អន្តរជាតិ
នយោបាយអន្តរជាតិ
×![]()
វត្តមាននាវាចម្បាំងជាច្រើនគ្រឿងរបស់សមាជិកបក្សសម្ព័ន្ធយោធាណាតូនៅក្នុងសមុទ្រខ្មៅ បានធ្វើអោយការប្រឈមមុខដាក់គ្នាកើតឡើងខ្លាំងរវាងរុស្ស៊ី និងលោកខាងលិច។ មិនទាន់ទាំងបានប៉ុន្មានផង ស្រាប់តែអាមេរិកបានប្រកាសបញ្ជូនទ័ពបន្ថែមទៅកាន់ប្រទេសអ៊ុយក្រែនរាប់រយនាក់ទៀតចុងសប្តាហ៍នេះ។ រុស្ស៊ីរិះគន់លោកខាងលិច ដោយអះអាងថា ក្រុមនេះប្រើប្រាស់ជម្លោះអ៊ុយក្រែនដើម្បីរករឿងរុស្ស៊ីដោយកសាងកម្លាំងទ័ពនៅក្បែរព្រំដែនរុស្ស៊ី។
ក្រោយពីមានវត្តមាននាវាចម្បាំងបក្សសម្ព័ន្ធណាតូជាច្រើនគ្រឿងនៅក្នុងសមុទ្រខ្មៅ ស្រាប់តែមានព័ត៌មានបញ្ជាក់ថាសហរដ្ឋអាមេរិកនឹងបញ្ជូនកងទ័ពរាប់រយនាក់បន្ថែមទៀតទៅកាន់ប្រទេសអ៊ុយក្រែន ដើម្បីបង្វឹកកងទ័ពនៅទីនោះ។ នាវាចម្បាំងប្រមាណ ៦គ្រឿងនោះមាននាវារបស់អាមេរិកផង រ៉ូម៉ានីផង កាណាដា ផង ប៊ុលការីផង និងតួកគីផងដែរ ហើយការធ្វើដំណើរទៅកាន់សមុទ្រខ្មៅនោះគឺដើម្បីចូលរួមសមយុទ្ធយោធាណាតូ។
រដ្ឋាភិបាលក្រុងវ៉ាស៊ីនតោនក៍កំពុងបញ្ជូនកងទ័ពចំនួន ៦០០នាក់ទៅកាន់ទឹកដីអ៊ុយក្រែននៅចុងសប្តាហ៍នេះ។ បើតាមការអោយដឹងពីអ្នកនាំពាក្យក្រសួងការបរទេសរុស្ស៊ីលោក AleksandrLukashevich កងទ័ពអាមេរិកដែលស្ថិតនៅក្នុងប្រទេសអ៊ុយក្រែនស្រាប់នោះមានប្រហែល ៣០០នាក់រួចទៅហើយ។ កងទ័ពដែលត្រូវបញ្ជូនទៅអឹរ៉ុបខាងកើតជាពិសេសអ៊ុយក្រែននោះ គឺដើម្បីចូលរួមក្នុងសមយុទ្ធយោធារបស់កម្លាំងណាតូ និងផ្តល់ការហ្វឹកហ្វឺនដល់កងកម្លាំងអ៊ុយក្រែនផង។
គេឃើញមានការបញ្ជូនកងទ័ព ប៉ុន្តែមិនទាន់ឃើញមានការបញ្ជូនអាវុធយុទ្ធភណ្ឌទៅកាន់អ៊ុយក្រែននោះឡើយ ហើយរដ្ឋាភិបាលក្រុងវ៉ាស៊ីនតោនក៏កំំពុងថ្លឹងថ្លែងមើលថា បើបញ្ជូនសព្វាវុធទៅអោយអ៊ុយក្រែន គេនឹងបានប្រយោជន៍អ្វីខ្លះមកវិញ។ យ៉ាងណាក៏ដោយលោក អូបាម៉ា ធ្លាប់ព្រមានច្រើនដងហើយថា រដ្ឋាភិបាលលោកនឹងបំពាក់អាវុធដល់កងកម្លាំងរដ្ឋាភិបាលក្រុងគៀវដើម្បីកម្ទេចក្រុមឧទ្ទាមភាគខាងកើតដែលស្ម័គ្រស្មោះនឹងរុស្ស៊ី ក្នុងករណីដែលរុស្ស៊ីមិនអាចដោះស្រាយជម្លោះអ៊ុយក្រែនបាន។ ក្រុងម៉ូស្គូបានរិះគន់ និងថ្កោលទោសក្រុងវ៉ាស៊ីនតោនដែលមានចេតនា ចង់បញ្ជូនអាវុធយុទ្ធភ័ណ្ឌទៅអ៊ុយក្រែន ដ្បិតវាគ្មានចំណេញអ្វីក្រៅពីបង្កើតសង្គ្រាមបង្ហូរឈាមគ្នា។
ដោយឡែកក្រៅពីវត្តមានកងទ័ពណាតូ និងសព្វាវុធដូចជានាវាចម្បាំងជាច្រើនគ្រឿងនៅក្បែរៗព្រំដែនរុស្ស៊ី គេក៏ឃើញមានលំហាត់យោធាច្រើនយ៉ាងប្លែកៗគ្នានៅតំបន់បាល់ទិកផងដែរ។ ជាឧទាហរណ៍ លំហាត់យោធាដែលទើបធ្វើឡើងនៅនៅអេស្តូនីក្បែរព្រំដែនរុស្ស៊ីកាលពីថ្ងៃ ២៤កម្ភៈកន្លងទៅ។ លំហាត់យោធារៀបចំឡើងចម្ងាយត្រឹម៣០០ម៉ែត្រប៉ុណ្ណោះពីព្រំដែន ហើយមានយានយន្តជាច្រើនរយគ្រឿង និងកងទ័ពរាប់ពាន់នាក់ក្នុងនោះមានទ័ពអាមេរិកផងដែរ៕
© រក្សាសិទ្ធិដោយ thmeythmey.com
