ពិភពតារា៖ ស្រីណយសូមមិនធ្វើដូចតារាចម្រៀងដទៃ
×
ភ្នំពេញ៖ តារាចម្រៀងវ័យក្មេង កញ្ញា ណយ ដែលធ្លាប់តែច្រៀងបទ មនោសញ្ចេតនា ក៏កំពុងតែត្រៀមចេញ បទចម្រៀងញាក់ ក្នុងពេលឆាប់ៗនេះ ប៉ុន្តែបែរជាប្រាប់ឲ្យដឹងថា នាងសូមមិនធ្វើដូចតារាចម្រៀងដទៃដែលបង្កើតក្រុមរាំកំដរឆាកនោះទេ ។
តារាចម្រៀងស្រីវ័យ ជាង២១ឆ្នាំ មានឈ្មោះពិតថា សែម ស្រីណយ បានប្រាប់ឲ្យដឹងពីការងារក្នុងអាជីពចម្រៀងរបស់នាងថា ពេលនេះនាងរវល់ថតបទចម្រៀងវ៉ុលថ្មីថត MV សម្រាប់បម្រើអារម្មណ៍ទស្សនិកជន និងមិត្តៗយុវវ័យ ។ ក្នុងពេលឆាប់ៗខាងមុខនេះ ខាងផលិតកម្មក៏ត្រៀមនិពន្ធបទចម្រៀងជាចង្វាក់ញាក់ ផ្លាស់ប្តូរស្ទីល ក្នុងការបកស្រាយបទចម្រៀងរបស់នាងដែរ។ ម្យ៉ាងខាងផលិតកម្មក៏ចង់ធ្វើតម្រូវចិត្តយុវវ័យសម័យនេះ ថែមទៀតផង ។
តារាចម្រៀង ប្រចាំផលិតកម្ម Big Man រូបនេះ បានប្រាប់ឲ្យដឹងថា នៅពាក់កណ្តាឆ្នាំនេះ នាងត្រៀមស្ទីលថ្មី ធ្វើឲ្យប្លែកអារម្មណ៍ ។ នាងបញ្ជាក់ថា ធម្មតាជាតារាសម្រាប់មហាជន មិនត្រូវមានស្ទីលដដែលៗទេ ត្រូវតែមានអ្វីប្លែកជានិច្ច។ សូម្បីតែការបកស្រាយបទចម្រៀងក៏ដូចគ្នាដែរ ត្រូវតែរកអ្វីដែលថ្មី ហើយពេលនេះ ខាងផលិតកម្មក៏កំពុងតែរៀបចំបទចម្រៀងជាចង្វាក់ថ្មី សម្រាប់នាង ដែលមិនធ្លាប់មានពីមុន គឺការបកស្រាយបទបែបចម្រៀងចង្វាក់ញាក់។ នាងអះអាងថា បទត្រៀមចេញនេះ ធានាថាថ្មី ហើយប្លែកសម្រាប់ទស្សនិកជន ។
នៅពេលដែលសួរដល់ចំណុចដែលតារាដទៃគិតថា អាចស្រូបបានការគាំទ្របន្ថែម ទាក់ទងនឹងការបង្កើតក្រុមរាំនោះ កញ្ញា ណយ បានប្រាប់ឲ្យដឹងថា “ខ្ញុំមានដុង(ទេពកោសល្យ) ខាងរាំច្រើនគួរសម ប៉ុន្តែខ្ញុំអត់ចង់បង្កើតក្រុមរាំ ដូចតារាចម្រៀងប្រុសស្រីផ្សេងនោះទេ ព្រោះខ្ញុំចូលចិត្តធ្វើម្នាក់ឯង គិតថាល្អ ហើយការរាំនោះ ប្រហែលជាអាចមានដៃគូរាំជាមួយម្នាក់តែប៉ុណ្ណោះ ។ មិនមែនជាលក្ខណៈក្រុមដូចតារាដទៃទេ ។ ខ្ញុំនិយាយបែបនេះមិនមែនចង់មានន័យប៉ះពាល់លើអ្នកសិល្បៈដូចគ្នាទេ តាមពិតទៅតារាគ្រប់រូបតែងតែមានស្ទីលផ្សេងប្លែកៗពីគ្នា មិនដូចគ្នាទេ។ ដូច្នេះហើយបានជាខ្ញុំចង់ធ្វើឲ្យប្លែកខុសពីគេ ហើយក៏មិនចង់បង្កើតក្រុមរាំផ្ទាល់ខ្លួនដែរ គឺខ្ញុំចង់ធ្វើគ្រប់យ៉ាងដោយខ្លួនឯង ខ្ញុំសង្ឃឹមថា ទស្សនិកជននឹងបន្តគាំទ្រខ្ញុំកាន់តែច្រើនខ្លាំងជាងនេះបន្ថែមទៀត ” ៕
© រក្សាសិទ្ធិដោយ thmeythmey.com