ជាតិ
«ខ្លោងទ្វារអង្គរសង្ក្រាន្ត» មានហេតុផលដែលទទួលយកបាន និងមានកន្លែងខ្លះដែលត្រូវកែលំអ
× ប្រធានបទស្តីពី "ខ្លោងទ្វារអង្គរសង្ក្រាន្ត" កំពុងតែក្លាយជាបញ្ហាដ៏ចម្រូងចម្រាស់នៅក្នុងស្រទាប់អ្នកលេង Facebook និងមហាជនទូទៅ។ ខ្ញុំសូមចូលរួមយោបល់បន្តិច ក្នុងនាមជាអ្នកជំនាញ ជាប្រជាពលរដ្ឋ និងជាសមាជិកដែលបានចូលរួមជួយរៀបចំអង្គរសង្ក្រាន្តឆ្នាំនេះ។ ចំពោះបញ្ហានេះ ថ្នាក់ដឹកនាំក្រសួងវប្បធម៌ ស.ស.យ.ក និងអាជ្ញាធរអប្សរា បាន និងកំពុងយកចិត្តទុកដាក់យ៉ាងខ្លាំងផងដែរ ដើម្បីទទួលយកការរិះគន់ក្នុងន័យស្ថាបនា។
ខាងក្រោមនេះគឺគ្រាន់តែជាការសង្កេតរបស់ខ្ញុំប៉ុណ្ណោះ...
- ចំពោះក្បាច់លំអ ៖
១. ក្បាច់លំអដែលប្រើចំពោះផ្តែរ (ធ្នឹម)៖ គឺជាក្បាច់ចង្វាយ ដែលមានប្រើប្រាស់តាំងពីសម័យមុនអង្គរ អង្គរ ក្រោយអង្គរ រហូតដល់ពេលបច្ចុប្បន្ន។
២. ក្បាច់នៅសសរមានក្បាច់៣តម្រៀបគ្នា ៖ ក . ក្បាច់ខាងលើ និងក្បាច់ខាងក្រោម (រាង៤ជ្រុង) លំអដោយក្បាច់ត្របកឈូកអង្គរ ឬមានសណ្ឋានជាក្បាច់សន្លឹកចកបំបែក ដែលមានប្រើនៅក្នុងសម័យអង្គរ (នៅចំកណ្តាលសន្លឹកទ្វារ និងទ្វារបញ្ឆោតនីមួយ) ។ ខ . នៅតួសសរ (រាងចតុកោណកែង) លំអដោយក្បាច់ភ្ញីនៅពីខាងក្នុង ដែលជាទូទៅគេប្រើសម្រាប់លំអតាមហោជាង នាសម័យក្រោយអង្គរ។
៣. ដំបូលខាងលើ ៖ គឺមានសណ្ឋានដូចជារូបឆ័ត្រ ដែលយកលំនាំតាមឆ័ត្រសម្រាប់បាំងព្រះមហាក្សត្រ (ដែលមាននៅលើចម្លាក់ប្រាសាទអង្គរវត្ត បាយ័ន្ត និងបន្ទាយឆ្មារ...)
៤. ដងឬដៃស្នា (លំនាំច្នៃ)៖ ជាទូទៅយើងឃើញមានលំអតាមសំណង់អាគារសម័យក្រោយៗ ជាពិសេសគឺស.វទី១៩ ដល់ពេលបច្ចុប្បន្ន (ផ្ទះបុរាណ វត្តអារាម និងអាគាររដ្ឋបាលជាដើម...។ល)
៥. រូបសត្វពពែ ៖ ជាសត្វតំណាងឆ្នាំ មមែ ដែលផ្តល់សិរីសួស្តី ជ័យមង្គល បវរមហាប្រសើរ ជូនដល់ព្រះមហាក្សត្រ ថ្នាក់ដឹកនាំ និងប្រជាពលរដ្ឋខ្មែរទាំងក្នុង និងក្រៅប្រទេស ជាពិសេសគឺអ្នកដែលចូលរួមព្រឹត្តិការណ៍នៅតំបន់អង្គរតែម្តង។
៦. អក្សរ ៖ " អង្គរសង្ក្រាន្ត " យកគម្រូតាមអក្សរដែលខ្មែរបានប្រើប្រាស់តាំងពីយូរយារណាស់មកហើយ។
- ការប្រើប្រាស់ពណ៌ ៖
រហូតមកដល់ពេលនេះ យើងពិតជាមិនបានដឹងថា តើខ្មែរសម័យមុន (ជាពិសេសសម័យអង្គរ) ពេលគេកសាងសំណង់ប្រាសាទហើយ តើគេប្រាស់ប្រាស់ពណ៌អ្វីខ្លះក្នុងការតុបតែងលំអសម្ភារៈសំណង់។ ប៉ុន្តែ យោងតាមការស្រាវជ្រាវ យើងឃើញមានពណ៌មួយចំនួនត្រូវបានប្រើប្រាស់លើវត្ថុសិល្បៈ និងលាបតាមជញ្ជាំងប្រាសាទ និងវត្តអារាមគឺ៖ ពណ៌ក្រហម ទឹកមាស លឿងទុំ ស បៃតង និងម្រ័គ...។ ចំពោះសំណង់សាសនាភាគច្រើនគឺប្រជាជនខ្មែរបានប្រើពណ៌លឿង ស ក្រហម និងទឹកមាស(សម្រាប់លំអកន្លែង ឬដើម្បីរំលេចក្បាច់សំខាន់)
- ទម្រង់និងការបង្ហាញក្លោងទ្វារអង្គរសង្ក្រាន្ត២០១៥ ៖
ជាទូទៅ ការបង្ហាញទម្រង់ជាក្លោងទ្វារដែលមានក្បាច់លំអបញ្ចូលគ្នាគឺ តាំងពីសម័យអង្គរ ក្រោយអង្គរ និងស.វទី១៩ លំអនៅតាមផ្តែរ និងសសរទាំងពីរ។
- ចំណុចខ្វះខាតមួយចំនួនដែលត្រូវបន្ថែមដូចជា ( បើសិនជាអាច )៖
ក. ក្បាច់ដែលប្រើចំពោះសសរទាំងពីរ គួរតែបន្ថែមអោយច្រើនជាងនេះ (ដោយមានក្បាច់ចិញ្ចៀន ឬក្បាច់ពងត្រីលំអនៅតាមចន្លោះក្បាច់ក្បាលសសរ តួសសរ និងជើងសសរ) ហើយបើសិនជាអាចទៅរួចគួរតែប្តូរក្បាច់ចង្វាយ (ដែលប្រើនៅលើផ្តែ មកជំនួសក្បាច់ភ្ញីវិញ)
ខ. ក្បាច់នៅផ្តែខាងលើ អាចប្រើប្រាស់ក្បាច់សន្លឹកអង្គរបំបែកចំហៀងមកជំនួសវិញ ឬបន្ថែមជារូបអប្សរារាំ។
គ. ចំពោះក្បាច់លំអសំខាន់ៗ គួរប្រើពណ៌មាសជំនួសវិញ ហើយផ្ទៃខាងក្រោយអាចជ្រើសរើសពណ៌ផ្សេងក៏បាន ជាពិសេសពណ៌ក្រហម។ សូមបញ្ជាក់ថា ជញ្ជាំងរបស់ប្រាសាទអង្គរវត្ត និងប្រាសាទមួយចំនួននៅតំបន់អង្គរ និងទូទាំងប្រទេស ក៏មានប្រើប្រាស់ពណ៌ក្រហម ដើម្បីលាបលើផ្ទៃជញ្ជាំងដែរ។
ជាសរុបរួម រហូតមកដល់ពេលនេះក្រុមការងារបច្ចេកទេស និងគណៈកម្មការរៀបចំព្រឹត្តិការណ៍អង្គរសង្ក្រាន្ត នៅមិនទាន់សម្រេចយកជាផ្លូវការឡើយ (រូបភាពដែលបងប្អូនបានឃើញ) ព្រោះនៅសល់កន្លែងមួយចំនួនដែលត្រូវកែលំអ និងតុបតែងបន្ថែម។ ហេតុនេះហើយ សូមមេត្តាបងប្អូនជ្រាបដំណឹង៕
អត្ថបទ៖ លោក ចិន្ត ច័ន្ទរតនា ក្នុងនាមជាអ្នកជំនាញ ជាប្រជាពលរដ្ឋ និងជាសមាជិកដែលបានចូលរួមជួយរៀបចំអង្គរសង្ក្រាន្តឆ្នាំនេះ
© រក្សាសិទ្ធិដោយ thmeythmey.com