ជាតិ
នយោបាយជាតិ
លោក ហ៊ុន សែន និងលោក សម រង្ស៊ី ណាត់គ្នាសំណេះសំណាលជាមួយពលករខ្មែរនៅម៉ាឡេស៊ីនារសៀលនេះ
× ត្រឹមតែមួយថ្ងៃនាពិធីបើកអង្គរសង្ក្រាន្តនៅខេត្តសៀមរាបកាលពីថ្ងៃទី១៤ ខែមេសា មិនគ្រប់គ្រាន់នោះឡើយសម្រាប់លោកនាយករដ្ឋមន្ត្រី ហ៊ុន សែន និង ប្រធានបក្សប្រឆាំង លោក សម រង្ស៊ី ដើម្បីបង្ហាញពីផ្លែផ្កានៃវប្បធម៌សន្ទនា។ អ្នកនយោបាយកំពូលទាំងពីរ នារសៀលថ្ងៃទី២៥ ខែមេសា នេះ នឹងបង្ហាញវត្តមានជាមួយស្នាមញញឹមរួមគ្នាជាលើកដំបូងបំផុតនៅក្រៅប្រទេស។
បើតាមលោក សម រង្ស៊ី ដែលជាប្រធានក្រុមតំណាងរាស្ត្រភាគតិចនៅរដ្ឋសភា និងមានឋានៈស្មើនាយករដ្ឋមន្ត្រីផងដែរនោះ លោក ហ៊ុន សែន និងរូបលោកផ្ទាល់ នឹងជួបសំណេះសំណាលជាមួយពលករខ្មែររស់នៅប្រទេសម៉ាឡេស៊ី នារសៀលថ្ងៃទី២៥ ខែមេសា ឆ្នាំ២០១៥ នៅសណ្ឋាគារ Hilton Double Tree។
បន្ទាប់ពីត្រូវរ៉ូវគ្នាក្នុងការជ្រើសរើសសមាជិកថ្មីនៃគណៈកម្មាធិការជាតិរៀបចំការបោះឆ្នោត (គ.ជ.ប) លោក ហ៊ុន សែន និងលោក សម រង្ស៊ី បានបង្ហាញវត្តមានរួមគ្នាជាលើកដំបូងនៅក្នុងព្រឹត្តិការណ៍អង្គរសង្ក្រាន្ត ដោយពិសារនំអន្សមយក្សជាមួយគ្នា កិនម្សៅជាមួយគ្នា និងដើរមើលទិដ្ឋភាពនៃអង្គរសង្ក្រាន្តជាមួយគ្នា ប្រកបដោយស្នាមញញឹម បិទមាត់មិនជិត។
វប្បធម៌សន្ទនាដែលមេដឹកនាំនយោបាយទាំងពីរប្រើប្រាស់ឡើងដើម្បីលុបបំបាត់នយោបាយ «ទឹកឡើងត្រីស៊ីស្រមោច ទឹកហោចស្រមោចស៊ីត្រី» នោះ ទទួលបាននូវការអបអរផង និងការរិះគន់ផង។ ក្រុមអ្នករីករាយយល់ឃើញថា វប្បធម៌សន្ទនា «មានសែន មានស៊ី» នឹងធ្វើឲ្យប្រទេសជាតិទទួលក្តីសុខ ដោយមេដឹកនាំទាំងពីររួមគ្នាអភិវឌ្ឍន៍ជាតិ។ ប៉ុន្តែស្របពេលជាមួយគ្នា ក្រុមអ្នករិះគន់លើកឡើងថា គណបក្សសង្គ្រោះជាតិអាចនឹងមានវាសនាដូចគណបក្សហ្វ៊ុនស៊ិនប៉ិច ដោយសារឥរិយាបថរបស់មេដឹកនាំបក្សប្រឆាំងពេលនេះ។ ចំពោះការរិះគន់នេះ ត្រូវបានលោក សម រង្ស៊ី បកស្រាយថា វត្តមានរបស់លោកជាមួយលោកនាយករដ្ឋមន្ត្រី ហ៊ុន សែន កន្លងមកនេះ គឺជាវប្បធម៌សន្ទនាដើម្បីស្តារប្រទេសជាតិឡើងវិញ ពោល គឺមិនធ្វើអោយជាតិរលាយដូចជំនាន់គណបក្សហ្វ៊ុនស៊ិនប៉ិចនោះទេ។
គួរបញ្ជាក់ថា លោក ហ៊ុន សែន ត្រូវចូលរួមក្នុងកិច្ចប្រជុំកំពូលអាស៊ានលើកទី២៦ពីថ្ងៃទី២៦ ដល់ថ្ងៃទី២៧ ខែមេសា ដោយម៉ាឡេស៊ីធ្វើជាម្ចាស់ផ្ទះ ពោលគឺបន្ទាប់ពីលោកបានចូលរួមក្នុងកិច្ចប្រជុំកំពូលភាពជាដៃគូយុទ្ធសាស្ត្រអាស៊ី-អាហ្វ្រិកនៅប្រទេសឥណ្ឌូនេស៊ី។ ដោយឡែក លោក សម រង្ស៊ី មានវត្តមាននៅទីក្រុងគូឡាឡាំពួរផងដែរដើម្បីចូលរួមប្រជុំជាមួយថ្នាក់ដឹកនាំក្រុមប្រឹក្សាសេរី និងប្រជាធិតេយ្យនៅអាស៊ី (CALD)៕
© រក្សាសិទ្ធិដោយ thmeythmey.com