ជាតិ
បទវិភាគ
×![]()
គណបក្ស ហ្វ៊ុនស៊ិនប៉ិច បានធ្លាក់ខ្លួនពីគណបក្សដែលឈ្នះឆ្នោតនៅឆ្នាំ ១៩៩៣ មកជាគណបក្សដែលបរាជ័យគ្មានទទួលបានកៅអីមួយសោះឡើយ ក្នុងការបោះឆ្នោតជ្រើសតាំងតំណាងរាស្ត្រ កាលពីឆ្នាំ ២០១៣ កន្លងទៅ។ ភាពបរាជ័យរបស់គណបក្សរាជានិយមមួយនេះ ក៏កំពុងលងបន្លាចគណបក្សសង្គ្រោះជាតិរាល់ថ្ងៃដែរ។ អ្នកគាំទ្រ មេដឹកនាំគណបក្សនេះ បារម្ភខ្លាចគណបក្សខ្លួនដើរចូលគន្លងនយោបាយចាស់របស់គណបក្សហ្វ៊ុនស៊ិនប៉ិច ស្របពេលដែលលោក សម រង្ស៊ី កំពុងតែមានចំណងទឹកឃ្មុំជាមួយលោក ហ៊ុន សែន ។ ការបារម្ភរបស់គណបក្សប្រឆាំងមួយនេះ ដោយសារថា ភាពបរាជ័យរបស់គណបក្សហ្វ៊ុនស៊ិនប៉ិចកន្លងមក កើតឡើងបណ្តាលមកពីជំហរនយោបាយមិនច្បាស់លាស់របស់គណបក្សរាជានិយមមួយនេះ។
សូមស្តាប់លោក ជា ធីរិទ្ធ !
ចាប់តាំងពីអ្នកគាំទ្ររហូតដល់មេដឹកនាំគណបក្សសង្គ្រោះជាតិ ភាគច្រើនពួកគេសុទ្ធតែដិតដាមដោយស្រមោលបរាជ័យរបស់គណបក្សហ្វ៊ុនស៊ិនប៉ិចនៅលើវិថីនយោបាយ។ បើទោះបីជាពេលខ្លះ មេដឹកនាំគណបក្សសង្គ្រោះជាតិខ្លួនឯង ខំប្រឹងប្រកាសពីភាពខ្លាំងរបស់ខ្លួនថា គណបក្សនេះ នឹងមិនអាចដើរចូលគន្លងដូចគណបក្សហ្វ៊ុនស៊ិនប៉ិចក៏ដោយក៏ប៉ុន្តែក្នុងអារម្មណ៍ពួកគេ នៅតែបារម្ភខ្លាចគណបក្សខ្លួន មានវាសនាដូចគណបក្សហ្វ៊ុនស៊ិនប៉ិចបច្ចុប្បន្ន នៅពេលដែលពួកគេឃើញមេដឹកនាំកំពូលគណបក្សខ្លួនខ្លះ មានជំហរនយោបាយហាក់មិនច្បាស់លាស់ដូចគណបក្សហ្វ៊ុនស៊ិនប៉ិច។
និយាយដល់គណបក្ស ហ្វ៊ុនស៊ិនប៉ិច បក្សនេះ ធ្លាប់មានប្រវត្តិជាគណបក្សដែលឈ្នះឆ្នោតដំបូងគេក្នុងការបោះឆ្នោតអាណត្តិទី ១ កន្លងទៅ ដែលរៀបចំឡើងដោយអាជ្ញាធរបណ្តោះអាសន្នរបស់អង្គការសហប្រជាជាតិប្រចាំនៅកម្ពុជាហៅកាត់ថា UNTAC ។ តែក្រោយមកពីមួយអាណត្តិទៅមួយអាណត្តិគណបក្សរាជានិយមមួយនេះ បានបាត់បង់ប្រជាប្រិយភាពជាបន្តបន្ទាប់។ នៅក្នុងការបោះឆ្នោតជ្រើសតាំងតំណាងរាស្ត្រអាណត្តិទី ៥ ឆ្នាំ ២០១៣ កន្លងទៅ គណបក្ស ហ្វ៊ុនស៊ិនប៉ិច បានធ្លាក់ក្នុងរណ្តៅនៃភាពបរាជ័យហៅលែងឮ ដែលរកតែមួយកៅអីនៅក្នុងរដ្ឋសភាមិនបាន។
ភាពបរាជ័យរបស់គណបក្ស ហ្វ៊ុនស៊ិនប៉ិន ត្រូវអ្នកវិភាគនយោបាយ អ្នកគាំទ្រ និងមេដឹកនាំគណបក្សសង្គ្រោះជាតិខ្លះ យល់ថា បណ្តាលមកពីការបែកបាក់ផ្ទៃក្នុងបក្ស និងជំហរនយោបាយមិនពិតប្រាកដរបស់មេដឹកនាំគណបក្សនេះកន្លងមក។ ជំហរនយោបាយមិនច្បាស់លាស់ត្រង់ចំណុចនេះ ត្រូវអ្នកគាំទ្រ និងមេដឹកនាំគណបក្សសង្គ្រោះជាតិខ្លះលើកឡើងថា ដោយសារមេដឹកនាំគណបក្សហ្វ៊ុនស៊ិនប៉ិច មានជំហរមិនចំជាគណបក្សប្រឆាំង ពោលគឺជំហរគាំទ្ររណេបរណប លើកជើង លោក ហ៊ុន សែន ។ ទីបំផុត គណបក្ស ហ្វ៊ុនស៊ិប៉ិចបានត្រឹមតែជាគណបក្សហែហមអមដំណើរគណបក្សរបស់លោក ហ៊ុន សែន ប៉ុណ្ណោះ ។ លោក ហ៊ុន សែន ដែលក្នុងក្រសែភ្នែករបស់អ្នកគាំទ្រ និងមេដឹកនាំបក្សសង្គ្រោះជាតិខ្លះ ពួកគេមើលឃើញ លោក ហ៊ុន សែន ថា គឺជាមនុស្សដែលពោរពោញដោយយុទ្ធសាស្ត្របំបែកបំបាក់គូរសត្រូវឲ្យបរាជ័យ ដើម្បីរក្សាអំណាចខ្លួន ដែលមិនគួរឲ្យមេដឹកនាំបក្សប្រឆាំងបន្ទន់ឥរិយាបថសេពគប់យកជាមិត្តជិតស្និទ្ធនោះទេ។ ពេលខ្លះទៀត ក្នុងចិត្តរបស់ពួគគេ ចាត់ទុកលោក ហ៊ុន សែន ថា គឺជាអ្នកនយោបាយមិនល្អ មិនបម្រើផលប្រយោជន៍ជាតិនិងប្រជាជនខ្លួនឯងឡើយ ។
ដោយសារកត្តាទាំងអស់នេះហើយ បានជាអ្នកគាំទ្រ និងមេដឹកនាំគណបក្សសង្គ្រោះជាតិខ្លះ ភ័យខ្លាចបទពិសោធន៍មិនល្អរបស់គណបក្សហ្វ៊ុនស៊ិនប៉ិច បន្តធ្លាក់មកលើគណបក្សសង្គ្រោះជាតិ ស្របពេលដែលលោក សម រង្ស៊ី ប្រធានគណបក្សនេះ កំពុងមានចំណងមិត្តភាពដ៏ស្អិតរមួតជាមួយលោក ហ៊ុន សែន ។ ភាពស្និទ្ធស្នាលដ៏កម្ររវាងលោក ហ៊ុន សែន និងសម រង្ស៊ី ក្នុងព្រឹត្តិការណ៍អង្គរសង្គ្រាន្តនៅខេត្តសៀមរាបកន្លងទៅថ្មីៗនេះ នៅមិនទាន់រសាត់ចេញពីភ្នែករបស់អ្នកគាំទ្រ និងមេដឹកនាំគណបក្សសង្គ្រោះជាតិមួយចំនួននៅឡើយទេ។ ពួកគេ មានក្តីកង្វល់ខ្លាចរាត្រីទឹកឃ្មុំរបស់លោក សម រង្ស៊ី ជាមួយលោក ហ៊ុន សែន បណ្តាលឲ្យគណបក្សសង្គ្រោះជាតិ ផុងជើងដើរតាមគន្លងគ្រោះថ្នាក់ដូចគណបក្ស ហ្វ៊ុនស៊ិនប៉ិច ។
យ៉ាងណាក៏ដោយចុះ ដើម្បីការពារទង្វើរបស់ខ្លួន និងដើម្បីបំភ្លឺក្តីមន្ទិលរបស់អ្នកគាំទ្រខ្លួន និងមេដឹកនាំគណបក្សសង្គ្រោះជាតិខ្លះ លោក សម រង្ស៊ី បានចេញមុខប្រកាសកាលពីថ្ងៃទី ១៧ ខែមេសា ថា ភាពស្និទ្ធស្នាលរវាងរូបលោក ជាមួយលោកនាយករដ្ឋមន្ត្រី ហ៊ុន សែន ជាពិសេសក្នុងព្រឹត្តិការណ៍អង្គរសង្ក្រាន្តនោះ គឺជាវប្បធម៌សន្ទនាគ្នា ដើម្បីស្តារប្រទេសជាតិឡើងវិញប៉ុណ្ណោះមិនមែនរូបលោក ធ្វើឲ្យជាតិរលាយដូចជាគណបក្សហ្វ៊ុនស៊ិនប៉ិចនោះទេ។លោក សម រង្ស៊ី ចង់មានន័យថា រូបលោកនឹងមិនធ្វើឲ្យគណបក្សសង្គ្រោះជាតិ ដើរតាមគន្លងចាស់របស់គណបក្ស ហ្វ៊ុនស៊ិនប៉ិច ឡើយ។ បន្ថែមពីលើសម្តីលោក សម រង្ស៊ី លោក កឹម សុខា ដែលជាអនុប្រធានឯណោះវិញ ក៏ចេញមុខអំពាវនាវឲ្យអ្នកគាំទ្រគណបក្សខ្លួន កុំឲ្យមានការយល់ច្រឡំឲ្យសោះចំពោះសកម្មភាពរបស់លោក សម រង្ស៊ី ជាមួយលោក ហ៊ុន សែន ។ លោក កឹម សុខា អះអាងថា សកម្មភាពរបស់លោក សម រង្ស៊ី គឺជាយុទ្ធសាស្ត្ររបស់គណបក្សនោះទេ។ លោកថា គោលជំហររបស់គណបក្សសង្គ្រោះជាតិនៅតែរក្សាជាបក្សប្រឆាំងដដែល បើទោះជាមេដឹកនាំគណបក្សនយោបាយមានអាសនៈក្នុងសភាទាំងពីរ មានភាពជិតស្និទ្ធនឹងគ្នាក៏ដោយ។
ក៏ប៉ុន្តែទន្ទឹមនឹងថ្លែងបែបនេះនៅចំពោះមុខអ្នកគាំទ្រខ្លួន លោក កឹម សុខា ក៏ឆ្លៀតព្រលយពាក្យសម្តីដែលស្តាប់ទៅហាក់បីដូចជាចង់ដាស់តឿនលោក សម រង្ស៊ី ដែលកំពុងមានភាពស្និទ្ធស្នាលជាមួយលោក ហ៊ុន សែន ។ នៅក្នុងវេទិកាតាមខេត្ត កាលពីថ្ងៃទី ២០ ខែមេសា ដែលមានលោក សម រង្ស៊ី ចូលរួមផងនោះ លោក កឹម សុខា បានស្នើឲ្យថ្នាក់ដឹកនាំបក្សសង្គ្រោះជាតិទាំងអស់ ត្រូវរក្សារូបភាពនយោបាយឲ្យបានច្បាស់លាស់ ប្រយ័ត្នធ្វើឲ្យគណបក្សសង្គ្រោះជាតិមានវាសនាដូចជាគណបក្ស ហ្វ៊ុនស៊ិនប៉ិច ។ លោក កឹម សុខា ថែមទាំងបញ្ជាក់ថា គណបក្សសង្គ្រោះជាតិ មិនមែនជាគណបក្សដែលហែហមគណបក្សប្រជាជនកម្ពុជានោះទេ ។ កត្តាទាំងនេះសបញ្ជាក់ឲ្យឃើញថា ស្រមោលបរាជ័យដ៏ជូរចត់របស់គណបក្ស ហ្វ៊ុនស៊ិនប៉ិច តែងស្ថិតក្នុងសតិអារម្មណ៍អ្នកគាំទ្រ និងមេដឹកនាំគណបក្សសង្គ្រោះជាតិ បើទោះបីជាតិច ឬច្រើនក្តី ហើយសម្រោលនេះ ថែមទាំងធ្វើឲ្យគណបក្សនេះ មានស្មារតីប្រុងប្រយ័ត្នជានិច្ច៕
© រក្សាសិទ្ធិដោយ thmeythmey.com
