ជាតិ
សេដ្ឋកិច្ច
កម្ពុជាបាត់បង់ថវិកាជាង៤០០លានដុល្លាររៀងរាល់ឆ្នាំ ដោយសារកង្វះខាតអាហារូបត្ថម្ភ
× ការសិក្សាបានបង្ហាញថា កម្ពុជាបានបាត់បង់ថវិកាជាង៤០០លានដុល្លាររៀងរាល់ឆ្នាំ ដោយសារតែបញ្ហាកង្វះខាតអាហារូបត្ថម្ភលើកុមារ និងស្ត្រីមានផ្ទៃពោះ។ ហើយថាស្ថានភាពនេះបានធ្វើឲ្យកម្ពុជាស្ថិតនៅក្នុងចំណោមប្រទេសទាំង២៨ក្នុងពិភពលោក ដែលមានបញ្ហាអាហារូបត្ថម្ភអាក្រក់បំផុត។
ការសិក្សាមួយដែលត្រូវបានចុះផ្សាយនៅក្នុងកាសែត អាស៊ីប៉ាស៊ីហ្វិកនៃអាហារូបត្ថម្ភគ្លីនិក បានបង្ហាញថា កង្វះខាតអាហារូបត្ថម្ភកំពុងតែក្លាយជាបន្ទុកធ្ងន់ដែលធ្វើឲ្យប៉ះពាល់សេដ្ឋកិច្ចរបស់ប្រទេសកំពុងអភិវឌ្ឍមួយនេះ។ ការសិក្សាបានរកឃើញថា កម្ពុជាកំពុងបាត់បង់ថវិកាជាង៤០០លានដុល្លាររៀងរាល់ឆ្នាំ ដោយសារកង្វះខាតអាហារូបត្ថម្ភលើស្ត្រីមានផ្ទៃពោះ និងកុមារ។ ទឹកប្រាក់នេះខាតបង់នេះមានទំហំស្មើនឹង២,៥ភាគរយនៃផលិតផលក្នុងស្រុកសរុប។
លទ្ធផលនៃការសិក្សាដែលត្រូវបានគេផ្សព្វផ្សាយកាលពីថ្ងៃទី៣មីនា នៅក្នុងសិក្ខាសាលាមួយនៅសណ្ឋាគារ Intercontiental សរសរថា «ប្រសិនបើបញ្ហាអាហារូបត្ថម្ភនៅតែបន្តធ្វើឲ្យសកម្មភាពសេដ្ឋកិច្ចធ្លាក់ចុះដល់២,៥ ភាគរយនៃផលិតផលក្នុងស្រុកសរុបនោះ នោះទិសដៅជាតិរបស់កម្ពុជាដែលចង់បានកំណើនសេដ្ឋកិច្ច៧ភាគរយ ជារៀងរាល់ឆ្នាំនោះ នឹងពិបាកសម្រេចណាស់»។
ការសិក្សាក៏បានបង្ហាញផងដែរ ទំហំនៃការបាត់បង់ទៅតាមទីកន្លែងនីមួយៗ ដោយសារកង្វះខាតអាហារូបត្ថម្ភនេះ។ ទីមួយ កង្វះខាតអាហារូបត្ថម្ភបានធ្វើឲ្យមានមរភាពនៃកុមារអាយុក្រោម៥ឆ្នាំប្រមាណ៦០ភាគរយ។ ការបាត់បង់នេះមានតម្លៃប្រហែល ៨៨,៧ ដុល្លារអាមេរិក។ ទី២ ភាពក្រេះក្រិនដែលប៉ះពាល់ដល់ផលិតភាពរបស់កុមារនោះ បានធ្វើឲ្យបាត់បង់សេដ្ឋកិច្ច១២៨,៣ លានដុល្លារក្នុងមួយឆ្នាំ។ទី៣ ភាពស្លេកស្លាំងក្នុងចំណោមកម្មករពេញវ័យ ដែលប៉ះពាល់ដល់ផលិតភាពរបស់ពួកគេនោះ ក៏តំណាងឲ្យការបាត់បង់៨៩លានដុល្លារក្នុងមួយឆ្នាំដែរ។ និងចុងក្រោយនោះ គឺការបាត់បង់សេដ្ឋកិច្ចទៅការចំណាយលើសលប់លើការថែទាំសុខភាពដែលមានទំហំប្រហែល១០លានដុល្លារ។
ដើម្បីដោះស្រាយបញ្ហានេះ ធនាគារពិភពលោក ដែលបានវិភាគលើប្រទេសចំនួន៧៩ បានរកឃើញថា ការកើនឡើងនៃប្រាក់ចំណូលអាចដើរតួនាទីយ៉ាងសំខាន់ក្នុងការកាត់បន្ថយ បញ្ហាកង្វះខាតអាហាររូបត្ថម្ភ ក៏ប៉ុន្តែថា វានៅតែមិនទាន់គ្រប់គ្រាន់នៅឡើយ។ ធនាគារពិភពលោកបានជំរុញ អោយមានការបង្កើនចំនួនអន្តរាគមន៍លើវិស័យអាហារូបត្ថម្ភដោយផ្ទាល់ និងប្រកបដោយប្រសិទ្ធិភាព ប្រសិនបើគេចង់កាត់បន្ថយ ឬដោះស្រាយបញ្ហាកង្វះខាតអាហារូបត្ថម្ភ៕
© រក្សាសិទ្ធិដោយ thmeythmey.com