ជាតិ
បទវិភាគ
នយោបាយជាតិ
× លិខិតមិត្តអ្នកអាន
ដោយ ធូ វាសនា នៅរតនៈគិរី
[email protected]
រឿងល្បែងអុកនេះគឺថា បើសុខៗមកឈរមើលពាក់កណ្តាលទី គឺមិនល្អមើល មិនព្រឺព្រួចនោះទេ។
មកដល់ពេលនេះហើយ នៅមានអ្នកផ្កាប់មុខមួយចំនួនសរសេរអត្ថបទថា៖«ស.ជ នៅមានប្រៀបទៀត!»
យើងក្រលេកមើល៤ជំហានចុងក្រោយ មុននឹងមកដល់ចំណុចនេះ ៖
ជំហានទី១) គឺ គ.ជ.ប ប្រកាសតាមលោកខៀវ កញ្ញារីទ្ធ ដែលជាផែនការចេញពី«គ៨៥»។
ជំហានទី២) ព្រះមហាក្សត្រឲ្យទទួលស្គាល់លទ្ធផល ហើយយាងទៅដឹកនាំការប្រជុំ ដឹកនាំរដ្ឋសភាថ្មី។
ជំហានទី៣) បង្ក្រាបបាតុកម្ម ហើយចរចាបង្ខំឲ្យ«ស.ជ»ចូលសភា ផ្តល់ឲ្យនូវអ្វីដែលជាការទាមទារ តែមិនប្រលែងដូចជា ទូរទស្សន៍ និងគ.ជ.ប ថ្មីជាដើម។ ជាពិសេសគឺ យកអ្នកស្រីពុង ឈីវកេក ជាធ្នាក់ដើម្បីធ្វើឲ្យមហាជនស្ងប់ចិត្ត ធ្វើជាសមាសភាពទី៩ ហើយក៏ជាធ្នាក់ទាក់ ស.ជ ឲ្យចូលសភាដែរ ដើម្បីកែប្រែច្បាប់ គ.ជ.ប ថ្មីផងដែរ។
ជំហានទី៤) គឺផែនការចរចាដើម្បីបំផ្លាញការចរចា។ បង្កើតច្បាប់ដើម្បីបំផ្លាញច្បាប់។ ធ្វើយ៉ាងណាឲ្យ«គ.ជ.ប ថ្មីដូចគ.ជ.ប ចាស់ ដូចក្បួនសឹកពោលថា៖«យុទ្ធសាស្ត្រ គឺជាសិល្បៈនៃការបំភាន់។ បើគេល្អជាងយើងត្រូវឲ្យគេមើលមកថា យើងល្អដូចគេ»។
ពេលដែលលោកស្រីពុង ឈីវកេក ប្រកាសបដិសេធជាសមាសភាពទី៩នៅ គ.ជ.ប គឺដូចជាអ្វីដែល «ប្រជ»បានគ្រោងទុក។ ព្រោះថានៅក្នុងកិច្ចព្រមព្រៀងអត់មានបេក្ខជនបម្រុងនោះទេ។ អញ្ចឹងទោះ បក្សប្រជាជនដាក់នរណាមកដឹកនាំ (រួមទាំងលោក អ៊ឹម សួស្តី ឬលោក ទេព នីថា) មកធ្វើជាបេក្ខជន ទី៩ ក៏អង្ករក្លាយជាបាយទៅហើយ។ គឺសម្រេចដោយសំឡេង ៥០+១ ដែល«ប្រជ»មានប្រៀបបាត់ទៅហើយ។
លើកនេះប្រវត្តិសាស្ត្រមានកំណត់ត្រាថ្មីហើយគឺ ថា លោកស្រីពុង ឈីវកេក ជា"តួឯក"ក្នុងទំព័រកំណត់ត្រានេះ រួមមានបណ្ឌិតប៉ុន្មាននាក់ ដែលឲ្យយោបល់ លោកស្រីកុំឲ្យទទួលយកតួនាទីនេះ គឺជា«តួរង»។ ព្រោះតាំងពីដើមទីមកទាំង ស.ជ និងមហាជនសង្ឃឹមទាំងស្រុង លើសមាសភាពលោកស្រី។ បើអត់ពីលោកស្រីគឺ ត្រូវជ្រើសរើសសារជាថ្មី ដែល«ប្រជ» មានប្រៀបជាង រហូតដល់៩០%។ ទោះ«សជ»ព្រមក៏ដោយ មិនព្រមក៏ដោយក៏គ្មានឧបសគ្គអីដែរ។ ព្រោះថាអ្នកការពារខ្សែក្រវាត់ក្រុង(លោកស្រីពុង ឈីវកេក)ត្រូវបានបង្ខំឲ្យទំលាក់អាវុធ បើកទ្វារក្រុង ចុះចាញ់ទៅហើយ។ អ្វីដែលយើងជាប្រជារាស្ត្រខ្មែរ បានព្រួយបារម្ភ ក៏វាក៏បានកើតឡើងមែន។ លើកនេះ បាយកក ក៏ក្លាយជាបាយផ្អូមដែរ។
ជូនចំពោះលោកស្រី និងមេដឹកនាំបក្សសង្គ្រោះជាតិ!
នៅមិនទាន់ដល់ដំណាក់កាលចុងក្រោយ អ្វីៗក៏នៅមានសង្ឃឹមដែរ។ ក្នុងពេល ដែលលោកស្រីមិនទាន់ផ្ញើលិខិតផ្លូវការទៅមេដឹកនាំបក្សនយោបាយទាំងពីរ លោកស្រីនៅតែមានឱកាសកែច្នៃទំព័រប្រវត្តិសាស្ត្រថ្មីមួយនេះ តើចង់ឲ្យគេសរសេរអំពីអ្វី? ហើយក៏រួមទាំងលោកសម រង្ស៊ី និងលោកកឹម សុខាផងដែរ។
កូនសោរក្នុងរបត់នយោបាយមួយនេះ គឺនៅលើលោកស្រីពុង ឈីវកេក ព្រោះ គ្មានបេក្ខជនបម្រុងក្នុងកិច្ចព្រមព្រៀងនោះទេ។ ចង់និយាយថាបើលោកស្រីមិនយល់ព្រម អញ្ចឹងបក្សប្រជាជននឹងលើកដាក់នរណាចូលក្នុង"គជប"ថ្មីនេះ ស្រេចតែចិត្តមានទាំងលោកអ៊ឹម សួស្តី និងលោកទេព នីថាផងដែរ។
តាមពិតមានវីរៈជនជាច្រើន ដែលមានកេរ្តិ៍ឈ្មោះ និងស្នាដៃ ហើយអាចធានាឯករាជ្យបាន។ តែពួកគាត់មិនត្រូវបានគេដាក់ជាបេក្ខជនបម្រុងក្នុងកិច្ចព្រមព្រៀងនោះទេ។ ដូច្នេះបើលោកស្រីមិនយល់ព្រមគឺ មិនអាចបន្ទោសគណបក្សប្រជាជនបានទេ។ បើគេលើក លោកអ៊ឹម សួស្តី មកកាន់តំណែងនេះវិញ ព្រោះ"សជ"គ្មានកម្លាំងគ្រប់គ្រាន់នៅសភាក្នុងការរាំងខ្ទប់ការសម្រេចចិត្តនយោបាយរបស់"ប្រជ"នោះទេ។
ជាចុងបញ្ចប់សូមលោកស្រីពុង ឈីកេក និងមេបក្សប្រឆាំងត្រូវតែយកចិត្តទុកដាក់គិតពិចារណាឡើងវិញ និងឲ្យបានល្អិតល្អន់ គិតដល់លទ្ធផលចុងក្រោយ និងវាសនានគរ វាសនារាស្ត្រខ្មែរគ្រប់ជំនាន់ជាគោល...។
© រក្សាសិទ្ធិដោយ thmeythmey.com