នេះគឺបទ "I can’t stop loving you" ។ បទនេះជាស្នាដៃនិពន្ធ ទំនុកច្រៀងបទភ្លេង និងច្រៀងដោយលោក Don Gibson។ កាលពីគ្រាដំបូង បទចម្រៀងនេះ ត្រូវបានថតនៅថ្ងៃទី ៣០ ខែធ្នូ ឆ្នាំ ១៩៥៧ និងបានចេញលក់នៅឆ្នាំ ១៩៥៨ ។ I can’t stop loving you គឺជាបទចម្រៀងប្រភេទ Country Music ដែលទទួលបានការចាប់អារម្មណ៍ពីអ្នកស្តាប់យ៉ាងច្រើនលើសលប់នាសម័យនោះ។ សូមបញ្ជាក់ថា Country Music គឺជាប្រភេទតន្ត្រីម្យ៉ាងរបស់បទភ្លេងប្រជាប្រិយអាមេរិកាំង ដែលមានដើមកំណើតនៅ ភាគខាងត្បូងសហរដ្ឋ អាមេរិកនៅទសវត្សរ៍ឆ្នាំ ១៩២០ ។
នៅឆ្នាំ ១៩៥៨ ដដែលបទចម្រៀង "I can’t stop loving you" ត្រូវបានផលិតឡើងសារថ្មី និងត្រូវបានច្រៀងដោយអ្នកចម្រៀងឈ្មោះ Kitty Wells។ បទចម្រៀងនេះ បានជាប់ចំណាត់ថ្នាក់លេខ៣ ក្នុងតារាង U.S. Billboard Hot Country Singles។
៤ឆ្នាំក្រោយមកទៀត គឺនៅឆ្នាំ ១៩៦២ អ្នកចម្រៀងអាមេរិកាំងឈ្មោះ Ray Charles បានយកបទចម្រៀងនេះមកច្រៀងសារជាថ្មីម្តងទៀត។ បទ I can’t stop loving you របស់ Ray Charles បានជាប់ចំណាត់ថ្នាក់លេខ១ ក្នុងតារាង U.S. Billboard Hot 100 តារាង U.S. Billboard R&B single តារាង U.S. Billboard Adult Contemporary តារាង UK Single Chart តារាង Australian Singles Chart និងជាប់ចំណាត់ថ្នាក់ លេខ៤ ក្នុងតារាង Norwegian Singles Chart។
នៅដើមទសវត្សរ៍ឆ្នាំ ១៩៧០ ភាពល្បីល្បាញរបស់បទ I can’t stop loving you បានរសាត់មកដល់កម្ពុជា ។ អ្នកស្រី រស់ សេរីសុទ្ធា បានច្រៀងបទចម្រៀងមួយបទដែល ស្រដៀងគ្នានឹងបទ I can’t stop loving you ។ បទនោះមានចំណងជើងថា “ឈប់ស្រឡាញ់មិនបាន។
បទចម្រៀង I can’t stop loving you គឺជាបទចម្រៀងដ៏ល្បីល្បាញរបស់ពិភពលោក។ អ្នកចម្រៀងស្ទើរគ្រប់ជាតិសាសន៍រាប់រយនាក់ បានយកបទចម្រៀងនេះទៅច្រៀង ចាប់តាំងពីពាក់កណ្តាលសតវត្សរ៍ទី២០ រហូតមកដល់ដើមសតវស្សរ៍ទី២១នេះ។