ជាតិ
ចង្វាក់«រាំក្បាលពោះ»នឹងបើកបង្រៀនជាផ្លូវការនៅកម្ពុជា ភ្នំពេញ៖ Belly Dance ឬបកប្រែតាមភាសាខ្មែរថា ចង្វាក់រាំក្បាលពោះដែលមានដើមកំណើតនៅក្នុងប្រទេសអារ៉ាប់ បានមកដល់ប្រទេសកម្ពុជាហើយ។ ចាប់ពីថ្ងៃទី១៥ខែមិនាឆ្នាំ២០១៥ខាងមុខនេះ ចង្វាក់រាំក្បាលពោះនឹងត្រូវគេបើកបង្រៀននៅក្នុងមជ្ឈមណ្ឌលកីឡា លីឡា នៅរាជធានីភ្នំពេញ។ សាលាចង្វាក់រាំក្បាលពោះនេះមានវត្តមានរួចហើយនៅក្នុងប្រទេសថៃ វៀតណាម ជប៉ុន និងកូរ៉េខាងត្បូង។
កញ្ញា Linda Asha Abdalla ដើមកំណើតឆែក រស់នៅក្នុងប្រទេសអេហ្ស៊ីប ដែលបានចូលមករស់នៅក្នុង ប្រទេសកម្ពុជាអស់រយៈពេលប្រមាណជា៣ឆ្នាំមកហើយនោះ ត្រៀមបើកសាលាតន្ត្រីនៅថ្ងៃទី១៥ខែមិនាខាងមុខនេះ នៅក្នុងមជ្ឈមណ្ឌលកីឡា លីឡា នៅក្រុងភ្នំពេញ។ នៅក្នុងសាលាតន្ត្រីនេះ ចង្វាក់«រាំក្បាលពោះ»ដែលជាក្បាច់រាំបែបបុរាណរបស់ជនជាតិអារ៉ាប់តាំងពីច្រើនពាន់ឆ្នាំមកហើយនោះ ក៏ត្រូវបានគេបើកបង្រៀនដែរ។
កញ្ញា Linda Asha Abdalla ដែលជាសាស្ត្រាចារ្យចង្វាក់«រាំក្បាលពោះ»បាននិយាយថា ក្បាច់រាំនេះ មានវត្តមាននៅក្នុងប្រទេសថៃ វៀតណាម ជប៉ុន និងកូរ៉េ រួចហើយ ហើយនៅពេលខាងមុខនេះ សាលាតន្ត្រីដែលមានបញ្ចូលក្បាច់រាំប្រពៃណីអារ៉ាប់នេះ នឹងបើកជាផ្លូវការនៅទីក្រុងភ្នំពេញ។ កញ្ញា បាននិយាយថា៖«ក្បាច់រាំនេះ កំពុងពេញនិយមនៅក្នុងប្រទេសប្រទេសថៃ និងវៀតណាម»។ អ្នកជំនាញរូបនេះ បានអួតសរសើរក្បាច់រាំ Belly Dance ថា វាគឺជាក្បាច់រាំដែលធ្វើអោយស្ត្រីមានរាងកាន់តែស្អាត តូចច្រឡឹងជាងមុន និងមានភាពរហ័សរហួនខ្លាំងឡើង។ Belly Dance គឺជាក្បាច់រាំក្បាលពោះ។
បើយោងតាមកញ្ញា Linda Asha Abdalla ក្បាច់រាំនេះ មិនមែនជួយសម្រួលតែសុខភាពប៉ុណ្ណោះទេ តែវាអាចជួយអោយស្ត្រីសម្រាលកូនបានស្រួលទៀតផង ពីព្រោះ ក្បាច់រាំនេះ ជំរុញចលនាសាច់ដុំក្បាលពោះខ្លាំងណាស់។ ការបង្រៀនក្បាច់រាំនេះ អនុញ្ញាតអោយតែនារីប៉ុណ្ណោះចូលរួមសិក្សា។ មូលហេតុ គឺដោយសារ ចង្វាក់នេះតម្រូវអោយនារីស្លៀកសម្លៀកបំពាក់ខ្លីផ្នែកលើ។
លោក Lewis Pragasam ជនជាតិម៉ាឡេស៊ី ដែលជានាយកសាលាតន្ត្រី Startworks Academy នៅក្នុងមជ្ឈមណ្ឌលកីឡា លីឡា បាននិយាយប្រាប់សារព័ត៌មានថ្មីៗថា លោកត្រូវតែបង្កើតសាលាតន្ត្រីមួយសម្រាប់ប្រជាពលរដ្ឋខ្មែរ។ «ប្រជាជនខ្មែរមានទេព្យកោសល្យសិល្បៈល្អណាស់ តែខ្វះការបណ្តុះបណ្តាលក្ខណៈអាជីព»។ នេះ គឺជាការកត់សម្គាល់របស់លោក Lewis Pragasam សាស្ត្រាចារ្យតន្ត្រីនៅក្នុងប្រទេសម៉ាឡេស៊ី។ លោកបានបន្តទៀតថា៖«ខ្ញុំចង់បណ្តុះបណ្តាលកូនខ្មែរអោយក្លាយទៅជាសិល្បៈករ សិល្បៈការិនីអាជីព។ ខ្ញុំចង់អោយពួកគេចេះតែងចម្រៀងដោយខ្លួនឯងដោយមិនលួចចម្លងពីគេដូចសព្វថ្ងៃនេះ»។
សាលាតន្ត្រី Startworks Academy នៅក្នុងមជ្ឈមណ្ឌលកីឡា លីឡា នឹងបើកបង្រៀនក្បាច់រាំ សរសេរទំនុកបទភ្លេង បង្រៀនរបៀបក្លាយទៅជាសិល្បៈ ច្រៀងដាក់ Album។ល។ ការសិក្សាមានតម្លៃ១២០ដុល្លារក្នុងមួយខែសម្រាប់ការសិក្សាជាលក្ខណៈបុគ្គលម្នាក់, ៤០ដុល្លារសម្រាប់ការសិក្សាជាក្រុម។ ក្រៅពីការសិក្សាបង់ប្រាក់ សាលាតន្ត្រីថ្មីនេះ នឹងអនុញ្ញាតអោយកុមារក្រីក្រខ្មែរចំនួន១០នាក់សិក្សាដោយមិនបង់ប្រាក់។ លើសពីនេះទៅទៀត កុមារទាំង១០នាក់នោះ ទទួលបានការថែទាំ បង្រៀន ស្នាក់នៅរយៈពេល១ឆ្នាំ។ គោលបំណងរបស់សាលា គឺចង់បណ្តុះបណ្តាលក្មេងៗក្រីក្រទាំងនោះ អោយក្លាយទៅជាតន្ត្រីករជំនាញប្រចាំកម្ពុជានាពេលអនាគត៕
ទំនាក់ទំនងលោក Lewis ៖ ០៧៧ ៦៨ ៤៤ ៣៨
© រក្សាសិទ្ធិដោយ thmeythmey.com