អន្តរជាតិ
ត្បូងពេជ្រទំហំ១០០ការ៉ាត់លក់បានតម្លៃ២២លានដុល្លារបន្ទាប់ពីដេញថ្លៃបាន ៣ នាទី
× ត្បូងពេជ្រដ៏ធំមួយគ្រាប់ដែលមានទំហំដល់ទៅ ១០០ ការ៉ាត់ ត្រូវបានគេលក់បានក្នុងតម្លៃ ២២,១ លានដុល្លារ ក្នុងរយៈពេលតែ ៣ នាទី បន្ទាប់ពីការដេញថ្លៃចាប់ផ្ដើម ដែលបានធ្វើឱ្យពេជ្រគ្មានពណ៌មួយនេះ ក្លាយជាត្បូងពេជ្រមានតម្លៃជាងគេមិនធ្លាប់ដាក់ដេញថ្លៃនៅញូវយ៉ក។ នេះបើយោងតាម CNBC ។
ប្រភពដដែលក៏បានឲ្យដឹងថា ត្បូងពេជ្រដ៏ធំនេះ ស្ថិតក្នុងថ្មប្រណីតប្រភេទ IIa ដែលជាប្រភេទថ្មមានតម្លៃដែលសុទ្ធល្អជាងគេ និងដ៏មានតម្លៃថ្លៃបំផុត ក្នុងចំណោមត្បូងពេជ្រជាច្រើន ដែលត្រូវបានគេដាក់ដេញថ្លៃនៅក្នុងមជ្ឈមណ្ឌលដេញថ្លៃ Sotheby's Magnificent Jewels ក្នុងទីក្រុងញូវយ៉ក។
នៅមុនការដេញថ្លៃត្បូងពេជ្រនេះ អ្នកជំនាញបានរំពឹងថាវានឹងត្រូវគេលក់ក្នុងតម្លៃ ចន្លោះពី ១៩ ទៅ ២៥ លានដុល្លារ។ ក្រុមហ៊ុនដេញថ្លៃ Sotheby បានឱ្យដឹងថា អ្នកដែលឈ្នះការដេញថ្លៃ បានចូលរួមក្នុងការដេញថ្លៃតាមរយៈទូរសព្ទ ហើយគេមិនចង់បង្ហាញអត្តសញ្ញាណនោះទេ។
បើតាមក្រុមហ៊ុន Sotheby មានត្បូងពេជ្រដែលល្អឥតខ្ចោះ មានទំងន់ជាង ១០០ ការ៉ាត់ចំនួន តែគ្រាប់ប៉ុណ្ណោះ ត្រូវបានគេដាក់លក់ដេញថ្លៃក្នុងរយៈពេល ២៥ ឆ្នាំចុងក្រោយនេះ។ ក្រុមហ៊ុនដេញថ្លៃនេះ បានបញ្ជាក់នៅក្នុងសេចក្តីប្រកាសព័ត៌មានមួយថា ពណ៌របស់ត្បូងពេជ្រនេះមាន គុណភាព D ដែលជាលក្ខណៈពិសេស និងជាត្បូងពេជ្រកម្រមិនគួរឱ្យជឿ ហើយត្រូវបានចាត់ទុកថាជាប្រភេទត្បូងពេជ្រ«ល្អឥតខ្ចោះ» មួយផងដែរ៕
© រក្សាសិទ្ធិដោយ thmeythmey.com