ជាតិ
សហភាពអឺរ៉ុបនឹងរៀបចំ«ទិវាអឺរ៉ុបឆ្នាំ ២០១៥»នៅកម្ពុជា
× ភ្នំពេញ៖ ចាប់ពីថ្ងៃទី៤ ដល់ថ្ងៃទី ១០ ខែឧសភា ខាងមុខនេះ សហភាពអឺរ៉ុបប្រចាំកម្ពុជា នឹងរៀបចំកម្មវិធីកម្សាន្តនានានៅកម្ពុជា ក្នុងគោលបំណងសាទរទិវាអឺរ៉ុបឆ្នាំ ២០១៥ ។ នេះបើយោងតាមសេចក្តីជូនដំណឹងរបស់ប្រតិភូសហភាពអឺរ៉ុបប្រចាំកម្ពុជា។
ប្រតិភូសហភាពអឺរ៉ុបប្រចាំប្រទេសកម្ពុជានឹងរៀបចំកម្មវិធីកម្សាន្តជាច្រើន ក្នុងទិវាអឺរ៉ុបនៅឆ្នាំ២០១៥នេះ ក្នុងនោះ រួមមាន ទី១, ការតាំងពិព័រណ៍អឺរ៉ុប ទី២, កម្មវិធីសំណួរចម្លើយរវាង ឯកអគ្គរដ្ឋទូតនៃសហភាពអឺរ៉ុប និងនិស្សិតនៅតាមគ្រឹះស្ថានសិក្សានានា ទី៣, វេទិកាឧត្តមសិក្សារវាងសហភាពអឺរ៉ុប និងកម្ពុជា ទី៤, កម្មវិធីជិះកង់ទេសចរណ៍ និងទី៥,ការប្រគុំតន្ត្រី នៅសួនច្បារបទុមវត្តី ជាដើម។
យោងតាមសេចក្តីជូនដំណឹង ប្រជាជនជាង ៥០០លាននាក់ក្នុងតំបន់អឺរ៉ុបតែងតែរៀបចំ ព្រឹត្តិការណ៍នេះឡើងនៅថ្ងៃទី៩ ខែឧសភា ជារៀងរាល់ឆ្នាំ។ ទិវានេះមានគោលបំណងសាទរ ដល់ការបញ្ចប់សង្គ្រាម និងសន្ដិភាពក្នុងទ្វីបអឺរ៉ុបទាំងមូល៕
© រក្សាសិទ្ធិដោយ thmeythmey.com