ជាតិ
ក្រសួងអប់រំ ជ្រើសរើសនិស្សិតអាហារូបករណ៍ទៅសិក្សានៅសិង្ហបូរីចំនួន៤២០កន្លែង
× ក្រសួងអប់រំយុវជន និងកីឡា បានប្រកាសជ្រើសរើសនិស្សិតអាហារូបករណ៍សិក្សាថ្នាក់ក្រោយឧត្តមសិក្សា និងថ្នាក់ឧត្តមសិក្សា នៅសាធារណរដ្ឋសិង្ហបូរី នៅឆ្នាំ២០១៥នេះ ចំនួន៤២០កន្លែងដែលស្របតាមកម្មវិធីសិក្សានៃវិទ្យាស្ថានគ្រប់គ្រងអាស៊ីបូព៌ា PTELTD (EASB)ជាស្ថាប័នអប់រំឯកជនស្របច្បាប់មួយនៃប្រទេសសិង្ហបូរី។
ដោយមានអនុស្សរណៈយោគយល់គ្នា រវាងក្រសួងអប់រំយុវជន និងកីឡា ជាមួយវិទ្យាស្ថានគ្រប់គ្រងអាស៊ីបូព៌ា PTELTD (EASB) នៃប្រទេសសិង្ហបូរី ក្រសួងអប់រំយុវជន និងកីឡា នឹងធ្វើការជ្រើសរើសនិស្សិតអាហារូបករណ៍ទៅសិក្សានៅប្រទេសសិង្ហបូរីថ្នាក់ក្រោយឧត្តមសិក្សា និងថ្នាក់ឧត្តមសិក្សាចំនួន ០៣ប្រភេទ សរុបចំនួន៤២០កន្លែង។
កម្មវិធីសិក្សានោះរួមមាន៖ អាហារូបករណ៍ថ្នាក់ក្រោយឧត្តមសិក្សាផ្នែកគ្រប់គ្រង ចំនួន២០កន្លែង សិក្សារយៈពេល០៣ខែ អាហារូបករណ៍អភិវឌ្ឍសាស្ត្រាចារ្យតាមសាកលវិទ្យាល័យ ចំនួន១០០កន្លែង សិក្សារយៈពេល ០២ខែ អាហារូបករណ៍ថ្នាក់ឧត្តមសិក្សា ចំនួន ៣០០កន្លែង សិក្សារយៈពេល ០៦ខែ រហូតដល់០៣ឆ្នាំ។
ចំពោះអាហារូបករណ៍ថ្នាក់ក្រោយឧត្តមសិក្សា និងអាហារូបករណ៍អភិវឌ្ឍន៍សាស្ត្រាចារ្យតាមសាកលវិទ្យាល័យ ត្រូវបាន EASBចេញថ្លៃសិក្សា ថ្លៃសំបុត្រយន្តហោះទៅ-មកវិញ និងថ្លៃអាហារ-ស្នាក់នៅ ព្រមទាំងថ្លៃធ្វើដំណើរពីកន្លែងស្នាក់នៅទៅកន្លែងសិក្សា ។ ចំណែកឯ កម្មវិធីអាហារូបករណ៍ថ្នាក់ឧត្តមសិក្សារូមមាន៖ កម្មវិធីផ្តល់អាហារូបករណ៍ ៧០%(Partial Scholarship) នៃថ្លៃសិក្សា កម្មវិធីអាហារូបករណ៍ទម្រង់ ៨០% ចំនួន២៤០កន្លែង និងកម្មវិធីអាហារូបករណ៍ទម្រង់ ២០% ក្នុង១០០% (Full Scholarship) ដោយកម្មវីធីអាហារូបករណ៍ទាំងពីរប្រភេទ គឺ (Partial Scholarship )និង(Full Scholarship )ត្រូវបានចេញថ្លៃសំបុត្រយន្តហោះទៅ-មកនិងបញ្ចុះតម្លៃជូន៥០% សម្រាប់ថ្លៃអាហារ និងកន្លែងស្នាក់នៅ។
ការជ្រើសរើសនិស្សិតទៅសិក្សានៅប្រទេសសិង្ហបូរីនេះ គឺជាចក្ខុវិស័យសម្រាប់ការអភិវឌ្ឃធនធានមនុស្សប្រកបដោយគុណភាពខ្ពស់ និងក្រមសីធម៌នៃប្រទេសកម្ពុជា ដែលក្រសួងអប់រំយុវជន និងកីឡា និងវិទ្យាស្ថានគ្រប់គ្រងអាស៊ីបូព៌ា បានចុះអនុស្សរណៈយោគយល់គ្នា កាលពីថ្ងៃទី១៣ ខែមិនា ឆ្នាំ២០១៥ ៕
© រក្សាសិទ្ធិដោយ thmeythmey.com