ជាតិ
សេដ្ឋកិច្ច
៣ខែដើមឆ្នាំចំណូលលក់សំបុត្រចូលទស្សនាប្រាសាទអង្គរបានជិត២០លានដុល្លារ
× ក្នុងរយៈពេល៣ខែដើមឆ្នាំ២០១៥ ពោលគឺក្នុងត្រីមាសទី១ កម្ពុជាប្រមូលចំណូលបានជិត២០លានដុល្លារ ពីការលក់សំបុត្រចូលទស្សនាប្រាសាទអង្គរវត្ត ។ នេះបើតាម សេចក្តីក្រកាសព័ត៌មានរបស់ អាជ្ញាធរជាតិអប្សរាស្តីពីស្ថិតិភ្ញៀវទេសចរបរទេសនៅ រមណីយដ្ឋានអង្គរប្រចាំខែមីនា និងត្រីមាសទី១ឆ្នាំ២០១៥ ។
សេចក្តីក្រកាសព័ត៌មានដែលចេញផ្សាយកាលពីដើមខេសាកន្លងទៅ បានបង្ហាញថា ចាប់ពីខែមករា ដល់ខែមិនា ឆ្នាំ២០១៥ មានភ្ញៀវទេសចរបរទេសចំនួន៦៨៩,១៥៧ នាក់បានទៅទស្សនាប្រាសាទអង្គរ ហើយចំណូលពីការលក់សំបុត្រ មានចំនួន១៩,៨៤១,៤៨០ដុល្លារ។ ចំណូលនេះធ្លាក់ចុះ៣.៧៩ភាគរយ បើធៀបទៅនឹងរយៈ៣ខែដូចគ្នាធៀបនឹងឆ្នាំ២០១៤ ។
ដោយឡែកសម្រាប់តែក្នុងខែមីនាវិញ មានភ្ញៀវទេសចរបរទេស ២០៣,១៩៥នាក់ រកចំណូលបាន៥,៧៩២,០០០ ដុល្លារថយចុះ ១.១៦ ភាគរយ។ នេះបើតាមរបាយការណ៍របស់អាជ្ញាធរអប្សរាដដែល
កន្លងមកអាជ្ញាធរអប្សរា ក៏បានបង្ហាញជាសាធារណៈពីចំណូលដែលបានមកពីការលក់សំបុត្រចូលទស្សនាអង្គរផងដែរ។ ខែមករា ឆ្នាំ២០១៥ មានភ្ញៀវទេសចរបរទេសចំនួន ២៥០,២៥៦នាក់ ដែលទស្សនាអង្គរវត្ត និងរកចំណូលបាន ៧,០៨៨,៧៦០ ដុល្លារ ថយចុះ៥.១២ភាគរយ រីឯខែកុម្ភៈ មានភ្ញៀវទេសចរបរទេសចំនួន ២៣៥,៧០៦នាក់ រកចំណូលបាន ៦,៩៦០,៧២០ ដុល្លារ ថយចុះ៤.៥៤ភាគរយ។
សូមបញ្ជាក់ថាក្នុងឆ្នាំ២០១៤ ចំណូលបានមកពីការលក់សំបុត្រចូលទស្សនាប្រាសាទអង្គរ មានជិត៦០លានដុល្លារ។ ខេត្តសៀមរាប ទទួលបានភ្លៀវទេសចរសរុបចំនួន ៥,០២៣,៨៨៧នាក់ ទៅទស្សនា ក្នុងនោះភ្ញៀវទេសចរជាតិមានចំនួន២,៦៧២,៩៥០ និងភ្ញៀវទេសចរណ៍អន្តរជាតិមានចំនួន ២,៣៥០,៩៣៧៕ © រក្សាសិទ្ធិដោយ thmeythmey.com