ជាតិ
បទវិភាគ
នយោបាយជាតិ
តើសេដ្ឋកិច្ចអាស៊ានរួមចុងឆ្នាំ ២០១៥ គឺជាការជូនពរដល់កម្ពុជា ឬជាការដាក់បណ្តាសារ?
×
ភ្នំពេញ៖ សហគមន៍សេដ្ឋកិច្ចអាស៊ានរួមនឹងចាប់ផ្តើមដាក់អោយដំណើរការនៅចុងឆ្នាំ២០១៥ខាង មុខនេះ។ សហគមន៍សេដ្ឋកិច្ចអាស៊ានមានគោលដៅធ្វើអោយអាស៊ានក្លាយជាទីផ្សារ និងមូលដ្ឋានផលិតកម្មរួមគ្នាតែមួយដើម្បីជំរុញតំបន់នេះអោយមានលក្ខណៈប្រកួតប្រជែង និងមានសន្ទុះសេដ្ឋកិច្ចខ្លាំងជាងមុន។ សហគមន៍សេដ្ឋកិច្ចអាស៊ានផ្តល់ឱកាសច្រើនគួរសម។ ប៉ុន្តែកម្ពុជាមិនទាន់អាចទាញប្រយោជន៍បានច្រើនទេ។ អ្វីដែលកម្ពុជាប្រឈម គឺក្រុមហ៊ុនបរទេសមួយចំនួនធំនឹងមកដណ្តើមទីផ្សារនៅក្នុងប្រទេសកម្ពុជា និងម្យ៉ាងទៀត កម្លាំងពលកម្មខ្មែរអាចនឹងរត់ទៅធ្វើការអោយក្រុមហ៊ុនបរទេសជាជាងធ្វើការអោយក្រុមហ៊ុនខ្មែរ។
មានសំឡេង
សមាគមប្រជាជាតិអាស៊ីអាគ្នេយ៍ឬហៅកាត់ថា អាស៊ាន ត្រូវបានបង្កើតឡើងនៅឆ្នាំ១៩៦៧នៅក្នុងប្រទេសថៃ។ សមាជិកចាស់របស់អាស៊ានមាន៦ប្រទេស ក្នុងនោះ មាន៖ ប្រទេសថៃ ប្រ៊ុយណេ ឥណ្ឌូនេស៊ី សិង្ហបុរី ម៉ាឡេស៊ី និងហ្វីលីពីន។ រីឯសមាជិកថ្មី៤ទៀត មានដូចជា ប្រទេស ប្រទេសវៀតណាម ឡាវ ភូមា និងប្រទេសកម្ពុជា។ កម្ពុជាគឺជាកូនពៅរបស់អាស៊ានដែលបានសម្រេចចិត្តចូលជាសមាជិក ក្រោយគេបង្អស់នៅឆ្នាំ១៩៩៩ ។
គួរកត់សម្គាល់ថា ៤៨ឆ្នាំក្រោយការបង្កើតសមាគមអាស៊ាន សហគមន៍សេដ្ឋកិច្ចអាស៊ានរួមនឹងត្រូវបង្កើតឡើងនៅចុងឆ្នាំ២០១៥ខាងមុខនេះ។ សហគមន៍សេដ្ឋកិច្ចអាស៊ានសំដៅអនុញ្ញាតអោយមាន៖ ទី១ លំហូរទំនិញដោយសេរី។ ទី២ លំហូរសេវាកម្មដោយសេរី។ ទី៣ លំហូរទុនវិនិយោគដោយសេរី។ ទី៤ លំហូរមូលធនដោយសេរី និងទី៥ លំហូរកម្លាំងពលកម្មជំនាញដោយសេរី។
តើប្រទេសអាស៊ាននឹងទទួលបានផលអ្វីខ្លះពីសមាហរណកម្មសេដ្ឋកិច្ចអាស៊ានរួម ហើយថា តើកម្ពុជាដែលជាប្រទេសក្រីក្រជាងគេមួយនៅអាស៊ាន អាចទាញប្រយោជន៍បានច្រើនឬក៏ខាតប្រយោជន៍ច្រើនទៅវិញពីសហគមន៍អាស៊ានរួមនេះ?
ចំពោះសំណួរទី១ ក្រុមហ៊ុនចម្រុះជាតិសាសន៍ភាគច្រើននៅក្នុងអង្កេតមួយចំនួនយល់ឃើញថា សហគមន៍សេដ្ឋកិច្ចអាស៊ាននឹងផ្តល់ឱកាសច្រើនជាងការគម្រាមកំហែងសម្រាប់ប្រទេសអាស៊ានទាំងមូល។ ក្រុមហ៊ុននានាអាចទទួលបានផលចំណេញច្រើនពីការបើកចំហរសេដ្ឋកិច្ចរួមគ្នា។ អាស៊ានអាចនឹងទាក់ទាញអ្នកវិនិយោគិនទាំងក្នុងនិងក្រៅតំបន់កាន់តែច្រើនបន្ថែមទៀត។
តួលេខមួយចំនួនបានបង្ហាញថា ពីឆ្នាំ១៩៩៩ ដល់ឆ្នាំ២០១២ តំបន់អាស៊ានដែលមានប្រជាពលរដ្ឋចំនួន៦២០លាននាក់ មានអត្រាកំណើនជាមធ្យម៥,៥% ដែលជំរុញអោយផលិតផលសរុបក្នុងស្រុកមានតម្លៃ៣ពាន់ពាន់លានដុល្លារ។ ការព្យាករណ៍បានបង្ហាញថា ចំនួនគ្រួសារថ្នាក់កណ្តាលនៅក្នុងអាស៊ាននឹងកើនឡើងពី៤០លានគ្រួសារក្នុងឆ្នាំ២០១០មក ដល់៨៥លានគ្រួសារក្នុងឆ្នាំ២០១៧ខាងមុខនេះ។ នេះបើយោងតាមរបាយការណ៍របស់វិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍។
បច្ចុប្បន្ន អាស៊ានមានឱកាសកាន់តែធំឡើងដើម្បីកសាងខ្លួនអោយក្លាយទៅជាមជ្ឈមណ្ឌលផលិតកម្មកាន់តែធំបន្ថែមទៀត ដោយសារកម្លាំងពលកម្មនៅមានតម្លៃទាប និងកំណើនតម្លៃកម្លាំងពលកម្មនៅក្នុងប្រទេសចិន។ ស្របពេលជាមួយគ្នា កម្ពុជាក៏អាចទាញឱកាសពីសហគមន៍សេដ្ឋកិច្ចអាស៊ានរួមបានផងដែរ។ ការស្រាវជ្រាវនាពេលថ្មីៗកន្លងមកនេះ បានបង្ហាញថា សហគមន៍សេដ្ឋកិច្ចអាស៊ានរួមនឹងជួយអោយផលិតផលសរុបក្នុងស្រុកកម្ពុជា កើនឡើង៤,៥% ការនាំចេញកើនឡើងជាង៥% ហើយការវិនិយោគឯកជននឹងកើនឡើងជិត២៥% ។
បើទោះបីជាការស្រាវជ្រាវមួយចំនួនបង្ហាញថា កម្ពុជាអាចទាញបានឱកាសថ្មីពីការបើកចំហរសេដ្ឋកិច្ចអាស៊ានក៏ដោយក្តី ក៏ក្តីកង្វល់មួយចំនួនត្រូវបានលើកឡើងព្រមពេលជាមួយគ្នា។ មូលធនមនុស្ស និងកម្រិតអប់រំនៅកម្ពុជាដើរក្រោយស្ទើរគ្រប់ប្រទេសនៅក្នុងតំបន់អាស៊ាន មានន័យថា ធនធានមនុស្សកម្ពុជាមិនអាចប្រកួតប្រជែងជាមួយធនធានមនុស្សនៃប្រទេសអាស៊ានបានឡើយ។ ទីផ្សារកម្ពុជា ខ្វះខាតកម្លាំងពលកម្មជំនាញ។ ប្រទេសក្រីក្រកម្ពុជាមិនទាន់មានសមត្ថភាពគ្រប់គ្រាន់ក្នុងការផលិត។ ប្រទេសកម្ពុជាផលិតបានតិចបំផុត បើប្រៀបធៀបទៅនឹងការប្រើប្រាស់របស់ខ្លួន។
ចំណុចមួយទៀតដែលជាការព្រួយបារម្ភខ្លាំងដែរនោះ គឺការប្រកួតប្រជែងរវាងក្រុមហ៊ុនខ្មែរ និងក្រុមហ៊ុនបរទេស។ អ្នកវិភាគមួយចំនួនព្រមានទុកជាមុនថា ក្រុមហ៊ុនខ្មែរមួយចំនួនដែលរកស៊ីជាលក្ខណៈគ្រួសារ គ្មានគោលការណ៍ច្បាស់លាស់ អាចប្រឈមនឹងការដួលបះជើងជាក់ជាពុំខាន ពីព្រោះក្រុមហ៊ុនបរទេសដែលមានបទដ្ឋានអន្តរជាតិនឹងចូលមកទីផ្សារកម្ពុជាកាន់តែច្រើន។
មិនត្រឹមតែប៉ុណ្ណោះ ក្រុមហ៊ុនខ្មែរដែលធ្លាប់ប្រើប្រាស់បុគ្គលិកខ្មែរដោយអោយប្រាក់ខែមិនគ្រប់គ្រាន់ មិនគោរពច្បាប់ការងារ អាចប្រឈមនឹងកង្វះកម្លាំងពលកម្ម ពីព្រោះក្រុមហ៊ុនបរទេសនឹងទាញយកបុគ្គលិកល្អៗពីក្រុមហ៊ុនខ្មែរដែលគ្មានស្តង់ដា។ មិនត្រឹមតែប៉ុណ្ណោះ ក្រុមហ៊ុនបទេសធំៗ ដែលធ្លាប់តែលក់ទំនិញដុំមកអោយអ្នកលក់រាយជនជាតិខ្មែរ អាចនឹងមកបោះទីតាំងផ្ទាល់នៅកម្ពុជា ហើយរកស៊ីប្រជែងនឹងក្រុមហ៊ុនក្នុងស្រុកខ្មែរតែម្តង។ ប្រសិនបើបាតុភូតនេះ អាចកើតមានឡើងមែននោះ ពេលនោះ ក្រុមហ៊ុនខ្មែរដែលធ្លាប់រកស៊ីពឹងពាក់ក្រុមហ៊ុនបរទេសក្នុងតំបន់អាស៊ាន អាចប្រឈមមុខនឹងការខាតបង់ប្រយោជន៍ដ៏ច្រើនលើសលប់។
ដូច្នេះ ដើម្បីអោយកម្ពុជាអាចទទួលបានអត្ថប្រយោជន៍ជាអតិបរមាពីសហគមន៍សេដ្ឋកិច្ចអាស៊ានរួមនោះ កម្ពុជាត្រូវតែធ្វើកំណែទម្រង់មួយចំនួនក្នុងនោះមាន៖ ទី១ កែលម្អរបរិយាកាសវិនិយោគ។ ទី២ ពង្រឹងផលិតកម្មទំនិញក្នុងស្រុក។ ទី៣ វិនិយោគលើមូលធនមនុស្ស និង ទី៤ ពង្រឹងរបៀបដឹកនាំក្រុមហ៊ុនក្នុងស្រុក។ ប្រសិនបើកម្ពុជាអាចអនុវត្តគោលការណ៍ខាងលើនេះបាន ពេលនោះ សហគមន៍សេដ្ឋកិច្ចអាស៊ានរួមគឺជាការជូនពរដល់កម្ពុជាពោលគឺមិនមែនជាដាក់បណ្តាសារនោះទេ៕
© រក្សាសិទ្ធិដោយ thmeythmey.com