ជាតិ
×![]()
ដោយ: ខន ចំប៉ា
មជ្ឈមណ្ឌលសោតទស្សន៍បុប្ផាណាសហការជាមួយសាលាតន្ត្រីមរតកហ្វ៊ូណននឹងរៀបចំព្រឹត្តិការណ៍មួយដែលមានឈ្មោះថា«រាត្រីលង្វែក» នៅល្ងាចថ្ងៃទី៣មិនានេះចាប់ពីម៉ោង៤រសៀលដល់ម៉ោង៨យប់។
នេះជាលើកទី១ហើយដែលកម្មវិធីរាត្រីលង្វែក ត្រូវបានរៀបចំឡើងហើយតម្រូវឲ្យអ្នកចូលរួមទាំងខ្មែរ និងបរទេសស្លៀកសំលៀកបំពាក់នាសម័យលង្វែក។នេះបើតាមការបញ្ជាក់របស់លោកស៊ុប សក្ខរ៉ា នាយក សាលាតន្ត្រីមរតកហ្វ៊ូណន។
លោកស៊ុប សក្ខរ៉ាបានថ្លែងប្រាប់សារព័ត៌មានថ្មីៗនៅថ្ងៃនេះថាកម្មវិធីរៀបចំឡើងក្នុងគោលបំណង អបអរទិវាវប្បធម៌ជាតិ៣មិនាលើកទី១៧លើកកម្ពស់តន្ត្រីសម័យបុរាណដល់សាធារណជនជាពិសេសយុវជននិងជំរុញឲ្យស្ថាប័នផ្សេងៗរៀបចំកម្មវិធីទាក់ទងនឹងវប្បធម៌ឲ្យបានច្រើនដើម្បីទប់ស្កាត់លំហូរនៃវប្បធម៌បរទេស។កម្មវិធីរាត្រីលង្វែក នៅល្ងាចនេះនឹងមានរៀបចំកម្មវិធីដូចជា ការប្រគំនាដឯកខ្លុយភ្លេងពិណពាទ្យភ្លេងមហោរីការសម្តែងរបាំអប្សរា ការរាំកម្សាន្តចង្វាក់ប្រជាប្រិយម្ហូបនិងបង្អែមខ្មែរក៏បានរៀបចំសម្រាប់ភ្ញៀវដែលបានចូលរួមនិងកម្មវិធីកម្សាន្តជាច្រើនទៀត។
បើតាមលោកស៊ុបសក្ខរ៉ាមានមនុស្សចំនួន១៤០នាក់ហើយបានចុះឈ្មោះចូលរួមក្នុងកម្មវិធីរាត្រីលង្វែកនៅមជ្ឈមណ្ឌលសោតទស្សន៍បុប្ផាណានៅល្ងាចនេះ។ចំនួននេះគឺលើសពីការរំពឹងទុកខណៈដែលលោក សង្ឃឹមថាមនុស្សយ៉ាងច្រើន៨០នាក់ចូលរួមនោះ៕
© រក្សាសិទ្ធិដោយ thmeythmey.com
