយ៉ាងល្អនាងធ្លាប់ជាតួឯកក្នុងរឿង«ចន្ទចាកវេហាស៍»របស់ផលិតកម្មវិស្ណុភាពយន្ត។ រ៉ូហ្សា បានចូលខ្លួនមកបង្ហាញពីប្រវត្តិពិតរបស់នាង មុនឈានជើងចូលសិល្បៈឲ្យដឹងតាមរយៈថ្មី។
កញ្ញាគឹម រ៉ូហ្សា ឱ្យដឹងថា នាងមានស្រុកកំណើតនៅស្រុកមោងឫស្សី ខេត្តបាត់ដំបង ។នាងមានបងប្អូនស្រី២នាក់ ក្នុងនោះរូបនាងជាកូនពៅ ។ ដោយសារស្រឡាញ់សិល្បៈបង្ហាញម៉ូដនៅឆ្នាំ២០០៥ នាងបានមកភ្នំពេញចូលហាត់រៀនជាមួយលោកខេវិន នៅស្ថានីយទូរទស្សន៍CTN ។ មិនយូរប៉ុន្មាននាងក្លាយជាតារាបង្ហាញម៉ូដ ហើយតែងតែចេញបង្ហាញម៉ូដឱ្យក្រុមហ៊ុននានាក្នុងរាជធានីភ្នំពេញ ព្រមទាំងធ្លាប់ចេញទៅសម្តែងនៅប្រទេសបារាំងម្តង។
កញ្ញាគឹម រ៉ូហ្សា រំលឹកថា កាលពីឆ្នាំ១៩៩៩ នាងធ្លាប់ប្រឡងច្រៀងជាប់ចំណាត់ថ្នាក់លេខ១ ប្រចាំខេត្តបាត់ដំបង ដោយច្រៀងបទ«ស្នេហ៍ក្រោមម្លប់ជ្រៃ» ។ នាងសំរេចចិត្តបណ្តែតជីវិតចូលប្រឡូកក្នុងវិស័យសិល្បៈចាប់ពីឆ្នាំ២០០៥ មកគឺធ្វើជាតារាបង្ហាញម៉ូដ។ ក្នុងអាជីពជាអ្នកបង្ហាញម៉ូដរយៈពេល៥ឆ្នាំនេះនាងមានការងារច្រើន ពិសេសនៅឆ្នាំ២០១១នេះនាងមានឱកាសបានចូលរួមសម្តែងឱ្យផលិតកម្មវិស្ណុភាពយន្តដោយអ្នកដឹកនាំរឿងតម្រូវឱ្យនាងសម្តែងជាតួឯក។ រឿងនេះនឹងចេញថតនៅថ្ងៃទី៧ ខែកម្ភៈ ឆ្នាំ២០១១ ។ រឿង«ចន្ទចាកវេហាស៍»និពន្ធនិងដឹកនាំរឿងដោយលោកជ័យ រិទ្ធា ។កញ្ញាគឹម រ៉ូហ្សា និយាយថា សាច់រឿងចន្ទចាកវេហាស៍ឆ្លុះបញ្ចាំងពីជីវិតក្មេងស្រីលក់កាសែត ខាត់ស្បែកជើង លក់ផ្កា លក់ប៉េងប៉ោង ដើម្បីរកប្រាក់មកផ្គត់ផ្គង់គ្រួសារ និងបន្តការសិក្សានៅមហាវិទ្យាល័យរហូតក្លាយខ្លួនជានិស្សិតពូកែ។ កញ្ញារ៉ូហ្សា និយាយថា នេះជាលើកទី១ហើយដែលនាងបានសម្តែងជាតួឯកភាពយន្តដូច្នេះនាងនឹងខិតខំប្រឹងសម្តែងឱ្យអស់ពីសមត្ថភាព៕
© រក្សាសិទ្ធិដោយ thmeythmey.com
