ជាតិ
ទេវតាឆ្នាំថ្មីព្រះនាម«រាគ្យសៈទេវី» ទ្រង់សោយ«លោហិត»ជាភក្សហារ
×
ពិធីបុណ្យចូលឆ្នាំថ្មីប្រពៃណីខ្មែរ ឆ្នាំមមែ សប្តស័ក ឆ្នាំ២០១៥នេះ សង្ក្រាន្តនឹងចូលមកដល់នៅថ្ងៃ១១រោច ខែចេត្រ ត្រូវនឹងថ្ងៃអង្គារ ទី១៤ ខែមេសា ឆ្នាំ២០១៥ វេលាម៉ោង១៤ និង០២នាទី។ ទេពធីតាព្រះអង្គជាមគ្គនាយិកាព្រះនាម «រាគ្យសៈទេវី» ជាកូនទីបី របស់កបិលមហាព្រហ្ម នឹងមកគ្រប់គ្រង និងថែរក្សាចក្រវាសម្រាប់ឆ្នាំថ្មីនេះ។ ព្រះនាងសោយ«លោហិត»ជាភក្សហារ និងព្រះនាងទ្រង់គង់លើខ្នង អស្សតរ (សេះ) ជាពាហនៈ។
ថ្ងៃអង្គារ ១១រោច ខែចេត្រ ត្រូវនឹងថ្ងៃទី១៤ ខែមេសា គ.ស. ២០១៥ វេលាម៉ោង ១៤ និង០២នាទី ជាថ្ងៃចូលឆ្នាំមមែ សប្តស័ក (ជាថ្ងៃមហាសង្ក្រាន្ត)។
ថ្ងៃពុធ ១២ រោច ខែចេត្រ ត្រូវនឹងថ្ងៃទី១៥ ខែមេសា គ.ស. ២០១៥ ជាវារៈវ័បត។
ថ្ងៃព្រហ្បតិ៍ ១៣ រោច ខែចេត្រ ត្រូវនឹងថ្ងៃទី ១៦ ខែមេសា គ.ស. ២០១៥ នៅវេលាម៉ោង ១៨និង២១នាទី ៣៦វិនាទី ជាវារៈឡើងស័ក គម្រប់ជាសង្ក្រាន្តបីថ្ងៃស្រេចបរិបូណ៌ចូលជាសកល ឆ្នាំមមែ សប្តស័ក ចុ.ស. ១៣៧៧ និងម.ស. ១៩៣៧ តទៅ។
នៅក្នុងឱកាសសង្ក្រាន្តទាំងបីថ្ងៃ សូមអស់ប្រជាពលរដ្ឋប្រុសស្រីផងទាំងឡាយរៀបចំពលិការ គ្រឿងសក្ការបូជា អុចប្រទីបជ្វាលា ថ្វាយព្រះរតនត្រ័យ និងទទួលស្វាគមន៍ ទេវបុត្រ ទេវធីតាឆ្នាំថ្មី ហើយខំលះបង់ចិត្តអាក្រក់អន្យតិរ្ថីយ ជាចិត្តអប្រីយ៍ជាប់ដោយគំនុំគុំគួនព្យាបាទឈ្នានីស ដែលកើតមានក្នុងឆ្នាំចាស់ឲ្យជ្រះស្រឡះតាំងចិត្តប្រព្រឹត្តល្អ ប្រកបដោយ មេត្តា ករុណា មុទិតា ឧបេក្ខា និងបញ្ញា ធ្វើបុណ្យសន្ទរ៍ទានតាមប្រពៃណី រក្សាសីលប្រាំឲ្យបានជាប់ជានិច្ច នោះទេវតានឹងឲ្យពរសព្ទសាធុការ លោកអ្នកនឹងមានសិរីសួស្តី សុភមង្គល វិបុលសុខគ្រប់ប្រការតាំងពីឆ្នាំថ្មីនេះតរៀងទៅ៕
ប្រភព៖ សៀវភៅមហាសង្ក្រាន្ត ឆ្នាំមមែ សប្តស័ក (ព.ស.២៥៥៩-គ.ស.២០១៥)
© រក្សាសិទ្ធិដោយ thmeythmey.com