ជាតិ
គិតត្រឹមខែមីនានេះ អាជ្ញាធរខេត្តស្វាយរៀងបណ្ដេញជនបរទេសខុសច្បាប់ ២៤២នាក់
×
គិតចាប់ពីអំឡុងឆ្នាំ២០១៤ ដល់ដើមខែមីនាឆ្នាំ២០១៥នេះ អាជ្ញាធរខេត្តស្វាយរៀង បានបណ្ដេញជនបរទេសចំនួន ២៤២នាក់ ដែលបានឆ្លងដែនខុសច្បាប់ចូលមកកម្ពុជា។ នេះបើតាមការចុះផ្សាយរបស់អគ្គស្នងការដ្ឋាននគរបាលជាតិ ។
អគ្គស្នងការដ្ឋាននគរបាលជាតិ បានឲ្យដឹងថា ស្នងការនគរបាលខេត្តស្វាយរៀង បានចាត់វិធានការលើបទល្មើសឆ្លងដែនខុសច្បាប់មានចំនួន១០លើក គិតចាប់ឆ្នាំ២០១៤ ដល់ខែមីនាឆ្នាំ២០១៥នេះដោយមានជនបរទេសខុសច្បាប់ចំនួន ២៤២ នាក់ ក្នុងនោះមានជនជាតិវៀតណាម ២០៧ នាក់ តួគី ២១ នាក់ និងអ៊ុយហ្គ័រ ១៤ នាក់ ។
អគ្គស្នងការដ្ឋាននគរបាលជាតិ ស្រង់សំដីលោកឧត្តមសេនីយ៍ កឹង ឃន ស្នងការនគរបាលខេត្តស្វាយរៀង បានបញ្ជាក់ថា បទល្មើសឆ្លងដែនខុសច្បាប់ក្នុងខេត្តស្វាយរៀង បានកើតឡើងតាមច្រករបៀងមួយចំនួននៃខ្សែបន្ទាត់ព្រំដែន ដែលមានព្រំប្រទល់ជាប់ជាមួយប្រទេសវៀតណាម ។ លោកបន្តថា ជនបរទេសមួយចំនួនដែលឆ្លងចូលមកកម្ពុជា ពួកគេតែងតែធ្វើឡើងតាមច្រករបៀងប៉ែកខាងជើង និងខាងត្បូង ច្រកទ្វារអន្តរជាតិបាវិត ។
យ៉ាងណាក៏ដោយលោកឧត្តមសេនីយ៍ កឹង ឃន បានអះអាងថា សមត្ថកិច្ចបានចាត់វិធានការក្នុងការបង្ការ និងទប់ស្កាត់ចំពោះជនបរទេសដែលឆ្លងដែនខុសច្បាប់ ដោយនិងចាប់បញ្ចួនចេញពីកម្ពុជាវិញ៕
© រក្សាសិទ្ធិដោយ thmeythmey.com