អន្តរជាតិ
នយោបាយអន្តរជាតិ
ក្រុមភេរវជនរដ្ឋឥស្លាមចាប់ផ្តើមបំផ្លាញវាំងបុរាណមានអាយុ៣ពាន់ឆ្នាំនៅអ៊ីរ៉ាក់
×![]()
ក្រុមជ្រុលនិយមរដ្ឋឥស្លាមបានប្រើប្រាស់គ្រឿងចក្រធំៗដើម្បីបំផ្លិចបំផ្លាញវិមានAssyrianសម័យបុរាណមួយនៅក្នុងប្រទេសអ៊ីរ៉ាក់ បើតាមការអោយដឹងពីអ្នកបុរាណវិទូម្សិលមិញ។ រាជវាំងដែលត្រូវរងការបំផ្លាញដោយសារស្នាដៃក្រុមរដ្ឋឥស្លាមនោះមានអាយុកាលប្រហែលជាង ៣ពាន់ឆ្នាំទៅហើយ ដែលវាត្រូវបានគេចាត់ទុកជាសម្បត្តិបេតិកភណ្ឌមនុស្សជាតិផង។ នេះបើយោងតាមសារព័ត៌មាន Al Jazeera ។
កញ្ញា ខន ចំប៉ា លម្អិតព័ត៌មាននេះ
ក្រោយបង្ហោះវីដេអូបង្ហាញពីការបំផ្លាញវត្ថុបុរាណ និងរូបចម្លាក់ជាច្រើននៅក្នុងសារមន្ទីរមួយនាទីក្រុង Mosul ក្រុមជ្រុលនិយមរដ្ឋឥស្លាមចាប់ផ្តើមសកម្មភាពកម្ទេចវត្ថុបុរាណជាថ្មីទៀតនៅអ៊ីរ៉ាក់។ បើតាមការអោយដឹងពីអ្នកបុរាណវិទូ និងមន្ត្រីរដ្ឋាភិបាលអ៊ីរ៉ាក់ ក្រុមសកម្មប្រយុទ្ធរដ្ឋឥស្លាមនោះបានប្រើប្រាស់គ្រឿងចក្រធំៗ ដើម្បីកម្ទេចរាជវាំងបុរាណមួយកន្លែងនៅក្បែរទីក្រុង Mosul ភាគខាងជើងអ៊ីរ៉ាក់។
តាមពិតទៅកាលពីសប្តាហ៍មុនក្រុមរដ្ឋឥស្លាមនេះបានព្យាយាមវាយកម្ទេចវត្ថុបុរាណ រូបចម្លាក់ជាច្រើនរួចម្តងមកហើយ ដែលមានតម្លៃរាប់ពាន់លានដុល្លារអាមេរិក នាសារមន្ទីរនៅក្រុង Mosul។ ការបំផ្លាញវត្ថុបុរាណនេះត្រូវបានសាធារណជន អង្គការអន្តរជាតិថ្កោលទោសជាខ្លាំង។
ដោយឡែកជុំវិញការបំផ្លាញទីតាំងប្រវត្តិសាស្ត្រថ្មីនេះ គេមិនបានដឹងច្បាស់ថាការបំផ្លិចបំផ្លាញទីតាំងប្រវត្តិសាស្ត្រនេះបានចាប់ផ្តើមនៅថ្ងៃណា និងពេលណានោះឡើយប៉ុន្តែព័ត៌មាននេះទើបតែត្រូវគេបង្ហាញអោយដឹងកាលពីម្សិលមិញនេះ។បើតាមរដ្ឋាភិបាលអ៊ីរ៉ាក់ រាជវាំងដែលរងការបំផ្លាញនោះ ជារាជវាំងសាងសង់ឡើងក្នុងសម័យ Assyrian ដែលមានរយៈពេល ៣ពាន់ឆ្នាំទៅហើយនោះ ដែលស្ថិតក្នុងទីក្រុង Nimrud។
ទ្រព្យសម្បត្តិ ឬបេតិកភណ្ឌដែលជាកេរ្តិ៍ដំណែលមនុស្សជាតិនេះត្រូវបានក្រុមជ្រុលនិយមនេះបំផ្លាញចោលគ្មានស្តាយស្រណោះ គ្មានញញើតដៃអ្វីបន្តិចសោះ។ ក្រោយពេលដែលមានការកម្ទេចទីតាំងប្រវត្តិសាស្ត្រនេះ ក្រសួងទេសចរណ៍អ៊ីរ៉ាក់ បានចេញមុខថ្កោលទោសក្រុមនេះ ប៉ុន្តែមិនមានរបាយការណ៍ណាបញ្ជាក់ថាទេថា វាំងបុរាណនោះខូចខាតកម្រិតណាទេ។
ទីក្រុង Nimrud ត្រូវបានគេស្គាល់ថា ជាទីក្រុងបុរាណមួយដែលគេជឿជាក់ថា ត្រូវបានសាងសង់ឡើងកាលពី៧ពាន់ឆ្នាំមុន។ ចំណែករាជរាំងនោះជាកម្មសិទ្ធិរបស់ព្រះចៅ Ashurnasirpalទី ២ ដែលគ្រប់គ្រងអាណាចក្រដ៏មានឥទ្ធិពលបំផុតមួយដែលរួមទាំងទឹកដីអ៊ីរ៉ាក់ ស៊ីរី និងភាគខាងក្រោមប្រទេសអេហ្ស៊ីប និងផ្នែកខ្លះនៃប្រទេសតួកគីផង។
កាលពីឆ្នាំ ២០០២ មូលនិធិកេរ្តិ៍ដំណែលពិភពលោកបានចាត់ទីក្រុង Nimrud ជាទីតាំងបុរាណដែលងាយរងគ្រោះថ្នាក់ជាងគេលើពិភពលោកព្រោះវាងាយរងការបំផ្លិចបំផ្លាញដោយធម្មជាតិ និងគ្មានសន្តិសុខជុំវិញដែលបណ្តាលអោយក្រុមជនល្មើសអាចលួចវត្ថុបុរាណបានយ៉ាងងាយផងដែរ។
យ៉ាងណាក៏ដោយ គេឃើញមានមតិរិះគន់ស្ថាប័ននិងសហគមន៍អន្តរជាតិចំពោះការយឺតយ៉ាងនិងស្ទាក់ស្ទើរក្នុងការទប់ស្កាត់និងបញ្ឈប់បញ្ហានេះ។ សហគមន៍អន្តរជាតិជាពិសេសស្ថាប័នដែលមានតួនាទីរក្សា និងការពារបេតិកភណ្ឌពិភពលោក គួរបង្កើនតួនាទីរបស់ខ្លួន និង ចាត់វិធានការអោយមានប្រសិទ្ធភាពដើម្បីទប់ស្កាត់រាល់ទង្វើដែលប៉ះពាល់និងខូចខាតរាល់វត្ថុឬទីតាំងដែលមានតម្លៃមិនអាចកាត់ថ្លៃបានទាំងនេះផង៕
© រក្សាសិទ្ធិដោយ thmeythmey.com
