អន្តរជាតិ
នយោបាយអន្តរជាតិ
×![]()
គណកម្មការរៀបចំការបោះឆ្នោតឯករាជ្យនីហ្សេរីយ៉ាបានប្រកាសជាផ្លូវការកាលពីម្សិលមិញថាបេក្ខជនបក្សប្រឆាំងនិងអតីតមេដឹកនាំយោធាលោកMuhammaduBuhariជាអ្នកឈ្នះការបោះឆ្នោតប្រធានាធិបតីកាលពីថ្ងៃអាទិត្យកន្លងទៅ។មេដឹកនាំបក្សប្រឆាំងរូបនេះនឹងក្លាយជាប្រធានាធិបតីនៃប្រទេសដែលមានប្រជាជនច្រើនជាងគេនៅអាហ្វ្រិកនិងត្រូវដោះស្រាយបញ្ហាប្រឈមជាច្រើនពិសេសក្រុមបូកូហារ៉ាម។
លោក មុំ ពិទូរ្យ លម្អិតព័ត៌មាននេះ
លទ្ធផលជាផ្លូវការបានបង្ហាញថាបេក្ខជនប្រធានាធិបតីមកពីបក្សប្រឆាំងលោកMuhammaduBuhariបានឈ្នះការបោះឆ្នោតប្រធានាធិបតីដ៏តានតឹងដែលរៀបចំឡើងកាលពីថ្ងៃអាទិត្យ។លទ្ធផលនៃការបោះឆ្នោតនេះត្រូវបានប្រកាសជាផ្លូវការដោយគណកម្មការរៀបចំការបោះឆ្នោតឯករាជ្យនីហ្សេរីយ៉ា។
ក្រោយប្រកាសលទ្ធផលគេឃើញប្រធានាធិបតីលោកGoodluck Jonathan ដែលផុតអាណត្តិនិងជាដៃគូប្រជែងក្នុងការបោះឆ្នោតនេះដែរ បានទូរស័ព្ទទៅកាន់លោកBuhariដើម្បីអបអរសាទរជ័យជម្នះនេះហើយលោកJonathan បានចេញមុខប្រកាសជាសាធារណៈពីការបរាជ័យរបស់លោកក្នុងការបោះឆ្នោតនេះផងដែរ។
គេមិនរំពឹងថាក្រោយការបោះឆ្នោតបញ្ហាហិង្សាគ្មានការទទួលលទ្ធផលបោះឆ្នោតនឹងមិនអាចកើតមានឡើងជាថ្មីនោះទេព្រោះភាគីទាំងពីរបានឯកភាពគ្នារួចរាល់តាំងពីមុនបោះឆ្នោតហើយថាទោះជាលទ្ធផលបែបណាក៏ដោយពួកគេនឹងទប់ស្កាត់ហិង្សានិងគោរពលទ្ធផលបោះឆ្នោតនេះ។
តាមពិតទៅដើម្បីឈ្នះការបោះឆ្នោតជាប្រធានាធិបតីបេក្ខជនត្រូវតែរកសម្លេងគាំទ្រទូទាំងប្រទេសអោយបានយ៉ាងតិច៥០ភាគរយនៃសម្លេងឆ្នោតទាំងអស់រួមជាមួយសម្លេងគាំទ្រ២៥ភាគរយផ្សេងទៀតនៃសម្លេងឆ្នោតសរុបក្នុងចំណោម២ភាគ៣នៃរដ្ឋទាំងអស់។បើតាមគណកម្មការបោះឆ្នោតលោកBuhariបានទទួលសម្លេងគាំទ្រច្រើនជាង២៥ភាគរយក្នុងសម្លេងឆ្នោតសរុបក្នុងរដ្ឋ២៤នៃប្រទេសនីហ្សេរីយ៉ា។
ជុំវិញការបោះឆ្នោតនេះអ្នកវិភាគអះអាងថាមូលហេតុដែលប្រធានាធិបតីជិតផុតអាណត្តិរបស់នីហ្សេរីយ៉ាបរាជ័យក្នុងការបោះឆ្នោតនេះក៏ដោយសារតែរបបដឹកនាំរបស់លោកមិនអាចដោះស្រាយបញ្ហាសន្តិសុខដែលបង្កឡើងដោយក្រុមភេរវជនបូកូហារ៉ាមបានក្នុងពេលកន្លងមក។ប្រជាជននីហ្សេរីយ៉ាត្រូវការមេដឹកនាំដែលអាចមានសមត្ថភាពដោះស្រាយបញ្ហាសន្តិសុខដែលគំរាមកំហែងសុវត្ថិភាពនិងអាយុជីវិតប្រជាជនស្លូតត្រង់បាន។
យ៉ាងណាក៏ដោយក្នុងការបោះឆ្នោតលើកនេះគេសង្កេតឃើញមានវត្តមានអ្នកសង្កេតការណ៍របស់សហភាពអាហ្វ្រិកនិងអង្គការសហប្រជាជាតិដែលពួកគេជាអ្នកឃ្លាំមើលនិងធានាថាការបោះឆ្នោតមានលក្ខណៈត្រឹមត្រូវសេរីនិងយុត្តិធម៌ផងដែរ។ប៉ុន្តែនៅតំបន់ខ្លះប្រជាជនបានចេញមុខបាតុកម្មតវ៉ាថាការបោះឆ្នោតមានការកេងបន្លំសន្លឹកឆ្នោតនិងមិនមានភាពត្រឹមត្រូវនោះឡើយ៕
© រក្សាសិទ្ធិដោយ thmeythmey.com
