សហគមន៍សេដ្ឋកិច្ចអាស៊ានផ្តល់ឱកាស តែកម្ពុជាមិនទាន់អាចទាញប្រយោជន៍បានច្រើនទេ!

ជាតិ

សេដ្ឋកិច្ច

សហគមន៍សេដ្ឋកិច្ចអាស៊ានផ្តល់ឱកាស តែកម្ពុជាមិនទាន់អាចទាញប្រយោជន៍បានច្រើនទេ!

17, Apr 2015 , 2:00 pm

រូបភាព

ដោយ: លីម តុលា

ភ្នំពេញ៖ សហគមន៍សេដ្ឋកិច្ចអាស៊ានរួមនឹងចាប់ផ្តើមដាក់អោយដំណើរការនៅចុងឆ្នាំ២០១៥ខាងមុខនេះ។ សហគមន៍សេដ្ឋកិច្ចអាស៊ានមានគោលដៅធ្វើអោយអាស៊ានក្លាយជាទីផ្សារ និងមូលដ្ឋានផលិតកម្មរួមគ្នាតែមួយ ដើម្បីជំរុញតំបន់នេះអោយមានលក្ខណៈប្រកួតប្រជែង សន្ទុះខ្លាំង និងធ្វើសមាហរណកម្មចូលគ្នាកាន់តែខ្លាំង។ សហគមន៍សេដ្ឋកិច្ចអាស៊ានផ្តល់ឱកាស តែកម្ពុជាមិនទាន់អាចទាញប្រយោជន៍បានច្រើនទេ។

ក្រុមហ៊ុនភាគច្រើននៅក្នុងអង្កេតយល់ឃើញថា សហគមន៍សេដ្ឋកិច្ចអាស៊ាន ផ្តល់ឱកាសច្រើនជាងការគម្រាមកំហែង។ ក្រុមហ៊ុននានាអាចបានផលចំណេញពីសេដ្ឋកិច្ចបើកចំហរ។ អាស៊ានកាន់តែទាក់ទាញអ្នកវិនិយោគិនទាំងក្នុង និងក្រៅតំបន់កាន់តែច្រើនបន្ថែមទៀត។

ពីឆ្នាំ១៩៩៩ ដល់ឆ្នាំ២០១២ តំបន់អាស៊ានដែលមានប្រជាពលរដ្ឋចំនួន៦២០លាននាក់ មានអត្រាកំណើនជាមធ្យម៥,៥% ដែលជំរុញអោយផលិតផលសរុបក្នុងស្រុកមានតម្លៃ៣ពាន់ពាន់លានដុល្លារ។ ការព្យាករណ៍បានបង្ហាញថា ចំនួនគ្រួសារថ្នាក់កណ្តាលនៅក្នុងអាស៊ាននឹងកើនឡើងពី៤០លានគ្រួសារក្នុងឆ្នាំ២០១០ដល់៨៥លានគ្រួសារក្នុងឆ្នាំ២០១៧ខាងមុខនេះ។ នេះបើយោងតាមរបាយការណ៍របស់វិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជាដែលផ្សព្វផ្សាយនៅថ្ងៃព្រហស្បតិ៍ទី៥ខែមិនាក្នុងឱកាសសន្និសីទចក្ខុវិស័យប្រទេសកម្ពុជា២០១៥នៅទីក្រុងភ្នំពេញ។

បច្ចុប្បន្ន អាស៊ានមានឱកាសកាន់តែធំឡើងដើម្បីកសាងខ្លួនអោយក្លាយទៅជាមជ្ឈមណ្ឌលផលិតកម្មកាន់តែធំបន្ថែមទៀត ដោយសារកម្លាំងពលកម្មនៅមានតម្លៃទាប និងកំណើនតម្លៃកម្លាំងពលកម្មនៅក្នុងប្រទេសចិន។ ស្របពេលជាមួយគ្នា កម្ពុជាក៏អាចទាញឱកាសពីសហគមន៍សេដ្ឋកិច្ចអាស៊ានដែរ។ ការស្រាវជ្រាវនាពេលថ្មីៗកន្លងមកនេះ បានបង្ហាញថា សហគមន៍សេដ្ឋកិច្ចអាស៊ានរួមនឹងជួយអោយផលិតផលសរុបក្នុងស្រុកកម្ពុជាកើនឡើង៤,៤% ការនាំចេញកើនឡើង៥,៣% ហើយការវិនិយោគឯកជននឹងកើនឡើង២៤,៨% ។

បើទោះបីជាកម្ពុជាអាចទាញបានឱកាសថ្មីពីការបើកចំហរសេដ្ឋកិច្ចអាស៊ានក៏ដោយក្តី ក៏ការស្រាវជ្រាវបង្ហាញក្តីព្រួយបារម្ភផងដែរ។ មូលធនមនុស្ស និងកម្រិតអប់រំនៅកម្ពុជាដើរក្រោយស្ទើរគ្រប់ប្រទេសនៅក្នុងតំបន់អាស៊ាន។ ទីផ្សារកម្ពុជា ខ្វះខាតកម្លាំងពលកម្មជំនាញ។ ជារួម កម្ពុជាអាចទទួលបានផលខ្លះពីសមាហរណកម្មសេដ្ឋកិច្ចអាស៊ានមែន។ ប៉ុន្តែដើម្បីអោយកម្ពុជាអាចទទួលបានអត្ថប្រយោជន៍ជាអតិបរមាពីសហគមន៍សេដ្ឋកិច្ចអាស៊ាន កម្ពុជាត្រូវតែធ្វើកំណែទម្រង់មួយចំនួនក្នុងនោះ ជារួមមាន៖ ទី១ កែលម្អរបរិយាកាសវិនិយោគ។ ទី២ កែលម្អរការផ្គត់ផ្គង់ភស្តុភារ និងធ្វើអោយសាមញ្ញនីតិវិធីគយ។ ទី៣ វិនិយោគលើមូលធនមនុស្ស។ ទី៤ លើកកម្ពស់ការចូលរួម និងការពិគ្រោះយោបល់ផ្នែកអាជីវកម្ម និងទី៥ បង្កើត និងអនុវត្តគោលនយោបាយជាតិស្តីពីការអភិវឌ្ឍន៍វិស័យឧស្សាហកម្ម។

សូមបញ្ជាក់ថា សហគមន៍សេដ្ឋកិច្ចអាស៊ានរួមឆ្នាំ២០១៥ សំដៅអនុញ្ញាតអោយមាន៖ ទី១ លំហូរទំនិញដោយសេរី។ ទី២ លំហូរសេវាកម្មដោយសេរី។ ទី៣ លំហូរទុនវិនិយោគដោយសេរី។ ទី៤ លំហូរមូលធនដោយសេរី និងទី៥ លំហូរកម្លាំងពលកម្មជំនាញដោយសេរី៕