អន្តរជាតិ
ពិធីរៀបការមួយនៅអេហ្ស៊ីប យកស្ទីលប្រហារជីវិតរបស់ក្រុម ISIS មកសម្ដែង
×
កូនកំលោះម្នាក់នៅក្នុងប្រទេសអេហ្ស៊ីបបានធ្វើឲ្យកូនក្រមុំ និងភ្ញៀវក្នុងពិធីរៀបការ មានការភ្ញាក់ផ្អើលនិងភិតភ័យជាខ្លាំងដោយសារតែមានការសម្ដែងជាការចាប់ជំរិត និងប្រហារជីវិតដែលយកស្ទីលតាមការប្រហារជីវិតរបស់ក្រុម ISIS មួយកើតឡើងដោយមិនបានដឹងមុន នៅពេលដែលពិធីរៀបការជិតបញ្ចប់នោះ។
យោងតាមកាសែត The Guardianការសម្ដែងនោះគឺហាក់ដូចជាសកម្មភាពពិតៗ ដោយមានបុរសមួយក្រុម ពាក់ម៉ាសមុខពណ៌ខ្មៅ ហើយកាន់កំបិតជ័រ ដើរសំដៅមករកកូនកំលោះកូនក្រមុំ ដែលកំពុងតែអង្គុយនៅលើឆាក។ បន្ទាប់មកពួគគេបាននាំយកប្ដីប្រពន្ធមួយគូនេះ ដាក់បញ្ចូលទៅក្នុងទ្រុងមួយហើយចាក់សោរជាប់។ ពេលនោះឪពុករបស់កូនក្រមុំភ័យស្លន់ស្លោ ហើយបានរត់ពេញបន្ទប់រៀបការ ព្រោះគាត់គិតថាកូនស្រី និងកូនប្រសាររបស់គាត់ ត្រូវគេចាប់ជំរិតពិតមែននោះ។
ប៉ុន្តែក្រោយមក នៅពេលដែលគេដាក់គូស្នេហ៍នៅក្នុងទ្រុងរួចមក ក៏មានការចាក់បទចម្រៀងញាក់កន្ត្រាក់អារម្មណ៍ ហើយទាំងកូនកំលោះ កូនក្រមុំ អ្នកសម្ដែងជាក្រុមISIS បានរាំតាមបទភ្លេងនោះ ដើម្បីបញ្ជាក់ថានេះគឺជាការសម្ដែងប៉ុណ្ណោះ ទើបភ្ញៀវដែលចូលរួមក្នុងពិធីរាំតាមពួកគេ យ៉ាងសប្បាយរីករាយជាមួយគ្នាតែម្ដងទៅ។
កូនក្រមុំឈ្មោះនាង ShaimaaDeif អាយុ ២៣ ឆ្នាំ បាននិយាយថា នាងបានគិតទុកមុនថា ស្វាមីរបស់នាងគឺ លោក Ahmed Shehata អាយុ ២៥ នឹងធ្វើឲ្យនាងភ្ញាក់ផ្អើលក្នុងថ្ងៃរៀបការរបស់ពួកគេ។ ប៉ុន្តែនាងមិនដែលរំពឹងទុកថា ប្ដីរបស់នាងបែរជាសម្ដែងបែបនេះ ធ្វើឲ្យនាងភ្ញាក់ផ្អើលនិងភ័យជាខ្លាំង ហួសពីអ្វីដែលនាងបានគិតទុក។
ពិធីរៀបអាពាហ៍ពិពាហ៍ ដោយយកស្ទីលតាម ក្រុម ISIS បែបនេះត្រូវបានគេពេញនិយមធ្វើនៅក្នុងប្រទេសអេហ្ស៊ីបដើម្បីជាការចំអកនិងសម្ដែងនូវកំហឹងរបស់ពួកគេ ទៅលើក្រុម ISIS ដែលបានកាត់ក្បាលពួកគ្រីស្ទានជនជាតិអេស៊ីបចំនួន ២១ នាក់នៅក្នុងប្រទេសលីប៊ី កាលពីពេលថ្មីកន្លងទៅនេះ៕
ទស្សនាវីដេអូ
© រក្សាសិទ្ធិដោយ thmeythmey.com