ជាតិ
«សាមគ្គីភាព ផលិតភាព និងការងារ»ជាទិសស្លោកខួបលើកទី១២៩ នៃទិវាពលកម្មអន្តរជាតិ
×![]()
ដោយ: ថ្មីៗ
រាជរដ្ឋាភិបាលកម្ពុជា នឹងរៀបចំប្រារព្ធខួប ថ្ងៃទី១ឧសភាឆ្នាំ២០១៥ ក្រោមប្រធានបទស្លោក៖«សាមគ្គីភាព ផលិតភាព និងការងារ» ។
ការជ្រើសរើសយកទិសស្លោកនេះ គឺដើម្បីឧទ្ទិសដល់គោលបំណងរបស់រាជរដ្ឋាភិបាលកម្ពុជា ក្នុងការបន្តខិតខំពង្រឹងភាពសុខដុមរមនាក្នុងទំនាក់ទំនងវិជ្ជាជីវៈ ការបង្កើនផលិតភាពការងារ គុណភាពផលិតផល និងការកែលម្អជីវភាពរបស់ពលករដើម្បីរួមចំណែកក្នុងកិច្ចអភិវឌ្ឍន៍ប្រទេសជាតិ និងដំណើរការចូលរួមក្នុងសហគមន៍សេដ្ឋកិច្ចអាស៊ាន នាពេលខាងមុខ។ នេះបើតាមសារាចរណ៍ណែនាំរបស់រាជរដ្ឋាភិបាល ស្តីពីការរៀបចំ ប្រារព្ធខួបលើកទី១២៩នៃទិវាពលកម្មអន្តរជាតិថ្ងៃទី១ឧសភា។
នៅក្នុងសារាចរណ៍ណែនាំរាជរដ្ឋាភិបាល បានចាត់ឲ្យក្រសួងការងារ និងបណ្តុះបណ្តាលវិជ្ជាជីវៈ ធ្វើជាស្ថាប័នស្នូលក្នុងការរៀបចំទិវាអន្តរជាតិនេះ ដោយចេញសេចក្តីជូនដំណឹងដល់គ្រប់ស្ថាប័ន និងអ្នកពាក់ព័ន្ធទាំងអស់ ដើម្បីណែនាំអំពីការឈប់សម្រាក និងការរៀបចំកម្មវិធីកម្សាន្តទៅតាមសហគ្រាស និងគ្រឹះស្ថាននានា សំដៅបង្កបរិយាកាសយោគយល់គ្នារវាងកម្មករ និយោជក។
ក្រសួងការងារក៏ត្រូវសហការជាមួយសាលារាជធានីភ្នំពេញ រៀបចំមិទ្ទេញថ្នាក់ជាតិ ដែលមានការចូលរួមពីតំណាងក្រសួង ស្ថាប័នរដ្ឋ ស្ថានទូត អង្គការអន្តរជាតិ អង្គការមិនមែនរដ្ឋាភិបាល និងអ្នកពាក់ព័ន្ធផ្សេងទៀត ព្រមទាំងត្រូវរៀបចំឲ្យមានការសំណេះសំណាលជាមួយកម្មករ និយោជិត នៅតាមបណ្តារោងចក្រ សហគ្រាស គ្រឹះស្ថាន នៅគ្រប់ខេត្តក្រុងទាំងអស់។
សារាចរណ៍ណែនាំបានសរសេរទៀតថា ក្រសួងមហាផ្ទៃ អគ្គស្នងការនគរបាលជាតិ បញ្ជាការដ្ឋានកងរាជអាវុធហត្ថលើផ្ទៃប្រទេស អាជ្ញាធរដែនដី និងស្ថាប័នពាក់ព័ន្ធគ្រប់រាជធានី-ខេត្ត ត្រូវមានវិធានការតាមសមត្ថកិច្ចរៀងៗខ្លួន ក្នុងការរក្សាការពារសន្តិសុខ សុវត្ថិភាព និងសណ្តាប់ធ្នាប់សាធារណៈ នៅក្នុងថ្ងៃប្រារព្ធទិវានេះ។
បើតាមសារាចរណ៍ដដែល ក្រសួងព័ត៌មានត្រូវណែនាំប្រព័ន្ធឃោសនារបស់រដ្ឋ និងឯកជនឲ្យធ្វើការផ្សព្វផ្សាយសារលិខិតរបស់ លោក នាយករដ្ឋមន្ត្រី ក្នុងឱកាសប្រារព្ធខួបលើកទី១២៩នៃទិវាពលកម្មអន្តរជាតិថ្ងៃទី១ឧសភានេះ សកម្មភាពមិទ្ទេញ និងការកម្សាន្តរបស់កម្មករ និយោជិត នៅតាមបណ្តារោងចក្រ សហគ្រាសនានា ហើយនៅគ្រប់រាជធានី-ខេត្ត និងក្រសួង ស្ថាប័នពាក់ព័ន្ធទាំងអស់ត្រូវចង់បដាពាក្យស្លោក និងខ្លឹមសារពាក់ព័ន្ធនឹងប្រារព្ធខួបលើកទី១២៩នៃទិវាពលកម្មអន្តរជាតិថ្ងៃទី១ឧសភា៕
© រក្សាសិទ្ធិដោយ thmeythmey.com
