ជាតិ
ដួង រតនា បដិសេធទៅដើរកម្សាន្តជាមួយសង្សារ ភ្នំពេញ៖ តារាសម្តែងវ័យក្មេងកញ្ញា ដួង រតនា ដែលទស្សនិកជនបានឃើញវត្តមានរបស់នាងនៅលើកញ្ចក់ទូរទស្សន៍បាយ័ន ក្នុងរឿង “ម៉ែក្មេករើសកូនប្រសា” សម្តែងជាតួអង្គឆ្នាសឆ្នើមនោះកាលពីថ្មីៗនេះ បានលេចឮថា នាងបានទៅដើរកម្សាន្តជាមួយសង្សារនៅក្រៅប្រទេសស។ប៉ុន្តែ រតនា បានបដិសេធថា ការធ្វើដំណើរទៅប្រទេសថៃនោះគឺដើម្បីទៅទិញខោអាវយកមកលក់ប៉ុណ្ណោះ។
តារាសម្តែងដែលមហាជនស្គាល់វត្តមាននាង តាមរយៈការបង្ហាញវត្តមាននៅក្នុងខ្សែវីដេអូភាគរឿង “ម៉ែក្មេករើសកូនប្រសារ” ដែលបានចាក់បញ្ចាំងនៅលើកញ្ចក់ទូរទស្សន៍បាយ័ន កញ្ញា ដួង រតនា ហៅ រ៉េយ៉ា ត្រូវបានមហាជនមួយចំនួនគាំទ្រ និងកោតសរសើរយ៉ាងក្រៃលែង ដែលនាងសម្តែងជាតួកាចបានសមឥតខ្ចោះ សូម្បីតែតារាជើងចាស់ អ្នកនាង ប៉ែន សុផានី ក៏ស្ងើចសើរសើរនាងថា សម្តែងបានល្អ ខណៈដែល រ៉េយ៉ា ជាដៃគូជម្លោះដ៏ស្រួចស្រាល់ជាមួយគាត់ (ប៉ែន សុផានី) នៅក្នុងសាច់រឿង “ម៉ែក្មេករើសកូនប្រសារ” ។
រ៉េយ៉ា បានឲ្យដឹងថា នាងមិនទាន់មានគម្រោងថតរឿងថ្មីនៅឡើយទេ ប៉ុន្តែតារាសាច់សខ្ចីរូបនេះប្រាប់ថា នាងក៏មមាញឹកការងារនៅក្រៅអាជីពសិល្បៈផងដែរ ពិសេសគឺត្រូវជួយមើលការខុសត្រូវក្នុងហាងលក់សម្លៀកបំពាក់របស់ម្តាយនាងនៅផ្សារ ផេនសលផងដែរ។
កាលពីពេលកន្លងទៅ រ៉េយ៉ា បានធ្វើដំណើរទៅប្រទេសថៃចំនួន៣ថ្ងៃ ដើម្បីឡើងទៅយកខោអាវមកលក់ ដែលនេះ វាជាអាជីពមួយដែលនាងបានដំណើរការជាមួយក្រុមគ្រួសារតាំងពី៣ឆ្នាំមុន។ ក្នុងការធ្វើដំណើរទៅប្រទេសថៃលើកនេះ ត្រូវបានប្រភពទម្លាយឲ្យដឹងថា នាងបានរួមដំណើរទៅជាមួយបុរសសង្សារ ដើម្បីដើរកម្សាន្តក្រោយពីថតកុនចប់។ ប៉ុន្តែ យ៉ាងណាក៏ដោយ រ៉េយ៉ា បានបដិសេធចំពោះការលើកឡើងដូចខាងលើ ដោយនាងអះអាងថា នាងមិនបានទៅដើរលេងជាមួយសង្សារនោះទេ ហើយនាងក៏មិនមានសង្សារអ្វីដែរ។
គេសង្កេតឃើញថា តារាសម្តែងរូបនេះ ក៏និយមស្លៀកពាក់បែបសិចស៊ីផងដែរ ប៉ុន្តែនៅពេលដែលសួរថា តើការស្លៀកពាក់សិចស៊ី វាជាចំណុចចម្បងដែលនាងកសាងភាពល្បីល្បាញមែនទេ? នាងឆ្លើយថា វាជារឿងមួយបន្ទាប់បន្សំដែរ ប៉ុន្តែយ៉ាងណាក៏ដោយនាងអះអាងថា សិចស៊ីត្រឹមតែទស្សនិកជនទទួលយកបានប៉ុណ្ណោះ មិនហ៊ានសិចស៊ីឲ្យហួសហេតុនោះទេ ដ្បិតអីមានមេរៀនច្រើនមកហើយ ដែលតារាសិល្បៈរៀមច្បងរងទទួលការរិះគន់ពីមហាជននោះ៕
© រក្សាសិទ្ធិដោយ thmeythmey.com