ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
ជាតិ
ប្រពៃណីព្យួរគោម ពេលចូលឆ្នាំខ្មែរ ប្រភព អ្នកស្រី កែវ ច័ន្ទបូរណ៍
14, Apr 2017 ,
5:59 pm
រូបភាព
×
ដោយ:
ថ្មីៗ
ហេតុអ្វីខ្មែរយើងចូលចិត្តព្យួរគោម ពេលចូលឆ្នាំ? មូលហេតុគឺ ៖
១-
ថ្ងៃប្រារព្ធចូលឆ្នាំខ្មែរ ស្ថិតនៅរដូវក្តៅហើយស្ងួតបំផុត ពិបាកដើរលេងពេលថ្ងៃ ទើបគេបង្កើតប្រពៃណីព្យួរគោម បំភ្លឺសម្រាប់ធ្វើបុណ្យពេលយប់ អោយមនុស្សបានមើលផ្លូវ នឹងបានដើរលេងសប្បាយ ជុំគ្នា ដោយមិនមានអសន្តិសុខ។
២-
ដើម្បីលំអលំនៅឋាន អោយមានសោភ៌ណភាពចិញ្ចាចចញ្ចែង ប្រកបដោយមង្គល គួរជាទីរមនាដួងចិត្ត។
៣-
ដើម្បីជាសក្ខីភាពពរជ័យទេវតាប្រស់ព្រំ ពីលើមេឃ មកលើជីវិតមនុស្សលើដី អោយប្រជាពលរដ្ឋគ្រប់គ្នា បានទទួលនូវរាសីជោគជតា ល្អពណ្ណរាយរុងរឿង ក្នុងឱកាសពេលបុណ្យនេះ។
៤-
ដើម្បីជាពន្លឺប្រកាស ដាស់ហៅព្រលឹងដូនតា អោយមកចូលរួមប្រារព្ធបុណ្យចូលឆ្នាំជាមួយកូនចៅ ជួបជុំគ្នា ហើយអោយមកប្រស់ព្រំកូនចៅ អោយបានរស់នៅត្រជាក់ត្រជុំ ចាកផុត ពីភាពរាំងស្ងួត ក្រីក្រ ខ្វះខាត យល់តែភាពសំបូរសប្បាយ ត្រកុំត្រកាលជានិច្ច។
តើគេព្យួរគោមមានរចនាបថដូចម្តេចខ្លះ?
១-
គោមបុរាណ ច្រើនធ្វើពីសំពត់ស្បៃសស្តើងៗ មានឆ្អឹងគោម ដែលគេពត់ជារាងផ្កាយ រាងមួល បួនជ្រុង ឬ៨ជ្រុងដោយមានរចនាអោយមានជា រាងកន្ទុយនាគ កន្ទុយត្រី មេអំបៅ ឬមានគូរក្បាច់ផ្សេងៗ នៅលើផ្ទាំងក្រណាត់ទាំងនេះ ថែមទាំងមានដាក់ចានខ្លាញ់ត្រី នៅចំកណ្តាល សម្រាប់អុជបំភ្លឺ។ នៅពេលអុជមក គោមនឹងមានពន្លឺភ្លើង ក្រហមលឿងព្រឿងៗ ចាំងជះទៅលើទិដ្ឋភាពដីភូមិ ក្នុងលក្ខណៈស្រទន់ប្រកបដោយមនោសញ្ចេតសន្តិភាព។
២-
នៅសម័យមានអគ្គីសនី ខ្មែរយើងបាននិយមប្រើ គោមដែលមានខ្សែចងភ្ជាប់គ្នាជាជួរ មានរចនាបថនិងពណ៌ប្លែកៗ ទៅតាមចំណង់ចំណូលចិត្តរៀងៗខ្លួន។ មានកាលខ្លះ គេប្រើគោមទោលមួយ ដែលមានទំហំធំជាងគេ ព្យួរនៅមុខខ្លោងទ្វារផ្ទះ ឬនៅចំកណ្តាលដីធ្លាភូមិ សម្រាប់ទុកជាតំណាងបណ្តូលនៃការជួបជុំប្រារព្ធបុណ្យចូលឆ្នាំ។
តើគេត្រូវប្រយ័ត្នប្រយែងយ៉ាងណាខ្លះ ក្នុងការព្យួរគោមបំភ្លឺលំនៅឋាន?
១-
នៅសម័យដើម គេច្រើនដុតខ្លាញ់ត្រី ដើម្បីបំភ្លឺគោម ដូច្នេះគេត្រូវព្យួរគោម នៅឆ្ងាយពីផ្ទះ កុំអោយខ្យល់វាយធ្លាក់ឆេះផ្ទះ។ ភាគច្រើនគេព្យួរ នៅចំកណ្តាលដីភូមិ ឬនៅតាមផ្លូវ កន្លែងដែលមានចរាចរ មនុស្សដើរទៅមកច្រើនជាងគេ។
២-
នៅសម័យប្រើអគ្គីសនី គេច្រើនប្រយ័ត្ន នៅពេលគេតខ្សែភ្លើង កុំអោយមនុស្សដើរជាន់ឆក់ស្លាប់បាត់បង់ជីវិត។ ជាពិសេស គេរិតតែធ្វើការប្រយ័ត្នជាមុនថែមទៀត សម្រាប់ការពារ នៅពេលមានភ្លៀង ឬ នៅក្បែរទឹកស្រះជាដើម។
៣-
គេត្រូវព្យួរគោម អោយផុតជំហរមនុស្ស ដើម្បីកុំអោយប៉ះក្បាល ឬ កុំអោយមនុស្សឈោងចាប់លេង នាំមានគ្រោះថ្នាក់។
តើភស្តុតាងបវេណីនៃការព្យួរគោមនេះ មាននៅក្នុងសង្គមខ្មែរ មានអ្វីខ្លះ?
១-
ចំពោះអ្នកដែលមានជំនឿអរូបីបែបបុរាណនិយម គេយល់ថា មនុស្សលើលោក សុទ្ធតែទទួលឥទ្ធិពល ពីផ្កាយ ភពគ្រោះ មានភពអាទិត្យ ច័ន្ទ អង្គារ ពុធ ព្រហស្បត្តិ៍ សុក្រនិងសៅរ៍ ជាដើម ហើយមាន ការចែកវេនគ្នា បំភ្លឺពេលថ្ងៃនិងយប់។ នៅពេលណា មនុស្សលោកបាត់បង់ពន្លឺ ពីភពទាំងនេះ គេរស់នៅពុំមានសិរីមង្គលឡើយ។ ដោយសារជំនឿនេះ គេបានសាងគោម មានរាងមូល ឬរាងផ្កាយ ទៅតាមរូបរាងនៃភពទាំងនេះ ដែលគេមើលឃើញដោយភ្នែក ដោយមានដាក់ប្រេង ឬខ្លាញ់ត្រីអុជបំភ្លឺ នៅពេលណា ភពជីវិតរបស់គេប្រែងងិត មើលអ្វីមិនឃើញ។ គេច្រើនប្រើគោម ដោយមានរចនាបថប្លែកៗ ទៅតាមចំណូលចិត្តរបស់អ្នកស្រុកអ្នកភូមិ ដើម្បីព្យួរ បំភ្លឺនៅពេលមានបុណ្យទាន ដូចជានៅពេលចូលឆ្នាំ បុណ្យអុំទូក វិសាខបូជា មាឃបូជាជាដើម។ គេច្រើនបង្ហោះគោម នៅពេលប្រារព្ធបុណ្យអុំទូក បណ្តែតប្រទីប ព្រោះរដូវនេះដីនៅសើម សំបូរភ្លៀងច្រើន បើគោមធ្លាក់មកលើដី មិនសូវមានគ្រោះថ្នាក់ឆេះផ្ទះ។ ម្យ៉ាងទៀត គេច្រើនបង្ហោះគោម តែនៅតំបន់មាត់ទឹកប៉ុណ្ណោះ ដូចជានៅទន្លេសាប និងទន្លេបួនមុខជាដើម។
២-
ខ្មែរបុរាណចូលចិត្តនិពន្ធបង្កើតរឿងព្រេងប្លែកៗ និទានតៗគ្នា ដើម្បីជាការផ្សារភ្ជាប់មនោសញ្ចេតនា រវាងមនុស្សនិងបវេណីរបស់ខ្លួន និងដើម្បីអោយក្មេងជំនាន់ក្រោយងាយចងចាំផង។ ឧទាហរណ៍ ដូចជា នៅក្នុងរឿង ការប្រកួតរវាងបុរសស្ត្រី ក្នុងការសង់ប្រាសាទបន្ទាយស្រី និងបន្ទាយសម្រែ ដោយប្រឌិត អោយស្ត្រីនាំគ្នាចងគោមមានរូបផ្កាយនៅពេលកណ្តាលអធ្រាត្រ ដើម្បីបន្លំភ្នែកផ្នែកបុរស ថាជាផ្កាយព្រឹក អោយខាងបុរសចូលដេកមុនអស់ទៅ នៅពេលផ្នែកស្ត្រីនៅបន្តការងារ ក្រោមពន្លឺគោមផ្កាយនោះ រហូតដល់ពេលផ្កាយព្រឹក មែនទែនរះឡើងបំភ្លឺលោកជាដើម។
៣- សូមចំណាំ៖
គោមដែលគេអុជបង្ហោះ នៅរដូវចេញវស្សា ច្រើនជាគោមមានរាងមូលទ្រវែង ឬ រាងជាធុងបួនជ្រុង មានបន្តោងចង្កៀងខ្លាញ់ នៅចំកណ្តាល។ ចំណែកចង្កៀងគោម ដែលគេច្រើនអុជបំភ្លឺកណ្តាលធ្លាភូមិ ក្នុងពេលបុណ្យ ឬសម្រាប់ដាក់តាំងនៅក្លោងទ្វារចូល ច្រើនមានរាងផ្កាយ។ ចំពោះ គោមដែលគេដាក់តាំង អមសងខាងក្លោងទ្វារ ច្រើនមានរាងកន្ទុយត្រី កន្ទុយនាគ ឬកន្ទុយក្រពើ។ ចំណែកគោម ដែលគេដុតបំភ្លឺ សម្រាប់តាំងតុ ច្រើនមានរាងផ្កាឈូក ឬ រាងជាត្រឡោកមូល ដូចផែនដី។
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
© រក្សាសិទ្ធិដោយ thmeythmey.com
អត្ថបទពេញនិយម
ថ្ងៃ១៧ មេសា កាល៤៩ឆ្នាំមុន កងទ័ពខ្មែរក្រហមដណ្តើមបានទីក្រុងភ្នំពេញ
2 ថ្ងៃ
តើពាក្យ«បច្ច័យ»មានន័យច្បាស់លាស់ដូចម្តេច?
3 ថ្ងៃ
សមត្ថកិច្ចខេត្តកែប ធ្វើកិច្ចសន្យាអាជីវករ២រូប ឱ្យឈប់ទារលុយពីភ្ញៀវទេសចរដែលអង្គុយតាមឆ្នេរ
7 ថ្ងៃ
«បុរាណ»និង«បូរាណ» មានអត្ថន័យដូចគ្នា
1 សប្តាហ៍
«ភេរវកម្ម» មិនមែន «ភេវរកកម្ម» ឬ «ភារវកម្ម» ឡើយ
5 ថ្ងៃ
អត្ថបទពេញនិយមបន្ថែម