អន្តរជាតិ
ន័រវេសជាប្រទេសទី១ដែលប្រកាសឈប់ប្រើវិទ្យុ FM ចាប់ពីឆ្នាំ២០១៧
× រដ្ឋាភិបាលនៃប្រទេសន័រវេស បានប្រកាសពីការផ្លាស់ប្តូរមួយ ដើម្បីបញ្ឈប់ការប្រើប្រាស់វិទ្យុ ដែលចាប់រលកសញ្ញាប្រេកង់តាមឆាណែល FM ហើយប្ដូរទៅប្រើប្រាស់វិទ្យុ Digital នៅទូទាំងប្រទេសនៅត្រឹមឆ្នាំ ២០១៧ ខាងមុខនេះវិញ។ នេះបើយោងតាម CNBC ។
នៅក្នុងសេចក្តីប្រកាសព័ត៌មានមួយ កាលពីសប្តាហ៍មុន រដ្ឋាភិបាលប្រទេសន័រវេស បាន និយាយថា លក្ខណៈវិនិច្ឆ័យសម្រាប់ការផ្លាស់ប្តូរបច្ចេកវិទ្យារលកសញ្ញាវិទ្យុថ្មី ត្រូវបានគេបំពេញរួចរាល់ហើយ។ បើតាមរដ្ឋាភិបាលន័រវេស វិទ្យុ Digital អាចចាប់បាន ៤២ ប៉ុស្តិ៍ ដែលផ្ទុយពីប្រព័ន្ធវិទ្យុ FM ដែលអាចចាប់ប៉ុស្ដិ៍ជាតិបានតែ ៥ ប៉ុស្ដិ៍តែប៉ុណ្ណោះ។
បន្ថែមពីលើពីលើការចាប់ប៉ុស្ដិ៍បានច្រើននេះ តម្លៃនៃការបញ្ជូនរលកសញ្ញាតាមរយៈបណ្តាញវិទ្យុ FM គឺថ្លៃខ្ពស់ជាង ការបញ្ជូនតាម Digital ដល់ទៅ ៥ ដង ដែលនឹងនាំឱ្យរដ្ឋាភិបាលន័រវេសអាចសន្សំប្រាក់បានជាង ២៥ លានដុល្លារជារៀងរាល់ឆ្នាំ ។
រដ្ឋមន្ត្រីក្រសួងវប្បធម៌ន័រវេស លោក Thorhild Widvey បានឱ្យដឹងថា វិទ្យុ Digital មានកម្លាំងផ្សាយខ្លាំងជាងបណ្តាញវិទ្យុ FM ដែលអាចផ្ដល់ភាពងាយស្រួល និងអត្ថប្រយោជន៍ជាច្រើន សម្រាប់អ្នកស្តាប់វិទ្យុនៅទូទាំងប្រទេស។ លោកបានបន្ថែមថា អ្នកស្តាប់នឹងទទួលបានការស្ដាប់មាតិកាវិទ្យុច្រើនជាងមុន ដែលមានភាពចម្រុះ និងពហុនិយម ហើយពួកគេនឹងរីករាយជាមួយគុណភាព និងមុខងារថ្មីសំឡេងវិទ្យុល្អប្រសើរជាងមុន។
រដ្ឋាភិបាលន័រវេសបានកំណត់លក្ខណៈវិនិច្ឆ័យ មួយចំនួនដើម្បីបំពេញការផ្លាស់ប្ដូររលកប្រេកង់វិទ្យុ នៅមុនពេលការផ្លាស់ប្តូរទាំងស្រុងនៅឆ្នាំ ២០១៧ ខាងមុខនេះ។ ចំណែកឯតំលៃនៃការប្រើវិទ្យុ Digital ត្រូវតែសមរម្យ និងអាចប្រើបាននៅក្នុងរថយន្ត ហើយយ៉ាងហោចណាស់ពាក់កណ្តាលនៃចំនួនអ្នកស្តាប់វិទ្យុប្រចាំថ្ងៃទាំងអស់ បានស្តាប់វិទ្យុតាមប្រព័ន្ធ Digital ៕
© រក្សាសិទ្ធិដោយ thmeythmey.com