បទ គាន់ដូមាសស្នេហ៍ របស់លោក ស៊ីន ស៊ីសាមុត មានកំណើតពីអ៊ីតាលី

ជាតិ

បទ គាន់ដូមាសស្នេហ៍ របស់លោក ស៊ីន ស៊ីសាមុត មានកំណើតពីអ៊ីតាលី

30, Sep 2015 , 3:17 pm

រូបភាព

ដោយ: ថ្មីៗ

ប្រិយមិត្តអ្នកស្តាប់ជាទីមេត្រីនៅថ្ងៃពុធនេះលោក សុខឿន នឹងជំរាបជូនប្រិយមិត្តអ្នកស្តាប់ អំពីបទចម្រៀងអ៊ីតាលីមួយបទដែលមានចំណងជើងថា «Quando, Quando, Quando» និងបទចម្រៀងខ្មែរដែលមានចំណងជើងថា«គាន់ដូមាសស្នេហ៍» របស់លោក ស៊ីន ស៊ីសាមុត ។

សំឡេង

Quando, Quando, Quando នេះ ជាចំណងជើងនៃបទចម្រៀងដែលលោកអ្នកកំពុងស្តាប់នៅពេលនេះ។ ចំណងជើងនេះ មានន័យជាភាសាខ្មែរថា ពេលណា ពេលណា ពេលណា។ Quando, Quando, Quando គឺជាបទចម្រៀងដ៏ពេញនិយមរបស់អ៊ីតាលី ដែលត្រូវបានប្រគំឡើងជាចង្វាក់បូសាណូវ៉ា (Bossa nova) ។

Quando, Quando, Quando ប្រសូតឡើងដោយស្នាដៃនិពន្ធទំនុកច្រៀងរបស់កវីអ៊ីតាលីឈ្មោះអាល់ប៊ើតូ ថិស្តា (Alberto Testa) និពន្ធបទភ្លេង និងច្រៀង ដោយអ្នកចម្រៀងឈ្មោះ តូនី រ៉េនីស (Tony Renis)។ បទចម្រៀងនេះ បានចេញលក់នៅឆ្នាំ ១៩៦២ ។

នៅឆ្នាំ ១៩៦២ ដដែល បទចម្រៀងនេះត្រូវបានទំនុកជាភាសាអង់គ្លេសដោយកវី ឈ្មោះ អ៊ើវីន ដ្រេក ( Ervin Drake) និងច្រៀងដោយអ្នកចម្រៀងអាមេរិកាំងឈ្មោះ ភែត ប៊ូន (Pat Boone)។ ជាបន្តបន្ទាប់ បទចម្រៀង Quando, Quando, Quando ត្រូវបានអ្នក ចម្រៀងជាច្រើននាក់យកទៅច្រៀងជាភាសាជាតិរបស់ខ្លួន។ ក្នុងចំណោមអ្នកដែលច្រៀងបទនេះជាភាសាអង់គ្លេស អ្នកចម្រៀងប៉ប់ ឈ្មោះ អ៊ីងហ្គឹលប៊ើត ហាំផឹឌីង ( Engelbert Humperdinck) ទទួលបានប្រជាប្រិយភាពជាង។

ទាំងបទចម្រៀងជាភាសាអ៊ីតាលី និង បទចម្រៀងជាភាសាអង់គ្លេស សុទ្ធតែបានច្រៀង រៀបរាប់អំពី អារម្មណ៍របស់បុរសម្នាក់ ដែលបានឃ្លាតចាកពីនារីជាទីស្រឡាញ់របស់ខ្លួន។ បុរសនោះ រង់ចាំពេលវេលាណាមួយដែលនារីជាទីស្រឡាញ់ត្រឡប់មករកខ្លួនវិញ ដើម្បីផ្តើមស្នេហ៍ជាថ្មី។

នៅកម្ពុជាឯណេះវិញ នៅពាក់កណ្តាលទសវត្សរ៍ឆ្នាំ ១៩៦០ ផលិតកម្មខេមរាថាស បានចេញ លក់បទចម្រៀងនេះជាភាសាខ្មែរ ។ បទនេះនិពន្ធទំនុកច្រៀងជាថ្មី ដោយលោក ទេព សុខុម និង ច្រៀងដោយលោក ស៊ីន ស៊ីសាមុត។

បទចម្រៀងនេះ មានចំណងជើងថា គាន់ដូមាសស្នេហ៍។ ផ្ទុយពីបទចម្រៀងជាភាសាអ៊ីតាលី និង អង់គ្លេស បទចម្រៀងនេះបានច្រៀងរៀបរាប់ អំពីសម្រស់នារីម្នាក់ដែលស្រស់ ស្អាតគ្មានគូផ្ទឹម។ សម្រស់នេះ បានទាក់ទាញទឹកចិត្តកវី និងប្រុសៗគ្រប់ប្រាណអោយលង់ស្នេហ៍នឹងនាង។ ប៉ុន្តែ យុវជនយើង បែរជាយល់ថា នារីនោះនៅខ្ពស់ហួសឆ្ងាយនឹងឈោងចាប់ទៅវិញ។

ប្រជាប្រិយភាពរបស់បទចម្រៀង Quando, Quando, Quando បានរសាត់ឆ្លងសតវត្សរ៍ អស់រយៈពេល៥៣ហើយ។ បទចម្រៀងនេះ ត្រូវបានគេកែសម្រួលនិង ផលិតឡើងវិញ ជាភាសាប៉ទុយហ្គាល់ ភាសាអាល្លឺម៉ង់ ភាសាប៉តូរីកូ ភាសាអ៊ីស្តូនៀ ភាសាវៀតណាម ជាដើម។ បទចម្រៀងទាំងនោះ ត្រូវបានផលិតដើម្បីដាក់លក់ ចាក់ផ្សាយតាមវិទ្យុ ទូរទស្សន៍ និង ដាក់បញ្ចូលក្នុងខ្សែភាពយន្តផងដែរ។