ជាតិ
សេដ្ឋកិច្ច
លោក ហ៊ុនសែនសរសើរគម្រោងពាណិជ្ជកម្មចិនតែទិតៀនដៃគូអន្តរប៉ាស៊ីហ្វិកអាមេរិក
×![]()
ក្នុងវេទិកាសេដ្ឋកិច្ចពិភពលោកលើកទី២៤ត្រូវរៀបចំឡើងនៅក្នុងទីក្រុងហ្សាកាតាប្រទេសឥណ្ឌូនេស៊ីមានរយៈពេលបីថ្ងៃចាប់ផ្តើមពីម្សិលមិញដោយផ្តោតលើតំបន់អាស៊ីបូព៌ា។ គេសង្កេតឃើញមានវត្តមានអ្នកចូលរួមប្រហែល ៧០០នាក់មកពីប្រទេស៤០ក្នុងនោះមានបណ្តាមេដឹកនាំនៃប្រទេសជាច្រើនចូលរួមក្នុងនោះមានដូចជា ប្រមុខរដ្ឋាភិបាលកម្ពុជាលោក ហ៊ុន សែន ប្រមុខរដ្ឋឥណ្ឌូនេស៊ីលោក ចូកូ វីដូដូ ជាដើម។ ក្នុងវេទិកាសេដ្ឋកិច្ចនេះផ្តោតលើប្រធានបទជាច្រើនរួមមានបញ្ហាកំណើនសេដ្ឋកិច្ចពាណិជ្ជកម្មអន្តរជាតិ ការវិនិយោគ សន្តិសុខស្បៀង ហើយនឹងបញ្ហាប្រឈមនិងឱកាសសម្រាប់សហគមន៍សេដ្ឋកិច្ចអាស៊ានផង។ ក្នុងឱកាសនៃកិច្ចប្រជុំនេះ មេដឹកនាំឥណ្ឌូនេស៊ីឆ្លៀតទាក់ទាញអ្នកវិនិយោគមកដាក់ទុនរកស៊ីនៅឥណ្ឌូនេស៊ី ខណៈពេលដែលមេដឹកនាំកម្ពុជាជំរុញបន្ថែមចលនាសមាហរណកម្មសេដ្ឋកិច្ចតំបន់អោយស៊ីជម្រៅ ដើម្បីពង្រឹងចំណងពាណិជ្ជកម្មរួមគ្នា។
សូមស្តាប់ការបកស្រាយរបស់លោក សៅ ផលនិស្ស័យ ជុំវិញបញ្ហានេះ៖
វេទិកាសេដ្ឋកិច្ចពិភពលោកលើកទី២៤ ត្រូវរៀបចំឡើងនៅក្នុងទីក្រុងហ្សាកាតាប្រទេសឥណ្ឌូនេស៊ីដែលមានរយៈពេលបីថ្ងៃ បានចាប់ផ្តើមកាលពីម្សិលមិញ ។ កិច្ចពិភាក្សាផ្តោតលើវិស័យសេដ្ឋកិច្ចនេះ ដោយមានអ្នកចូលរួមរហូតដល់ជាង៧០០នាក់ ដែលក្នុងនោះមានមេដឹកនាំពិភពលោកជាច្រើននាក់ផងដែរ។ ក្នុងឱកាសបើកវេទិកាម្សិលមិញ គេសង្កេតឃើញមេដឹកនាំសំខាន់ពីររូបផ្តល់សុន្ទរកថាផងដែរ ក្នុងនោះមានប្រមុខរដ្ឋាភិបាលកម្ពុជាលោក ហ៊ុន សែន និង ប្រមុខរដ្ឋឥណ្ឌូនេស៊ីលោក ចូកូ វីដូដូ។ វេទិកាសេដ្ឋកិច្ចលើកទី២៤នេះដែរផ្តោតសំខាន់លើប្រធានបទសំខាន់ៗជាច្រើនដែលភាគច្រើនជាប់ពាក់ព័ន្ធបញ្ហាសេដ្ឋកិច្ច ក្នុងនោះមានការវិនិយោគ ពាណិជ្ជកម្មអន្តរជាតិ សន្តិសុខស្បៀង ហើយម្យ៉ាងផ្តោតបញ្ហាប្រឈមនិងឱកាសក្នុងសមាហរណកម្មអាស៊ានឆ្នាំ ២០១៥។
ប្រធានាធិបតីឥណ្ឌូនេស៊ីលោក ចូកូ វីដូដូ បានផ្តល់សុន្ទរកថាមួយដោយអំពាវនាវទៅកាន់បណ្តាអ្នកវិនិយោគអោយចូលមកដាក់ទុនវិនិយោគនៅក្នុងប្រទេសឥណ្ឌូនេស៊ី។ ប្រមុខរដ្ឋឥណ្ឌូនេស៊ីរូបនេះបានអះអាងថា រដ្ឋាភិបាលរបស់លោកនឹងនាំមកនូវការកែទម្រង់សេដ្ឋកិច្ច នៅក្នុងប្រទេសដើម្បីធ្វើយ៉ាងណាកែលំអរ និងសម្រួលដល់ការវិនិយោគរបស់អ្នកជំនួញបរទេស។ គេសង្កេតឃើញលោក វីដូដូ បានព្រលយពាក្យមួយឃ្លាដែលបង្ហាញពីការទាក់ទាញ និងលើកទឹកចិត្តអ្នកវិនិយោគបរទេស ដោយលើកឡើងថា បើសិនជាក្រុមហ៊ុន ឬអ្នកវិនិយោគប្រឈមបញ្ហា អាចទាក់ទងលោកផ្ទាល់បាន។ ចាប់តាំងពីឡើងកាន់តំណែងរយៈពេលជាង៦ខែមក អតីតអភិបាលក្រុងហ្សាកាតារូបនេះ ស្វះស្វែងទាក់ទាញអ្នកវិនិយោគក្នុងតំបន់ និងអន្តរជាតិ អោយមកវិនិយោគលើគម្រោងហេដ្ឋារចនាសម្ព័ន្ធរូបវ័ន្តដើម្បីធ្វើអោយវិស័យឧស្សាហកម្មឥណ្ឌូនេស៊ីកាន់តែល្អប្រសើរនិងទំនើប។ លោក ក៏ឆ្លៀតបញ្ជាក់ពីសារសំខាន់នៃធនធានមនុស្សក្នុងការជំរុញកំណើនសេដ្ឋកិច្ច ហើយការបណ្តាក់ទុននៅក្នុងប្រទេសឥណ្ឌូនេស៊ី អាចនឹងធានាថាសេដ្ឋកិច្ចប្រទេសនេះអាចបន្តរីកលូតលាស់ល្អប្រសើរនិងនិរន្តរភាព។លោក វីដូដូ បានឆ្លៀតឱកាសលើកឡើងពីបញ្ហាប្រឈមផ្នែកសេដ្ឋកិច្ចរបស់ឥណ្ឌូនេស៊ីផងដែរ ហើយលោកបង្ហាញពីការភ័យខ្លាចចំពោះការធ្លាក់ចុះនៃសេដ្ឋកិច្ចឥណ្ឌូនេស៊ី បើគ្មានវិធានការនិងដំណោះស្រាយទេនោះ។ ឥណ្ឌូនេស៊ីប្រឈមមុខបញ្ហាប្រឈមមួយចំនួនដែលរុកគួននសេដ្ឋកិច្ចប្រទេសនេះក្នុងនោះមានបញ្ហាពុករលួយ ភាពផុយស្រួល និងអន់ខ្សោយនៃរូបីយវត្ថុជាតិ និងមួយវិញទៀតគឺការធ្លាក់ចុះនៃតម្លៃផលិតផលជាដើម។ យ៉ាងណាក៏ដោយ ក្នុងសុន្ទរកថាម្សិលមិញ លោក វីដូដូ មិនបានលើកឡើងពីសមាហរណកម្មសេដ្ឋកិច្ចអាស៊ាន ឆ្នាំ ២០១៥ និងតួនាទីរបស់ប្រទេសឥណ្ឌូនេស៊ីក្នុងការជំរុញដំណើរការសមាហកម្មសេដ្ឋកិច្ច និងធានាពីនិរន្តរភាពនៃការកសាងសហគមន៍រួមគ្នារវាងប្រទេសទាំង១០ឡើយ។
ដោយឡែក នាយករដ្ឋមន្ត្រីកម្ពុជាក៏បានលើកឡើងពីការជំរុញការសហប្រតិបត្តិការ និងការធ្វើសមាហរណកម្មពាណិជ្ជកម្មនៅក្នុងតំបន់អោយកាន់តែស៊ីជម្រៅ។ កិច្ចពិភាក្សាពាណិជ្ជកម្មតំបន់និងការធ្វើសមាហរណកម្មសេដ្ឋកិច្ច ជាចំណុចសំខាន់ និងអាទិភាពប៉ុន្តែវាក៏ជាបញ្ហាប្រឈមផងដែរព្រោះគំនិតផ្តួចផ្តើមបង្កើតអោយមានតំបន់ពាណិជ្ជកម្មសេរីនេះត្រូវបានប្រើប្រាស់ដើម្បីប្រកួតប្រជែងផលប្រយោជន៍រវាងមហាអំណាចធំ។ លោកបានឆ្លៀតឱកាសប្រៀបធៀប យន្តការពាណិជ្ជកម្មសេរីពីរធំៗដែលកំពុងស្ថិតក្រោមការចរចាគ្នានៅឡើយ ក្នុងនោះមានដៃគូសេដ្ឋកិច្ចអន្តរប៉ាស៊ីហ្វិកដែលស្នើឡើងដោយរដ្ឋាភិបាលក្រុងវ៉ាស៊ីនតោន និងមួយទៀត គឺដៃគូសេដ្ឋកិច្ចគ្រប់ជ្រុងជ្រោយក្នុងតំបន់ដែលដឹកនាំដោយក្រុងប៉េកាំង។ លោកនាយករដ្ឋមន្ត្រី ហ៊ុន សែន បានចោទជាសំណួរផងដែរ ដោយសារភាពជាដៃគូអន្តរប៉ាស៊ីហ្វិកដឹកនាំដោយអាមេរិកមានសមាជិកអាស៊ានមួយចំនួនប៉ុណ្ណោះចូលរួម ខណៈសមាជិកពាក់កណ្តាលទៀតស្ថិតនៅក្រៅ ដែលវាផ្ទុយពីគម្រោងស្នើឡើងដោយចិនកាលពីឆ្នាំ ២០១២ក្នុងពេលកម្ពុជាជាប្រធានអាស៊ាន គឺភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់មានសមាជិកអាស៊ានទាំង ១០ បូកដៃគូសន្ទនា ៦ផ្សេងទៀត។
ក្នុងភ្នែកអ្នកវិភាគមួយចំនួន លោក ហ៊ុនសែន ហាក់ដូចជារិះគន់ក្រុងវ៉ាស៊ីនតោនផងដែរ ព្រោះលោកបញ្ជាក់ថា លោកមិនដឹងថាក្រុងវ៉ាស៊ីនតោនមានចេតនាអ្វីពិតប្រាកដឡើយក្នុងការបង្កើតគម្រោងពាណិជ្ជកម្មសេរី ប៉ុន្តែបែរជាមិនមានប្រទេសអាស៊ានទាំងអស់ជាសមាជិកទៅវិញ។ លោកទំនងជាចង់បញ្ជាក់ថា អាមេរិកព្យាយាមធ្វើអោយមានការបែកបាក់គ្នារវាងសមាជិកអាស៊ានផង។ ផ្ទុយទៅវិញលោកបានព្យាយាមសរសើរគំនិតផ្តួចផ្តើមរបស់ចិនដែលអាចជំរុញការដោះស្រាយបញ្ហាសេដ្ឋកិច្ចអោយកាន់តែមានប្រសិទ្ធភាពនិងបង្កើឱកាសវិនិយោគនិងពាណិជ្ជកម្មនៅក្នុងតំបន់ តាមរយៈការសហការជាមួយសមាជិកអាស៊ានទាំង១០ ។ ចំណែកអ្នកវិភាគមួយចំនួនផ្សេងទៀតយល់ថា ការលើកឡើងរបស់លោក ហ៊ុន សែន ដែលថា គម្រោងកិច្ចព្រមព្រៀងពាណិជ្ជកម្មសេរីថ្មីរបស់អាមេរិក មានតែសមាជិកអាស៊ានខ្លះចូលរួម ទុកសមាជិកពាក់កណ្តាលនៅក្រៅ បញ្ជាក់ថា លោកចង់អោយកម្ពុជានិងប្រទេសអាស៊ានមួយចំនួនទៀតត្រូវគេរាប់បញ្ចូលក្នុងយន្តការសេដ្ឋកិច្ចថ្មីរបស់អាមេរិកនេះទៅវិញ។ តាមពិតទៅ ជុំវិញការទិតៀនរឿងទុកសមាជិកអាស៊ានខ្លះនៅក្រៅគម្រោងនេះ អាមេរិកបានបកស្រាយហើយ ខ្លួនស្វាគមន៍រាល់ភាគី ប៉ុន្តែដើម្បីក្លាយជាសមាជិក ប្រទេសនីមួយៗត្រូវតែមានលក្ខណៈសម្បត្តិគ្រប់គ្រាន់ និងត្រៀមខ្លួនរួចរាល់ដើម្បីជាសមាជិក។
បើទោះជាមានមតិផ្សេងគ្នាចំពោះសុន្ទរកថារបស់លោកនាយករដ្ឋមន្ត្រី ហ៊ុនសែនក៏ដោយ អ្វីដែលសំខាន់សម្រាប់ពិចារណានិងយកមកអនុវត្តនោះគឺលោក ហ៊ុន សែន បានស្នើអោយមហាអំណាចទាំងពីរដែលមានគំនិតផ្តួចផ្តើមបង្កើតយន្តការពាណិជ្ជកម្មរាងៗខ្លួននោះ មិនគួរព្យាយាមប្រជែងគ្នាឡើយ តែគួរជ្រើសរើសការសហការនិងបំពេញគ្នាទៅវិញទៅមកទើបជាការល្អប្រសើរក្នុងការដោះស្រាយបញ្ហាប្រឈមសេដ្ឋកិច្ច។
© រក្សាសិទ្ធិដោយ thmeythmey.com
