អន្តរជាតិ
×![]()
អង្គការលើកលែងទោសអន្តរជាតិ Amnesty International បានចេញរបាយការណ៍មួយស្ដីពី ប្រទេសចំនួន ៥ ដែលប្រហារជីវិតអ្នកទោសច្រើនជាងគេបំផុត កាលពីឆ្នាំ២០១៣ ក្នុងចំណោម ២២ ប្រទេសនៅលើពិភពលោក ។
ប្រទេសទាំង ៥ ដែលបានប្រហារជីវិតមនុស្សច្រើនជាងគេនោះ គឺរូបមាន ប្រទេសចិន បានប្រហារជីវិតអ្នកទោសចំនួន ២៤០០ នាក់ ខណៈពេលដែលប្រទេសអ៊ីរ៉ង់ស្ថិតនៅលំដាប់ទី២ ដោយប្រទេសនេះបានប្រហារជីវិតអ្នកទោស ចំនួន ៣៦៩ នាក់នៅក្នុងឆ្នាំ២០១៣ ។
ប្រទេសអ៊ីរ៉ាក់ស្ថិតនៅលំដាប់ទី៣ ព្រោះបានប្រហារជីវិតអ្នកទោសចំនួន ១៦៩ នាក់ ប្រទេសអារ៉ាប់ប៊ីសាអូឌីត បានសម្លាប់អ្នកទោសចំនួន ៧៩ នាក់ និងចុងក្រោយគឺសហរដ្ឋអាមេរិក ដែលបានប្រហារជីវិតអ្នកទោសសរុបចំនួន ៣៩ នាក់ ដែលក្នុងនោះមាន ៤១ ភាគរយជាអ្នកទោសស្ថិតនៅក្នុងរដ្ឋតិចសាស់។
យោងតាមរបាយការណ៍ខាងលើនោះ ចាប់ពីឆ្នាំ១៩៩៤ ដល់ ២០១៣ មានប្រទេសចំនួន ២២ បានលុបចោលទោសប្រហារជីវិត។
ទោះជាយ៉ាងណាក៏ដោយ អង្គការលើកលែងទោសអន្តរជាតិ នៅមិនអាចវាយតម្លៃបានច្បាស់លាស់ជាងនេះទៀតបានទេ ព្រោះថាការប្រហារជីវិតអ្នកទោសគឺជារឿងសម្ងាត់របស់រដ្ឋាភិបាលនីមួយៗ ។ ហេតុដូច្នេះហើយអង្គការមួយនេះ បានប៉ាន់ប្រមាណថាអ្នកទោសដែលត្រូវគេប្រហារជីវិតអាចមានច្រើនជាងនេះ រហូតដល់រាប់ពាន់នាក់៕
© រក្សាសិទ្ធិដោយ thmeythmey.com
