ពិភពតារា៖ រ៉េយ៉ា បង្ហើបថា ភាពសិចស៊ីជារឿងបន្ទាប់បន្សំមួយដែរ
× ភ្នំពេញ៖តារាសម្តែងវ័យក្មេង និយមស្លៀកពាក់សិចស៊ី នាង ដួង រតនា ហៅរ៉េយ៉ា ដែលលេចវត្តមានក្នុងខ្សែវីដេអូភាគ រឿង “ល្បងស្នេហ៍ ពិសោធចិត្ត” បានបង្ហើបឲ្យដឹងថា នៅពេលដែលសួរថា ការស្លៀកពាក់សិចស៊ី វាជារឿងមួយបន្ទាប់បន្សំដែរ ប៉ុន្តែគឺសិចស៊ីត្រឹមតែទស្សនិកជនទទួលយកបាន ខ្ញុំមិនហ៊ានសិចស៊ីឲ្យលើសពីនេះទេ ត្បិតអីមានមេរៀនច្រើនមកហើយ ដែលសិល្បៈរៀមច្បងរងទទួលការរិះគន់ពីមហាជននោះ។
ដោយសារ មានអំណោយផលពីធម្មជាតិនូវសម្រស់ដ៏ផូរផង់ បានស្ទួយឲ្យអ្នកសម្តែងថ្មោងថ្មីរូបនេះ ទទួលបានការងារសិល្បៈជាបន្តបន្ទាប់។ លើសពីនេះ រ៉េយ៉ា ក៏ជាអ្នកសម្តែង ដែលលេងខ្លួនមិនសំចៃដែរ ជាមួយនឹងសម្លៀកបំពាក់ឈុតរ៉ូបពណ៌ខ្មៅ វៀលកចំហទ្រូង លេចដើមទ្រូងដ៏ស្រស់ស្អាតគួរឲ្យគយគន់។
អ្នកសម្តែង ដែលបានរសាត់ខ្លួនមកពីតំបន់ជាយដែន នៃទឹកដីខេត្តបន្ទាយមានជ័យរូបនេះ មានការចាប់អារម្មណ៍ជាខ្លាំង ពីផលិតកម្មភាពយន្តមួយចំនួន ទោះបីជា នាងទើបតែប្រឡូក ក្នុងសិល្បៈបានជាង២ឆ្នាំក៏ដោយ។ មិនតែប៉ុណ្ណោះ សម្រស់ដ៏គួរឲ្យទាក់ទាញរបស់នាង ធ្វើឲ្យអ្នកកាសែតចោមរោមថតរូបនាង កាលពីពេលកន្លងទៅថ្មីៗនេះ។
ក្នុងជំនួបជាមួយ “ថ្មី”កាលពីពេលកន្លងទៅ រ៉េយ៉ា បានរៀបរាប់ពីដំណើរការងារសិល្បៈសព្វថ្ងៃថា នាងកំពុងមមាញឹកក្នុងការថតខ្សែភាពយន្តភាគ ឲ្យបណ្តាស្ថានីយ៍ទូរទស្សន៍ ក្នុងតំណែងជាតួឯកឆ្នាសឆ្នើម។ នាងបាននិយាយថា “ចាស៎បង! មមាញឹកខ្លះដែរការងារសិល្បៈ ដោយសព្វថ្ងៃនេះ ខ្ញុំកំពុងជាប់រវល់ថតរឿងភាគឲ្យទូរទស្សន៍ ក្នុងតំណែងជាតួឯកឆ្នាសមួយរូប ។
នៅពេលដែលសួរថា តើការស្លៀកពាក់សិចស៊ី ជាចំណុចចម្បងដែល រ៉េយ៉ា ត្រូវកសាងភាពល្បីល្បាញក្នុងពិភពសិល្បៈមែនទេ? នាងឆ្លើយថា “វាជារឿងមួយបន្ទាប់បន្សំដែរ ប៉ុន្តែយើងសិចស៊ីត្រឹមតែទស្សនិកជនទទួលយកបាន ខ្ញុំមិនហ៊ានសិចស៊ីឲ្យលើសពីនេះទេ ត្បិតអីមានមេរៀនច្រើនមកហើយ ដែលសិល្បៈរៀមច្បងរងទទួលការរិះគន់ពីមហាជននោះ។
កូនក្រមុំអ្នកប៉ោយប៉ែតរូបនេះ បានរំលឹកពីដំណើរចូលសិល្បៈលើកដំបូងឲ្យដឹងថា នាងបានចូលរួមប្រលងក្នុងកម្មវិធី ស្រីឆ្នើម ប្រុសឆ្លាត របស់ស្ថានីយទូរទស្សន៍ស៊ីធីអិន នៅអំឡុងឆ្នាំ ២០០៩-២០១០ ប៉ុន្តែមានវាសនាបានជាប់ត្រឹម វគ្គ១០នាក់ចុងក្រោយប៉ុណ្ណោះ។ បន្ទាប់ពីនោះមក រ៉េយ៉ា បានធ្វើតេស្តសម្លេងចូលច្រៀងនៅផលិតកម្មស្ទឹងសែន ប៉ុន្តែដោយសារផលិតកម្មមានការរអាក់រអួលក្នុងការផលិត នាងក៏បានផ្អាកទៅវិញ។ ក្រោយមកទៀត នាងបានចូលរួមសម្តែង និងរាំ Shoowឲ្យផលិតកម្មមួយចំនួនសម្រាប់បុណ្យចូលឆ្នាំខ្មែរ។
លុះដល់ឆ្នាំ២០១២ នាងបានទៅធ្វើតេស្តសម្តែងនៅស្ថានីយទូរទស្សន៍បាយ័ន ហើយក៏បានជាប់ក្នុងការសម្តែងរឿងភាគ ដែលមានចំណងជើងថា “ល្បងស្នេហ៍ ពិសោធចិត្ត”៕
© រក្សាសិទ្ធិដោយ thmeythmey.com