កីឡាជាតិ
កីឡាករខ្មែរ សេន ប្រភស្សរៈ ចុះកិច្ចសន្យាជាមួយក្លិប Greater Lowell United FC របស់អាមេរិក
×![]()
សេន ប្រភស្សរៈ បោះជំហានមួយកម្រិតបន្ថែមទៀតក្នុងអាជីពបាល់ទាត់របស់ខ្លួន បន្ទាប់ពីកីឡាករកម្ពុជារូបនេះ បានចុះកិច្ចសន្យារយៈពេល១ឆ្នាំជាមួយក្លិប Greater Lowell United FC ដែលស្ថិតក្នុងក្របខណ្ឌលំដាប់ទីបួនសហរដ្ឋអាមេរិក National Premier Soccer League (NPSL)។
កាលពីថ្ងៃទី៣១ ខែមីនា ឆ្នាំ២០១៥ ក្លិប Greater Lowell United ដែលមានមូលដ្ឋាននៅក្រុង Lowell រដ្ឋ Massachusetts សហរដ្ឋអាមេរិក បានប្រកាសពីការចុះកិច្ចសន្យាជាមួយកីឡាករចំនួនថ្មីបីរូប ដែលក្នុងចំណោមនោះ មាន កីឡាករវ័យក្មេងរបស់កម្ពុជា សេន ប្រភស្សរៈ។
ធំធាត់នៅក្នុងប្រទេសកម្ពុជា ប្រភស្សរៈ ដែលជាកូនប្រុសរបស់លោកស្រី ប៉ុក សាណា អតីតមន្ត្រីសហព័ន្ធកីឡាបាល់ទាត់កម្ពុជា និងជាក្មួយរបស់អតីតខ្សែបម្រើជម្រើសជាតិ ប៉ុក ចាន់ថន បានទៅរស់នៅជាមួយឪពុករបស់ខ្លួននៅក្នុងទីក្រុង Lowell កាលពីអំឡុងខែសីហា ឆ្នាំ២០១៤ ។យុវជនវ័យ២១ឆ្នាំរូបនេះ បានចាកចេញពីប្រទេសកម្ពុជាទៅរស់នៅលើទឹកដីសហរដ្ឋអាមេរិកដោយបន្តការសិក្សាជំនាញផ្នែកបណ្តាញព័ត៌មានវិទ្យា (I.T Networking) ប៉ុន្តែរូបគេមិនអាចកាត់ផ្តាច់ពីនិស្ស័យបាល់ទាត់បាននោះឡើយ។
«មិត្តភក្ត្រអ៊ីរ៉ាក់ម្នាក់របស់ខ្ញុំ បានណែនាំខ្ញុំឲ្យជួបគ្រូជំនួយនៃក្លិប Greater Lowell United។ គ្រូរូបនោះ បានសាកសួរព័ត៌មានទាក់ទងនឹងការលេងបាល់របស់ខ្ញុំនៅកម្ពុជា។ ក្រោយការរៀបរាប់ គាត់បានឲ្យខ្ញុំចូលលេងក្នុងការប្រកួតមិត្តភាពមួយដែលស្ថិតក្នុងអាកាសធាតុក្រោម២អង្សាសេ។ ពួកគាត់មានការភ្ញាក់ផ្អើលចំពោះសមត្ថភាពរបស់ខ្ញុំ ហើយទីបំផុត ពួកយើងក៏ឈានទៅដល់ការចុះកិច្ចសន្យា»។ នេះជាការរៀបរាប់របស់ ប្រភស្សរៈ ពីក្រុងឡូវែល មកកាន់សារព័ត៌មានថ្មីៗ ។
ជាមួយនឹងការអះអាងថា រូបគេមានភាពស៊ាំនឹងការរស់នៅ រួមទាំងអាកាសធាតុនៅលើទឹកដីសហរដ្ឋអាមេរិកនោះ កីឡាករ សេន ប្រភស្សរៈ លើកឡើងថា៖ «ខ្ញុំនឹងរស់នៅជាមួយអាជីពជាកីឡាករបាល់ទាត់ ប្រសិនបើខ្ញុំចេះតែបន្តទទួលបានជោគជ័យ បើទោះបីជាខ្ញុំត្រូវរៀនជំនាញមួយទៀតសម្រាប់អនាគតរបស់ខ្ញុំក៏ដោយ»។
សេន ប្រភស្សរៈ គឺជាមិត្តដ៏ជិតស្និទ្ធរបស់ខ្សែបម្រើ ចាន់ វឌ្ឍនាកា នៃក្លិបបឹងកេតអង្គរ។ គេគឺជាសមាជិកនៃក្រុមជម្រើសជាតិអាយុក្រោម១៦ឆ្នាំក្នុងព្រឹត្តិការណ៍ AFC U-16 Championshipក្រោមការដឹកនាំរបស់គ្រូបង្វឹកជនជាតិជប៉ុន Teshima Atsushi កាលពីអំឡុងឆ្នាំ២០០៩ ។
បន្ទាប់ពីមក ដោយសារមានការណែនាំពីសំណាក់លោក ភា សុភ័ត្រា យុវជនរូបនេះ បានចូលលេងក្នុងក្លិបយុវជនព្រះខ័នរាជ (ឈ្មោះដើមរបស់ក្លិបស្វាយរៀង) ចន្លោះពីឆ្នាំ២០០៩ ដល់ឆ្នាំ២០១៣ ។ មុនទៅកាន់សហរដ្ឋអាមេរិក ប្រភស្សរៈ បានចំណាយពេល៦ខែនៅក្លិបភ្នំពេញត្រាយអាស៊ី ៦ខែនៅក្លិបភ្នំពេញក្រោន និងពាក់កណ្តាលរដូវកាលនៅក្លិប Albirex Niigata Phnom Penh។Greater Lowell United FC ត្រូវបានបង្កើតឡើងក្នុងឆ្នាំ២០១៣ ហើយបានចូលលេងនៅក្នុងក្របខណ្ឌ National Soccer League (NPSL) ចាប់ពីឆ្នាំ២០១៤ មក។ បើតាមប្រព័ន្ធពីរ៉ាមីតនៃបាល់ទាត់សហរដ្ឋអាមេរិក NPSL ស្ថិតក្នុងក្របខណ្ឌលំដាប់ទី៤ ។ សម្រាប់រដូវកាលឆ្នាំ២០១៥ Greater Lowell United FC ដែលមានកីឡដ្ឋានឈ្មោះ Cawley Memorial Stadium ត្រូវប្រជែងជាមួយក្រុម៦ផ្សេងទៀតក្នុងតំបន់ North Atlantic Conference។
សូមបញ្ជាក់ផងដែរថា ឡូវែល (Lowell) គឺជាក្រុងធំលំដាប់ទីបួនរបស់រដ្ឋម៉ាសាឈូសេត (Massachusettes) ដែលមានពលរដ្ឋជាង១០ម៉ឺននាក់។ កាលពីដើមឆ្នាំកន្លងមក លោក Rodney M.Elliottអភិបាលក្រុងឡូវែល បានមកបំពេញទស្សនកិច្ចនៅកម្ពុជា ហើយបានចុះអនុស្សារណៈនៃការយោគយល់រវាងសាលារាជធានីភ្នំពេញ និងក្រុងឡូវែល ស្តីពីការចងសម្ព័ន្ធភាពដើម្បីបង្កើនចំណងទាក់ទងលើវិស័យវប្បធម៌ អប់រំ និងសេដ្ឋកិច្ច។ ភ្នំពេញគឺក្រុងទីពីរដែលចងសម្ព័ន្ធភាពជាមួយក្រុងឡូវែល បន្ទាប់ពួកគេមានទំនាក់ទំនងជាមួយក្រុង Berdyansk នៃប្រទេសអ៊ុយក្រែនកាលពីឆ្នាំ១៩៩៧ ៕
© រក្សាសិទ្ធិដោយ thmeythmey.com
