ជាតិ
បទវិភាគ
×![]()
ភ្នំពេញ៖ ក្នុងរយៈពេលប៉ុន្មានឆ្នាំចុងក្រោយនេះ គេសង្កេតឃើញថា ប្រជាជនខ្មែរចាយវាយកាន់តែច្រើនឡើងៗទៅលើម្ហូបអាហារ សម្ភារៈអេឡិចត្រូនិក គ្រឿងអលង្ការ គ្រឿងតុបតែងខ្លួនសម្លៀកបំពាក់ ឡានទំនើបផ្ទះទំនើប។ល។ តើកត្តាអ្វីខ្លះដែលជំរុញអោយប្រជាជនសម័យនេះចំណាយកាន់តែច្រើន? តើការចាយវាយច្រើនរបស់ប្រជាជនខ្មែរជួយជំរុញសេដ្ឋកិច្ចរបស់ខ្មែរ ឬជួយសេដ្ឋកិច្ចរបស់បរទេស?
កាលពីដើមឡើយ គ្រួសារខ្មែរមិនសូវហ៊ានចំណាយប្រាក់កាសដែលគេរកបានទេពីព្រោះការ រកប្រាក់នាសម័យដើមមានការលំបាកខ្លាំងណាស់។ លំបាករហូតដល់ទៅរកប្រាក់បានហើយមិនហ៊ានទាំងចាយទៅវិញផង។
អ្នកខ្លះរកបាន១០០ចាយទៅវិញតែ១០ប៉ុណ្ណោះ។ សល់ប៉ុន្មាន ពួកគេសន្សំសំចៃទាំងអស់។ ប៉ុន្តែ ឥឡូវនេះ ប្រជាជនមួយភាគធំមិនថានៅក្នុងប្រទេសកម្ពុជាឬនៅប្រទេសផ្សេងទេ និន្នាការនៃការចាយវាយមានការផ្លាស់ប្តូរយ៉ាងខ្លាំង។ អ្នកខ្លះរកបាន១០០ ចាយទៅវិញ២០០ក៏មានដែរ។
ការចាយវាយកាន់តែច្រើនគឺជានិន្នាការសកល ហើយក្នុងនោះក៏មានប្រទេសកម្ពុជាផងដែរ។ និន្នាការនេះត្រូវបានគេស្តីបន្ទោសមួយផ្នែកទៅលើការរីកចម្រើក ផ្នែកបច្ចេកវិទ្យាព័ត៌មាន។
ជាក់ស្តែង កាលពី៣០ឬ៤០ឆ្នាំមុន ពេលខ្លះ មានប្រាក់ហើយមិនដឹងជាទៅទិញរបស់របរនៅទីណាទេពីព្រោះការផ្សព្វផ្សាយ មានលក្ខណៈតូចចង្អៀត។ ប៉ុន្តែដោយសារទំនើបកម្មផ្នែកព័ត៌មានវិទ្យា មនុស្សសម័យថ្មីធ្វើការចាយវាយច្រើនជាងមុន។ ពីព្រោះគ្រប់ផលិតផលទាំងអស់ ក្រោយពីផលិតបានភ្លាម ត្រូវបានគេបញ្ជូនដំណឹងតាមរយៈបណ្តាញព័ត៌មានទៅដល់អ្នកប្រើប្រាស់។
ដំណឹងផ្សព្វផ្សាយពាណិជ្ជកម្មតាមប្រព័ន្ធផ្សព្វផ្សាយផ្សេងៗបាន អង្រួននិងចាប់បង្ខំទឹកចិត្តអ្នកប្រើប្រាស់អោយចំណាយទៅលើរបស់របរកាន់តែច្រើនឡើង។
អ្នកខ្លះ គ្រាន់តែចូលផ្សារមួយភ្លែត ចំណាយប្រាក់អស់ច្រើនរយដុល្លារឬច្រើនពាន់ដុល្លារមួយរំពេច។ អ្នកខ្លះទៀត បើកប្រាក់ខែទើបបានប៉ុន្មានថ្ងៃប៉ុណ្ណោះ ចូលហាងចាយវាយហូបចុកអស់ទៅវិញក៏មានដែរ។ រីឯគ្រួសារអ្នកមានខ្លះបានជិះយន្តហោះទៅប្រទេសក្រៅដើម្បីគ្រាន់តែ ទិញរបស់ប្រើប្រាស់សម្រាប់តុបតែងខ្លួនប្រាណប៉ុណ្ណោះ។
វត្តមាននៃម្ហូបអាហារបែបបរទេស ទូរស័ព្ទទំនើប ឡានទំនើប ផ្ទះទំនើប កុំព្យូទ័រទាន់សម័យ គ្រឿងអលង្ការនិងកន្លែងសប្បាយនានាបូកផ្សំនិងការផ្សព្វផ្សាយ ទាក់ទាញអន្ទងចិត្តទៀតផងនោះ អ្នកប្រើប្រាស់ណាក៏មិនអាចទប់អារម្មណ៏នេះបានដែរ។
អ្នកសេដ្ឋកិច្ចខ្លះបានវិភាគថា ការចាយវាយរបស់ប្រជាជនក្នុងប្រទេសមួយវានឹងចូលរួមចំណែករុញ ច្រានកំណើនសេដ្ឋកិច្ចរបស់ប្រទេសនោះពីព្រោះការចាយវាយកាន់តែច្រើន នាំអោយមានការផលិតកាន់តែច្រើន។ ហើយនៅពេលដែលមានការផលិតកាន់តែច្រើន ពេលនោះ ចលនាសេដ្ឋកិច្ចក៏ចេះតែកើនឡើងដែរ។ ផ្ទុយទៅវិញ ប្រសិនបើមនុស្សម្នាមិនសូវចាយ ពេលនោះ សេដ្ឋកិច្ចជាតិទាំងមូលក៏មិនសូវដំណើរដែរ។
ងាកមកនិយាយពីស្ថានភាពចំណាយរបស់ប្រទេសកម្ពុជាវិញ បើផ្អែកលើការពិត ប្រជាជនកម្ពុជានាសម័យបច្ចុប្បន្ននេះចាយវាយច្រើនជាងមុនឆ្ងាយណាស់។
តើការចាយវាយរបស់ប្រជាជនខ្មែរមានប្រយោជន៍សម្រាប់សេដ្ឋកិច្ចខែ្មរដែរឬទេ?
ជាការពិត ការចាយរបស់ប្រជាជនខ្មែរបានចូលរួមចំណែកអភិវឌ្ឍន៍សេដ្ឋកិច្ចខ្មែរ ខ្លះមែនប៉ុន្តែមិនច្រើនទេ ពីព្រោះថា ការចាយវាយរបស់ប្រជាជនខ្មែរបានហូរចេញទៅក្រៅប្រទេស ហើយនេះគឺដោយសារអ្នកប្រើប្រាស់ខ្មែរទិញផលិតផលបរទេសច្រើនជាង ផលិតផលខ្មែរ។ និយាយបែបផ្សេងមានន័យថា កម្ពុជាមិនបានផលិតគ្រប់គ្រាន់សម្រាប់ការប្រើប្រាស់ក្នុងស្រុក។ រដ្ឋមន្ត្រីក្រសួងទេសចរណ៍ធ្លាប់បានបញ្ជាក់ប្រាប់សារព័ត៌មានថ្មីៗថា ចំណូលពីវិស័យទេសចរណ៍ចំនួន២៥%ត្រូវបានធុះធ្លាយទៅវិញដោយសារតែការចំណាយទៅលើការទិញទំនិញបរទេស។
ដូច្នេះ ប្រសិនបើគេពិនិត្យលើចរន្តនេះ វាពិតជាមានន័យថា ការចាយវាយច្រើនរបស់ប្រជាជនខ្មែរនាសម័យថ្មីនេះមិនបានចូលរួមចំណែកលើកស្ទួយសេដ្ឋកិច្ចរបស់ខ្មែរច្រើនទេ។ ផ្ទុយទៅវិញ វាបានបម្រើសេដ្ឋកិច្ចបរទេសច្រើនជាងសេដ្ឋកិច្ចរបស់ខ្មែរ។
សរុបសេចក្តីមក ដើម្បីអោយប្រទេសកម្ពុជាទទួលបានផលពីសម័យកាលនៃការចំណាយច្រើន របស់ប្រជាជនខ្មែរនាសម័យថ្មីនេះ ប្រទេសកម្ពុជាត្រូវតែផលិតផលិតផលអោយបានច្រើនបំផុត ហើយប្រជាជនខ្មែរខ្លួនឯងត្រូវតែនាំគ្នាគាំទ្រផលិតផលរបស់ខ្លួន៕
© រក្សាសិទ្ធិដោយ thmeythmey.com
