ជាតិ
បទវិភាគ
លោក សម រង្ស៊ី ប្រហែលជាចង់ឲ្យគេហៅ «ប្រធានក្រុមតំណាងរាស្ត្រភាគតិច» ជាង «ប្រធានបក្សប្រឆាំង» លោក សម រង្ស៊ី និងលោក ហ៊ុន សែន នាជំនួបជាមួយខ្មែរនៅម៉ាឡេស៊ី កាលពីថ្ងៃទី២៥ ខែមេសា ឆ្នាំ២០១៥
× នារយៈពេលចុងក្រោយនេះ គេមិនសូវលឺលោក សម រង្ស៊ី ឧទ្ទេសនាមខ្លួនឯងថាជា «ប្រធានគណបក្សប្រឆាំង» ឡើយ ដោយលោកនិយមប្រើពាក្យ «ប្រធានក្រុមតំណាងរាស្ត្រភាគតិច» ជំនួសវិញ។ ការប្រើប្រាស់ពាក្យបែបនេះ ប្រហែលជាលោក សម រង្ស៊ី មិនចង់ឃើញគម្លាតរវាងលោក និងលោកនាយករដ្ឋមន្ត្រី ហ៊ុន សែន ខណៈមេដឹកនាំទាំងពីរកំពុងនាំគ្នាសាបព្រោះវប្បធម៌សន្ទនា។
កាលពីចុងឆ្នាំ២០១៤ លោក សម រង្ស៊ី ត្រូវបានសភាអនុម័តឲ្យក្លាយជាប្រធានក្រុមតំណាងរាស្ត្រភាគតិចនៃរដ្ឋសភា ដែលមានឋានៈស្មើនាយករដ្ឋមន្ត្រី។ ដូចជាព្រះម្ចាស់ នរោត្តម រណឫទ្ធិ ផងដែរ ដែលទទួលបានឋានៈស្មើនេះ ក្នុងនាមជាប្រធានឧត្តមក្រុមប្រឹក្សាជាន់ខ្ពស់ព្រះមហាក្សត្រ លោក សម រង្ស៊ី មិនអាចប្រើប្រាស់ឋានៈទៅបញ្ជារដ្ឋាភិបាល ឬយោធាបានឡើយ។ ទោះបីជាយ៉ាងណាក៏ដោយ ខណៈដែលបក្សជាប់ឆ្នោតទាំងពីរនាំគ្នាស្វែងរកគន្លឹះបញ្ចប់ភាពតានតឹងផ្នែកនយោបាយ ប្រធានគណបក្សសង្គ្រោះជាតិ បានប្រើប្រាស់ឋានៈប្រធានក្រុមតំណាងរាស្ត្រភាគតិច ទៅធ្វើជាដៃគូសន្ទនាជាមួយថ្នាក់ដឹកនាំរដ្ឋាភិបាល ដែលមានលោកឧបនាយករដ្ឋមន្ត្រី ស ខេង និងលោកនាយករដ្ឋមន្ត្រី ហ៊ុន សែន ផ្ទាល់។
ការឈានទៅកាន់ជ្រើសរើសសមាសភាពថ្មីទាំង៩រូបសម្រាប់ដឹកនាំគណៈកម្មាធិការជាតិរៀបចំការបោះឆ្នោត (គ.ជ.ប) ការដោះលែងសកម្មជននយោបាយ និងដីធ្លី ចេញពីពន្ធនាគារ ជាដើមនោះ ត្រូវបានលោក សម រង្ស៊ី អះអាងថា កើតចេញពីវប្បធម៌សន្ទនា។ លោក ហ៊ុន សែន ក៏បានអះអាងផងដែរថា ផ្លែផ្កានៃវប្បធម៌សន្ទនា បានធ្វើឲ្យស្ថានភាពប្រឈមផ្នែកនយោបាយនៅកម្ពុជាឈានដល់ទីបញ្ចប់។
ការចេញពីអង្គប្រជុំសភារួមគ្នាទាំងមុខញញឹម វត្តមានរួមគ្នានាព្រឹត្តិការណ៍អង្គរសង្ក្រាន្ត និងការនាំគ្នាទៅសំណះសំណាលជាមួយពលរដ្ឋខ្មែរនៅប្រទេសម៉ាឡេស៊ី បានបង្ហាញឲ្យឃើញថា វប្បធម៌សន្ទនាពិតជាបោះជំហានទៅមុខ។ លោក សម រង្ស៊ី ថែមទាំងនិយាយថា វប្បធម៌ត្រូវបានប្រទេសជាច្រើនយកធ្វើជាគំរូ ខណៈលោក ហ៊ុន សែន លើកឡើងថា ដីកម្ពុជាមិនមែនជាកម្មសិទ្ធិផ្តាច់មុខរបស់អ្នកណាឡើយ ដូច្នេះការមិនយកគ្នាជាសត្រូវគឺយន្តការដ៏ពិសេសមួយ។
ខណៈដែលលោក សម រង្ស៊ី ចូលចិត្តឲ្យឈ្មោះខ្លួនឯងថាជា «ប្រធានក្រុមតំណាងរាស្ត្រភាគតិច» លោកនាយករដ្ឋមន្ត្រី ហ៊ុន សែន ក៏និយមហៅគណបក្សសង្គ្រោះជាតិថា ជា «គណបក្សក្រៅរដ្ឋាភិបាល» ពោលគឺមិនសូវហៅ «គណបក្សប្រឆាំង ឬគណបក្សជំទាស» ដូចមុននោះឡើយ។
តើគណបក្សសង្គ្រោះជាតិលែងក្លាយជាគណបក្សប្រឆាំង ហើយដើរតាមលំអានរបស់គណបក្សហ្វ៊ុនស៊ិនប៉ិច ឬយ៉ាងណា? លោក សម រង្ស៊ី បានបង្ហាញជំហរថា វប្បធម៌គឺដើម្បីស្វែងរកផលប្រយោជន៍ ដោយមិនធ្វើឲ្យជាតិរលាយនោះឡើយ។
ស្របពេលជាមួយគ្នា លោក កឹម សុខា អនុប្រធានគណបក្សសង្គ្រោះជាតិ បានអះអាងថា វប្បធម៌សន្ទនាគឺជាយន្តការមួយដើម្បីឲ្យបក្សនយោបាយចេះដោះស្រាយបញ្ហាដោយសន្តិវិធី តាមរយៈការជួបសន្ទនាគ្នា។ ប៉ុន្តែលោកក៏បានបញ្ជាក់ផងដែរថា វាមិនមែនជាយន្តការប្រជាធិបតេយ្យនោះទេ ហើយគណបក្សរបស់លោកនៅតែបន្តរិះគន់ចំណុចខ្វះខាត និងអសកម្មរបស់រដ្ឋាភិបាល៕
© រក្សាសិទ្ធិដោយ thmeythmey.com