កីឡាជាតិ
គ្រូបង្វឹកក្រុមជម្រើសជាតិ លោក Lee Tae Hoonទទួលបានបៀវត្សរ៍៣៣០០ដុល្លារក្នុង១ខែ
×
សហព័ន្ធកីឡាបាល់ទាត់កម្ពុជាបានចំណាយប្រាក់ចំនួន៣៣០០ដុល្លារសហរដ្ឋអាមេរិកក្នុងមួយខែស្មើនឹង ៣៩.៦០០ដុល្លារក្នុងមួយឆ្នាំដើម្បីផ្ដល់ជាប្រាក់បៀវត្សរ៍ដល់លោកគ្រូបង្វឹកក្រុមបាល់ទាត់ជម្រើសជាតិកម្ពុជាជនជាតិកូរ៉េខាងត្បូងLee Tae Hoon កាលពីឆ្នាំ២០១៤។
ទិន្នន័យនេះបានបង្ហាញឱ្យដឹងក្នុងរបាយការណ៍សកម្មភាពការងារឆ្នាំ២០១៤នៅមហាសន្និបាតប្រចាំឆ្នាំរបស់សហព័ន្ធកីឡាបាល់ទាត់កម្ពុជាធ្វើឡើងនៅព្រឹកថ្ងៃទី៥ ខែ មីនា ម្សិលមិញនៅមជ្ឈមណ្ឌលនិងសាលាបាល់ទាត់ជាតិបាទីក្នុងខេត្តតាកែវ។
លោកLee បានកាន់តំណែងជាគ្រូបង្វឹកក្រុមបាល់ទាត់ជម្រើសជាតិកម្ពុជាជាលើកទី២ ចាប់ពីថ្ងៃទី១ ខែ សីហា ២០១៣ ដល់ ថ្ងៃទី៣១ ខែ កក្កដា ឆ្នាំ ២០១៥ពូលគឺក្នុងកិច្ចសន្យា២ ឆ្នាំ។ សម្រាប់ឆ្នាំ ២០១៤កន្លងទៅនេះលោកបានដឹកនាំក្រុមបាល់ទាត់ U21របស់កម្ពុជាទៅចូលរួមក្នុងពានរង្វាន់ 2014 Hassanal Bolkiah Trophy នៅប្រទេសប្រ៊ុយណេ, ចូលរួមជម្រុះក្នុងពានរង្វាន់AFF Suzuki Cup 2014 និងប្រកួតមិត្តភាពនានាជាច្រើន។
បេសកកម្មបន្ទាប់របស់លោកគ្រូបង្វឹកវ័យ៤៣ ឆ្នាំរូបនេះគឺដឹកនាំក្រុមជម្រើសជាតិកម្ពុជាចូលរួមវគ្គជម្រុះពានរង្វាន់FIFA World Cup 2018ជើងទី១ ប្រចាំទ្វីបអាស៊ីជាមួយក្រុមកោះម៉ាកាវនៅថ្ងៃទី ១២ និង ១៧ ខែ មីនារួមទាំងចូលរួមជម្រុះពានរង្វាន់AFC U23 Championship 2016នៅប្រទេសថៃនិង កីឡាស៊ីហ្គេមឆ្នាំ២០១៥ នៅសិង្ហបុរី ជាដើម។
នៅក្នុងមហាសន្និបាតម្សិលមិញនេះដែរមានការបោះឆ្នោតជ្រើសរើសសមាជិកចំនួន២ ថ្មីជំនួសអ្នកដែលអស់អាណត្តិមានលោកលី គឹមឈុន និង លោក អ៊ុកសិទ្ធជាតិ។ប៉ុន្ដែលោក អ៊ុកសិទ្ធជាតិបានឈរឈ្មោះសាជាថ្មីឡើងវិញ។ក្នុងចំណោមសមាជិកឈរឈ្មោះ៨ នាក់ លោក អ៊ុក សិទ្ធជាតិទទួលសំឡេងគាំទ្រច្រើនលើសលប់រហូតដល់៣៣ សំឡេង តាមពីក្រោយដោយលោកខៀវ ចិន្តាវ័ន្តមន្ត្រីសមាគមបាល់ទាត់មកពីខេត្តព្រះវិហារទទួលបាន១៧ សំឡេង៕
© រក្សាសិទ្ធិដោយ thmeythmey.com