ជាតិ
នយោបាយជាតិ
លោក ស ខេង ទទួលពាក្យស្នើសុំបង្កើតបក្សរបស់លោក សួន សេរីរដ្ឋា តែមិនទាន់ចុះបញ្ជី លោក សួន សេរីរដ្ឋា
× រដ្ឋមន្ត្រីក្រសួងមហាផ្ទៃ លោកឧបនាយករដ្ឋមន្ត្រី ស ខេង បានទទួលយកពាក្យស្នើសុំបង្កើតគណបក្សរបស់លោក សួន សេរីរដ្ឋា ដែលជាមេចលនាប្រឆាំងរដ្ឋាភិបាលលោក ហ៊ុន សែន យ៉ាងខ្លាំងក្លានោះ។ អ្នកនាំពាក្យក្រសួងមហាផ្ទៃ នាយឧត្តមសេនីយ ខៀវ សុភ័គ បានបញ្ជាក់ប្រាប់សារព័ត៌មានថ្មីៗនៅថ្ងៃសុក្រនេះថា លោកឧបនាយករដ្ឋមន្ត្រីនឹងផ្ញើការឆ្លើយតបទៅលោក សួន សេរីរដ្ឋា នៅរសៀលថ្ងៃសុក្រទី៦មីនានេះ។
ប៉ុន្តែបើតាមការបញ្ជាក់របស់អ្នកនាំពាក្យក្រសួងមហាផ្ទៃដដែល ការយល់ព្រមទទួលពាក្យសុំបង្កើតគណបក្សរបស់លោក សួន សេរីរដ្ឋា នោះ ក៏មិនមានន័យថា វានឹងអាចមានគណបក្សឈ្មោះ «អំណាចខ្មែរ» របស់លោក សួន សេរីរដ្ឋា ដោយស្វ័យប្រវត្តិនោះដែរ។ មន្រ្តីជាន់ខ្ពស់របស់នៃក្រសួងមហាផ្ទៃបានពន្យល់យ៉ាងដូច្នេះថា៖«នេះជាការយល់ព្រមលើពាក្យស្នើសុំបង្កើតគណបក្ស។ ប៉ុន្តែវាមិនមែនជាការចុះបញ្ជីគណបក្សនោះទេ។ គេត្រូវឆ្លងកាត់លក្ខខណ្ឌចុះបញ្ជីគណបក្សបន្តទៀត។ ឧទាហរណ៍ គេត្រូវមានស្នាមមេដៃគាំទ្រ៤០០០នាក់ជាដើម»។
វាអាចជាដំណឹងដ៏គួរឲ្យភ្ញាក់ផ្អើលមួយសម្រាប់អ្នកតាមដានស្ថានការនយោបាយនៅកម្ពុជា និងសម្រាប់លោក សួន សេរីរដ្ឋា ខ្លួនឯងផង នៅពេលដែលក្រសួងមហាផ្ទៃកម្ពុជា យល់ព្រមទទួលពាក្យសុំចុះឈ្មោះគណបក្សរបស់លោក សួន សេរីរដ្ឋា នៅពេលនេះ។ ប៉ុន្តែលោក ខៀវ សុភ័គ បានបកស្រាយយ៉ាងដូច្នេះថា៖«យើងពិនិត្យមើលច្បាប់ហើយ ក្នុងដំណាក់កាលនៃការស្នើសុំបង្កើតគណបក្ស វាមិនមានច្បាប់ចែងពាក់ព័ន្ធដល់បុគ្គលភាពនៃអ្នកបង្កើតគណបក្សនោះទេ។ កន្លងមក ក៏មានករណីសម្តេចក្រុមព្រះ និងលោក សម រង្ស៊ី ដូចគ្នាដែរ»។
លោក សួន សេរីរដ្ឋា ត្រូវបានគេស្គាល់ថា ជាអ្នករិះគន់រដ្ឋាភិបាលកម្ពុជារបស់លោកនាយករដ្ឋមន្ត្រី ហ៊ុន សែន មិនសំចៃមាត់។ លោក សួន សេរីរដ្ឋា ក៏ធ្លាប់បានស្នើសុំក្រសួងមហាផ្ទៃដើម្បីគណបក្សនយោបាយរបស់ខ្លួនដែរ ប៉ុន្តែលោកមិនដែលទទួលបានលទ្ធផលល្អដូចពេលនេះឡើយ៕
© រក្សាសិទ្ធិដោយ thmeythmey.com