ជាតិ
បទយកការណ៍ / បទសម្ភាសន៍
កញ្ញា ច័ន្ទ មល្លិកា៖ ជោគជ័យ ម៉ាឌីហ្សូន២០១៥ ធ្វើឲ្យយើងអួលដើម ក នៅឡើយ
× ព្រឹត្តិការណ៍អង្គរសង្ក្រាន្តឆ្នាំ២០១៥ទើបតែបញ្ចប់ទៅថ្មីៗនេះ។ ប៉ុន្តែការជជែកអំពីការរាំម៉ាឌីហ្សូនបំបែកឯតទគ្គកម្ម Guinness World Records នៅមិនទាន់ចប់ឡើយ។ រូបភាពនៃការរាំម៉ាឌីហ្សូននៅទីលានជល់ដំរីត្រូវសារព័ត៌មានបន្តផ្សព្វផ្សាយ និងត្រូវបានគេចែកចាយបន្តគ្នានៅលើបណ្តាញសង្គមហ្វ៊េសប៊ុក។ ម៉ាស៊ីនថត កាមេរ៉ាវីដេអូ បានផ្តិតយកតែរូបភាពបេក្ខជន បេក្ខនារី២០១៥នាក់ និងអ្នកតំណាងទទួលលិខិតបញ្ជាក់ Guinness World Records ប៉ុន្តែម៉ាស៊ីនផ្តិតរូបភាពទាំងនោះ មិនបានផ្តិតយករូបភាព កញ្ញា ច័ន្ទ មល្លិកា ដែលកាន់វិទ្យុទាក់ទងជាមួយក្រុមការងាររត់ចុះឡើងជុំវិញមនុស្ស២០១៥នាក់នោះទេ។ តាមពិត កញ្ញា ច័ន្ទ មល្លិកា នេះហើយដែលជាអ្នកនិពន្ធបទ ម៉ាឌីហ្សូន២០១៥ ទុកឲ្យយុវជនខ្មែររាំបំបែក ឯតទគ្គកម្មពិភពលោក។ នៅពេលដែលពលរដ្ឋកម្ពុជាសាទរនឹងជ័យជម្នះនេះ កញ្ញាអ្នកនិពន្ធអត្ថាធិប្បាយយ៉ាងខ្លីថា ជោគជ័យរបស់អង្គរសង្ក្រាន្តជាមោទនភាពបំផុតក្នុងមួយជីវិតកញ្ញាក្នុងនាមជាខ្មែរ។
ដើម្បីយល់អំពីចំណាប់អារម្មណ៍លម្អិតរបស់កញ្ញា ច័ន្ទ មល្លិកា សូមលោកអ្នកអានបទសម្ភាសន៍រវាង កញ្ញា ខន ចំប៉ា អ្នកយកព័ត៌មាននៃសារព័ត៌មានថ្មីៗ និងកញ្ញា ច័ន្ទ មល្លិកា ដូចតទៅ៖
កញ្ញា ខន ចំប៉ា៖ កញ្ញាច័ន្ទមល្លិកាគឺជាអតីតអ្នកនិពន្ធទំនុកច្រៀងនៅក្នុងផលិតកម្មក្នុងស្រុកមួយចំនួនដូចជាផលិតកម្មរស្មីហង្សមាសផលិតកម្មថោនផលិតកម្មអឹម(M)ជាដើម។ កញ្ញាក៏ជាអ្នកនិពន្ធទំនុកច្រៀងសម្រាប់ព្រឹត្តិការណ៍អង្គរសង្ក្រាន្តរយៈ៣ឆ្នាំជាប់គ្នាដែរ។ តើក្នុងរយៈពេល៣ឆ្នាំនេះ កញ្ញាតែងបានចម្រៀងប៉ុន្មានបទ?
កញ្ញា ច័ន្ទ មល្លិកា៖ ចា៎ខ្ញុំបាននិពន្ធបទចម្រៀងជាង៣០ហើយសម្រាប់ព្រឹត្តិការណ៍អង្គរសង្ក្រាន្តរយៈ៣ឆ្នាំនេះពោលគឺ១ឆ្នាំយើងធ្វើចំនួន១២បទ។ បទចម្រៀងទាំងនោះមានគ្រប់ចង្វាក់ទាំងអស់ ដូចជាបទគោមទឹកនឹកស្នេហ៍ បទមរតកអង្គរសៀមរាបផ្ទះខ្ញុំអបអរសាទរអង្គរសង្ក្រាន្តបទម៉ាឌីហ្សូន២០១៥និងបទអង្គរសង្ក្រាន្តជាដើម។
កញ្ញា ខន ចំប៉ា៖ កញ្ញាមល្លិកាមានហេតុផលអ្វីខ្លះដែលជំរុញទឹកចិត្តឲ្យកញ្ញាស្ម័គ្រចិត្តនិពន្ធទំនុកច្រៀងសម្រាប់មហាព្រឹត្តិការណ៍ដ៏អស្ចារ្យមួយនេះ?
កញ្ញា ច័ន្ទ មល្លិកា៖ ចា៎សម្រាប់ខ្ញុំក្នុងមួយជីវិតនេះមានរឿង៣ដែលខ្ញុំត្រូវធ្វើ គឺទី១.ធ្វើដើម្បីខ្លួនឯងទី២.ធ្វើដើម្បីគ្រួសារនិងទី៣. ធ្វើអ្វីសម្រាប់ជួយសង្គមជាតិ។ ហើយខ្ញុំសូមជម្រាបថាមិនមែនតែខ្ញុំម្នាក់ ដែលជានិពន្ធទំនុកច្រៀងនេះអាចធ្វើឲ្យបទចម្រៀងទាក់ទងនឹងអង្គរសង្ក្រាន្តនេះចេញជារូបរាងនោះទេ។ និយាយដោយស្មោះត្រង់ទៅក្រុមការងាររបស់ខ្ញុំមានជិត២០នាក់ទាំងអ្នកនិពន្ធទំនុកច្រៀងអ្នកនិពន្ធបទភ្លេងនិងអ្នកចម្រៀង។ ពួកយើងសុទ្ធតែស្ម័គ្រចិត្តទាំងអស់។ ពីព្រោះអី! ពីព្រោះខ្ញុំយល់ថាការចូលរួមមួយនេះគឺជាវិភាគទានមួយដែលក្នុងនាមខ្ញុំជាខ្មែរអាចជួយសង្គមជាតិរបស់ខ្ញុំបានការស្រឡាញ់ដែលចេញពីបេះដូងវានឹងជំរុញឲ្យយើងខំធ្វើវាឲ្យអស់ពីលទ្ធភាព ទោះបីជាហត់នឿយប៉ុន្តែពួកយើងសប្បាយចិត្តនឹងធ្វើវា។
កញ្ញា ខន ចំប៉ា៖ ត្រឡប់ទៅជជែកពីបទចម្រៀងដែលត្រូវបានតែងសម្រាប់ឆ្នាំ២០១៥នេះវិញ។ មានបទចម្រៀង២បទដែលមានភាពលេចធ្លោជាងគេ គឺបទ«អង្គរសង្ក្រាន្ត»ជាចង្វាក់រាំវង់ដែលប្រជាជនកម្ពុជាស្ទើរទូទាំងប្រទេសបានលឺនៅក្នុង Call Tuneក្នងទូរសព្ទនិងបទ«ម៉ាឌីហ្សូន២០១៥»ជាបទដែលច្រៀងក្នុងការរាំម៉ាឌីហ្សូនដើម្បីបំបែកកំណត់ត្រាពិភពលោក។ កញ្ញាច័ន្ទមល្លិកាតើបទសម្រៀងទាំងពីរនេះមានលក្ខណៈពិសេសយ៉ាងដូចម្តេចខ្លះ សម្រាប់កញ្ញា?
កញ្ញា ច័ន្ទ មល្លិកា៖ ជាដំបូងខ្ញុំសូមលើកយកពីបទ«អង្គរសង្ក្រាន្ត»ដែលច្រៀងដោយកញ្ញាណាក់ ស្រីណា តួឯកអង្គរសង្ក្រាន្តឆ្នាំ២០១៣និងលោក សុគន្ធ ថេរ៉ាយុ។ បទនេះគឺខ្ញុំបានសរសេររៀបរាប់លំអិតពីកម្មវិធីផ្សេងៗដែលត្រូវរៀបចំក្នុងព្រឹត្តិការណ៍អង្គរសង្ក្រាន្តក្នុងនោះមានដូចជាការប្រកួតអុកចត្រង្គយក្ស នំអន្សមយក្ស ការបណ្តែតគោមខ្មែរការសម្តែងសិល្បៈខ្មែរការលេងល្បែងប្រជាប្រិយដូចជាចោលឈូង ទាញព្រ័ត្របោះអង្គុញជាដើម។ នៅពេលដែលគេបានស្តាប់បទនេះគេនឹងដឹងថាព្រឹត្តិការណ៍អង្គរសង្ក្រាន្តមានកម្មវិធីអ្វីខ្លះ ហើយរៀបចំនៅទីណា។ចំណែកឯ បទ«ម៉ាឌីហ្សូន២០១៥»ដែលច្រៀងដោយកញ្ញា សុគន្ធ នីសាក ញ្ញា ឡូរា ម៉ម លោក សុគន្ធ ថេរ៉ាយុ និងលោក នៅ ស៊ីនឿន វិញខ្ញុំបានសរសេរបញ្ជាក់ថាព្រឹត្តិការណ៍អង្គរសង្ក្រាន្ត គឺរៀបចំឡើងដើម្បីមហាគ្រួសារខ្មែរដើម្បី«យុវជនសៀមរាបផ្ទះខ្ញុំ» ដែលបានហ្វឹកហាត់រាំបទម៉ាឌីហ្សូនដើម្បីបំបែកកំណត់ត្រាពិភពលោកនិងដើម្បីទទួលស្វាគមន៍ភ្ញៀវទេសចរពីគ្រប់មជ្ឈដ្ឋានទាំងអស់ដែលទៅលេងក្នុងព្រឹត្តិការណ៍អង្គរសង្ក្រាន្ត។លើសពីនេះទៀត ទាំងអត្ថន័យនិងអត្ថរសនៃបទចម្រៀង គឺសុទ្ធសឹងតែបានបញ្ជាក់យ៉ាងច្បាស់ពីអត្តសញ្ញាណនិងមោទនភាពរបស់ខ្មែរតទៅគ្រប់ជំនាន់ទាំងអស់និងបង្ហាញឲ្យពិភពលោកស្គាល់ថាអង្គរសង្ក្រាន្តមានតែនៅកម្ពុជាតែមួយគត់។
កញ្ញា ខន ចំប៉ា៖ កញ្ញា ច័ន្ទ មល្លិកា បានដឹងជាមុនទេ ថាតើគេនឹងរើសយកបទ«ម៉ាឌីហ្សូន២០១៥»នេះអមជាមួយការរាំម៉ាឌីហ្សូនដើម្បីបំបែកកំណត់ត្រាពិភពលោកដែរទេ?
កញ្ញា ច័ន្ទ មល្លិកា៖ ចា៎បទ«ម៉ាឌីហ្ស៊ុន២០១៥»នេះត្រូវបានជ្រើសរើសដោយ លោកហ៊ុនមានី ប្រធាន សហភាពសហព័ន្ធយុវជម្ពុជា ហើយក៏ត្រូវឆ្លងកាត់ការយល់ព្រមពីលោកស្រី Seyda Subasi Gamici តំណាងអ្នកវាយតម្លៃរបស់ Guinness World Record ផ្ទាល់។ការពិតទៅយើងមិនបានដឹងទេថាបទនេះត្រូវបានគេជ្រើសរើស ម្យ៉ាងយើងមានពេលវេលាប្រមាណ២សប្តាហ៍ប៉ុណ្ណោះសម្រាប់និពន្ធបទចម្រៀងទាំង១២បទហើយដែលគ្រប់បទចម្រៀងទាំងអស់គឺយើងនិពន្ធឲ្យទាក់ទងទៅនឹងព្រឹត្តិការណ៍អង្គរសង្ក្រាន្តឆ្នាំ២០១៥ដែលរៀបចំនៅខេត្តសៀមរាបនេះ។
កញ្ញា ខន ចំប៉ា៖ ក្នុងនាមជាអ្នកនិពន្ធទំនុកច្រៀងសម្រាប់ព្រឹត្តិការណ៍អង្គរសង្ក្រាន្ត ជាពិសេសបទ«ម៉ាឌីហ្សូន២០១៥»កញ្ញាមល្លិកា អាចពិពណ៌នាពីអារម្មណ៍របស់ខ្លួនយ៉ាងណាខ្លះនៅពេលលោកស្រីSeyda Subasi Gamiciប្រកាសថាការរាំចង្វាក់ម៉ាឌីហ្សូនរបស់យុវជនកម្ពុជាបានជាប់ក្នុងកំណត់ត្រាពិភពលោក?
កញ្ញា ច័ន្ទ មល្លិកា៖ រំភើបមែនទែនហើយជាអារម្មណ៍រំភើបមួយដែលមិនអាចកាត់ថ្លៃបាន។ ព្រោះជាមោទនភាពជាតិ។ហើយរហូតមកដល់ថ្ងៃនេះក៏ខ្ញុំនៅតែ នឹកស្មានមិនដល់និងនៅអួលដើមកនៅពេលស្រមៃនឹកឃើញពីលទ្ធផលដែលជាជោគជ័យមួយព្រឹត្តិការណ៍អង្គរសង្ក្រាន្តនោះ។មួយវិញទៀតពួកយើងជាក្រុមផលិតបទចម្រៀង ក៏មិនបានរំពឹងអ្វីការងាររបស់យើងដែរក្រៅពីចង់ឲ្យមហាគ្រួសាររីករាយក្នុងព្រឹត្តិការណ៍អង្គរសង្ក្រាន្តនេះហើយពួកយើងតាំងចិត្តប្រឹងប្រែង លះបង់កម្លាំងកាយចិត្តចូលរួមចំណែកក្នុងការជួយសង្គមទោះបីវានៅមានចំណុចខ្វះខាតខ្លះក៏ដោយ។ប៉ុន្តែពួកគាត់បានខំប្រឹងប្រែងហើយលះបង់ហើយ។មិនមែនតែបទនេះមួយទេសូម្បីតែបទអង្គរសង្ក្រាន្តដែលប្រជាជនជាង១៤លាននាក់បានលឺនៅក្នុងCall Tuneក៏ធ្វើឲ្យពួកយើងរំភើបស្ទើរស្រក់ទឹកភ្នែកដែរ។
កញ្ញា ខន ចំប៉ា៖ មែនទែនទៅបទចម្រៀងសម្រាប់អង្គរសង្ក្រាន្តឆ្នាំ២០១៥ហាក់មិនសូវបានចាក់ផ្សាយច្រើនទេនៅតាមប្រព័ន្ធផ្សព្វផ្សាយ។យើងបានលឺតែនៅក្នុងព្រឹត្តិការណ៍អង្គរសង្ក្រាន្តតែប៉ុណ្ណោះ។តើកញ្ញាមានគម្រោងថានឹងដាក់ផ្សាយជាសាធារណៈឬផលិតទៅជាវីដេអូដែរឬទេបន្ទាប់ពីអង្គរសង្ក្រាន្តឆ្នាំ២០១៥បានបញ្ចប់ដោយជោគជ័យជាពិសេសការរាំម៉ាឌីហ្សូនអមជាមួយបទចម្រៀង«ម៉ាឌីហ្សូន២០១៥»ដែលកញ្ញានិពន្ធបានជាប់ជាកំណត់ត្រាពិភពលោក?
កញ្ញា ច័ន្ទ មល្លិកា៖ ការពិតទៅគម្រោងនេះយើងមានតាំងពីយូរមកហើយគ្រាន់តែយើងមិនមានពេលវេលាគ្រប់គ្រាន់ដូចខ្ញុំបាននិយាយមុននេះយើងមានពេលមិនដល់២សប្តាហ៍ផងសម្រាប់ការនិពន្ធបទចម្រៀងសម្រាប់ព្រឹត្តិការណ៍ដ៏អស្ចារ្យនេះ។ថ្ងៃទី៨ខែមេសាទើបក្រុមការងារបានបញ្ចប់ការតែងនិពន្ធនិងច្រៀង ដូច្នេះយើងមានពេលវេលាតិចតួចមែនទែនហើយម្នាក់ៗបានគេងតែ២ឬ៣ម៉ោងប៉ុណ្ណោះក្នុងរយៈពេលជាងកន្លះខែនេះ។ប៉ុន្តែបន្ទាប់ពីអង្គរសង្ក្រាន្តបញ្ចប់យើងនឹងគិតគូរពីបញ្ហានេះ។
កញ្ញា ខន ចំប៉ា៖ ជាសំណួរចុងក្រោយអ្វីជាមោទនភាពនិងទិដ្ឋភាពដែលមិនអាចបំភ្លេចបានរបស់កញ្ញាច័ន្ទមល្លិកាក្នុងនាមជាអ្នកនិពន្ធទំនុកនៅក្នុងព្រឹត្តិការណ៍អង្គរសង្ក្រាន្តឆ្នាំ២០១៥នេះ?
កញ្ញា ច័ន្ទ មល្លិកា៖ ជាមោទនភាពសម្រាប់ជីវិតខ្ញុំក្នុងនាមជាកូនខ្មែរដែលខ្ញុំមានឱកាសចូលរួមបញ្ចេញសមត្ថភាពស្នាដៃនិងទេពកោសល្យរបស់ខ្ញុំក្នុងព្រឹត្តិការណ៍អង្គរសង្ក្រាន្តជាពិសេសពេលឃើញព្រឹត្តិការណ៍អង្គរសង្ក្រាន្តបញ្ចប់ទៅដោយជោគជ័យនិងត្រូវបានគេទទួលស្គាល់នៅទូទាំងពិភពលោក។ខ្ញុំពិតជាមានមោទនភាពនិងរំភើប៕
© រក្សាសិទ្ធិដោយ thmeythmey.com