កីឡាជាតិ
ជាតិ
World Cup៖ ក្រៅពីអាហ្វហ្គានីស្ថាន កម្ពុជាមានប្រវត្តិប៉ះជប៉ុន ស៊ីរី និងសឹង្ហបុរី ពីឆ្វេងទៅស្តាំ៖ Shinji Kagawa (ជប៉ុន) Sanharib Malki (ស៊ីរី) Amredin Sharifi (អាហ្វហ្គានីស្ថាន) Khairul Amri (សឹង្ហបុរី) និង ឃួន ឡាបូរ៉ាវី (កម្ពុជា)
× លទ្ធផលនៃការចាប់ឆ្នោតរើសពូលវគ្គជម្រុះជុំទីពីរប្រចាំតំបន់អាស៊ីនៃព្រឹត្តិការណ៍ World Cup ឆ្នាំ២០១៨ បានបង្ហាញឲ្យឃើញថា កម្ពុជាស្ថិតនៅក្នុងពូល E ជាមួយជប៉ុន ស៊ីរី អាហ្វហ្គានីស្ថាន និងសឹង្ហបុរី។ ក្នុងចំណោមគូប្រជែងទាំង៤ អាហ្វហ្គានីស្ថានគឺជាក្រុមតែមួយគត់ដែលកម្ពុជាមិនធ្លាប់បានជួបប្រកួត។ សារព័ត៌មានថ្មីៗ សូមធ្វើការបង្ហាញពីកំណត់ត្រាមួយចំនួននៃការប្រកួតរបស់កម្ពុជា ជាមួយជប៉ុន ស៊ីរី និងសឹង្ហបុរី។
កម្ពុជាចាញ់ជប៉ុន២លើកកាលពីជាង៤០ឆ្នាំមុន
កម្ពុជាមានប្រវត្តិជួបក្រុមជម្រើសជាតិជប៉ុនចំនួនពីរលើកកាលពីជាង៤០ឆ្នាំមុន។ ក្នុងព្រឹត្តិការណ៍កីឡាអាស៊ី Asian Games នៅកីឡដ្ឋាន Suphachalasai Stadium ទីក្រុងបាងកក ប្រទេសថៃ កាលពីថ្ងៃទី១២ ខែធ្នូ ឆ្នាំ១៩៧០ កីឡាករ Eizo Yuguchi បាននាំឲ្យជប៉ុនទទួលជ័យជម្នះ ១-០ លើអតីតសាធារណរដ្ឋខ្មែរ នាការប្រកួតនៅក្នុងពូល B ។
ពីរឆ្នាំក្រោយមក ក្រុមសាធារណរដ្ឋខ្មែរ បានជួបជប៉ុនម្តងទៀតនៅក្នុងព្រឹត្តិការណ៍ Merdeka Cup នៅកីឡដ្ឋាន Merdeka Stadium ក្នុងទីក្រុងគូឡាឡាំពួរ ប្រទេសម៉ាឡេស៊ី។ នាជំនួបដែលបានប្រព្រឹត្តទៅកាលពីថ្ងៃទី១២ ខែធ្នូ ឆ្នាំ១៩៧២ ជប៉ុនបានយកឈ្នះកម្ពុជា ៤-១ ដោយខ្សែប្រយុទ្ធជប៉ុន Kunishige Kamamoto រកបាន៤គ្រាប់តែម្នាក់ឯង ខណៈខ្សែប្រយុទ្ធ ឌឿក មាលដរ (Doeuk Miladord) ស៊ុតគ្រាប់បាល់បញ្ចូលទីបង្គ្រប់កិច្ចឲ្យកម្ពុជានៅ៨នាទី មុនបញ្ចប់ការប្រកួត។
កម្ពុជាធ្លាប់ចាញ់ស៊ីរី ៥-១ នៅលើទឹកដីឥណ្ឌាកាលពីឆ្នាំ២០០៧
កាលពីថ្ងៃទី២៥ ខែសីហា ឆ្នាំ២០០៧ ក្រោមជម្រើសជាតិដែលស្ថិតក្រោមការដឹកនាំរបស់គ្រូបង្វឹកអូស្ត្រាលី លោក Scott O’Donell បានចាញ់ស៊ីរី ៥-១ ក្នុងព្រឹត្តិការណ៍ Nehru Cup នៅទីក្រុងញូវដេលី ប្រទេសឥណ្ឌា។ កម្ពុជា បានហាលអាវដោយបញ្ចប់ចំណាត់ថ្នាក់ចុងគេក្នុងចំណោមក្រុមចំនួន៥ ខណៈស៊ីរី បានឈានទៅវគ្គបន្ត មុននឹងចាញ់ម្ចាស់ផ្ទះឥណ្ឌា ១-០ នៅវគ្គផ្តាច់ព្រ័ត្រ។
កីឡាករដែលស្ថិតក្នុងជម្រើសរបស់លោក Scott នាពេលនោះមាន អ្នកចាំទី ពេជ្រ រ៉ូវិនយោធិន ចាន់ ដារ៉ា (អូម ថាវរៈ ៨៣) គឹម ចាន់ប៊ុនរិទ្ធ ធុល សុធារិទ្ធ ស៊ុន ធួន ចាន់ រិទ្ធី សំអែល ណាសា ទៀប វឌ្ឍនៈ សម មិនា (កែវ កុសល ៤៦ ) ហុក សុទិត្រា (ឃឹម បូរី ៦៨) ប៉ុក ចាន់ថន។ ទៀប វឌ្ឍនៈ គឺជាកីឡាករដែលបានស៊ុតបាល់បញ្ចូលទីមួយគ្រាប់ឲ្យកម្ពុជា ក្រោយ ស៊ីរីនាំមុខ ៣-០ រួចទៅហើយ។
កម្ពុជា និងសឹង្ហបុរី ប៉ះគ្នា១៤លើក ដោយកម្ពុជាធ្លាប់ឈ្នះតែមួយលើកគត់
យោងតាមកំណត់ត្រារបស់សហព័ន្ធកីឡាបាល់ទាត់ពិភពលោក (FIFA) កម្ពុជា និងសឹង្ហបុរី មានប្រវត្តិជួបគ្នាជាផ្លូវការចំនួន១៤លើក ដោយសឹង្ហបុរីឈ្នះ១១ លើក កម្ពុជាឈ្នះ១លើក និងស្មើគ្នា២លើក។ ក្រុមទាំងពីរបានជួបគ្នាជាលើកដំបូងនាការប្រកួតជម្រុះព្រឹត្តិការណ៍ Merdeka Cup ឆ្នាំ១៩៥៧ នៅក្នុងទីក្រុងគូឡាឡាំពួរ ដោយបញ្ចប់ក្នុងលទ្ធផលស្មើ ១-១ ។ នៅឆ្នាំ១៩៧២ កម្ពុជាដែលក្លាយជាសាធារណរដ្ឋខ្មែរ បានយកឈ្នះ សឹង្ហបុរី ៣-០ នាព្រឹត្តិការណ៍ Jakarta Anniversary Tournament ដែលសម្រេចបានដោយ កីឡាករ ឌឿ សុខុម ២គ្រាប់ និង កីឡាករ ទេស សៀន ១គ្រាប់។
សម្រាប់ជំនួបលើកទីបីនាឆ្នាំ១៩៧២ដដែល សាធារណរដ្ឋខ្មែរ បានចាញ់សិង្ហបុរី ១-០ នាព្រឹត្តិការណ៍ Quoc Khanh Cup នៅក្នុងពូល ប៉ុន្តែបើតាមកំណត់ត្រា ក្រុមសាធារណរដ្ឋខ្មែរ បានឈានទៅកាន់វគ្គផ្តាច់ព្រ័ត្រ ហើយបំបាក់ម្ចាស់ផ្ទះវៀតណាមខាងត្បូង ១-០ ដើម្បីលើកពានជាប្រវត្តិសាស្ត្រ។
ក្រុមទាំងពីរបានជួបគ្នាជាបន្តបន្ទាប់ទៀតក្នុងព្រឹត្តិការណ៍ Merdeka Cup, ស៊ីហ្គេម(ពេលមិនទាន់កំណត់អាយុក្រោម២៣ឆ្នាំ) និងជាពិសេសពានរង្វាន់ AFF Suzuki Cup (អតីត Tiger Cup)។ ជំនួបចុងក្រោយ បានប្រព្រឹត្តទៅកាលពីថ្ងៃទី៥ ខែធ្នូ ឆ្នាំ២០០៨ ដោយសឹង្ហបុរី បានយកឈ្នះកម្ពុជា ៥-០ នាការប្រកួតពូល A នៃការដណ្តើមពានរង្វាន់ AFF Suzuki Cup នៅកីឡដ្ឋាន Gelora Bung Karno Stadium ក្រុងហ្សាការតា ប្រទេសឥណ្ឌូនេស៊ី។ ខ្សែប្រយុទ្ធ គួច សុគម្ភៈ និងខ្សែការពារ ស៊ុន សុវណ្ណរិទ្ធី គឺជាសមាជិកនៃក្រុមជម្រើសជាតិដែលបានបង្ហាញខ្លួនក្នុងការប្រកួតក្រោមការដឹកនាំរបស់លោក ប្រាក់ សុវណ្ណារ៉ា។
លទ្ធផលនៃការចាប់ឆ្នោតកាលពីរសៀលថ្ងៃទី១៤ ខែមេសា នៅទីក្រុងគូឡាឡាំពួរ ប្រទេសម៉ាឡេស៊ី
A៖ អារ៉ាប់រួមអេមីរ៉េត អារ៉ាបីសាអូឌីត ប៉ាឡេស្ទីន ទីម័រខាងកើត ម៉ាឡេស៊ី
B៖ អូស្ត្រាលី ហ្ស៊កដង់ តាហ្ស៊ីគីស្ថាន គៀកហ្ស៊ីស្ថាន បង់ក្លាដែស
C៖ ចិន កាតា ម៉ាល់ឌីវ ប៊ូតង់ ហុងកុង
D៖ អ៊ីរ៉ង់ អូម៉ង់ ឥណ្ឌា តួកមេនីស្ថាន ហ្គាម
E៖ ជប៉ុន ស៊ីរី អាហ្វហ្គានីស្ថាន សឹង្ហបូរី កម្ពុជា
F៖ អ៊ីរ៉ាក់ វៀតណាម ថៃ ឥណ្ឌូនេស៊ី ចិន-តៃប៉ិ
G៖ កូរ៉េខាងត្បូង គូវ៉ែត លីបង់ មីយ៉ាន់ម៉ា ឡាវ
H៖ អ៊ូបេគីស្ថាន បារ៉ែន ហ្វីលីពីន កូរ៉េខាងជើង យ៉េមែន
កម្មវិធីប្រកួតសម្រាប់ក្រុមជម្រើសជាតិកម្ពុជា៖
ជើងទីមួយ៖
-១១ ខែមិថុនា៖ កម្ពុជា ជួប សឹង្ហបុរី
-១៦ ខែមិថុនា៖ កម្ពុជា ជួប អាហ្វហ្គានីស្ថាន
-៣ ខែកញ្ញា៖ ជប៉ុន ជួប កម្ពុជា
-៨ ខែកញ្ញា៖ កម្ពុជា ជួប ស៊ីរី
ជើងទីពីរ៖
-១៣ ខែតុលា៖ សឹង្ហបុរី ជួប កម្ពុជា
- ១២ ខែវិច្ឆិកា៖ អាហ្វហ្គានីស្ថាន ជួប កម្ពុជា
-១៧ ខែវិច្ឆិកា៖ កម្ពុជា ជួប ជប៉ុន
-២៤ ខែមិនា ២០១៦៖ ស៊ីរី ជួប កម្ពុជា
© រក្សាសិទ្ធិដោយ thmeythmey.com