ជាតិ
នាយពែកមីសុំព្រះរាជទានទោសក្រោយសម្តែងឈុតមួយដោយយកលុយទៅគាបនឹងជើង នាយ ពែកមី និងភរិយា ធ្វើឃ្លីបវីដេអូដើម្បីសុំព្រះរាជទានទោសពីព្រះមហាក្សត្រ និងសុំទោសជនរួមជាតិ
× ក្រោយការណែនាំពីភរិយា តារាកំប្លែងដ៏មានប្រជាប្រិយភាព ពែកមី បានថតឃ្លីបវីដេអូមួយដែលមានរយៈពេលជាង១នាទីដើម្បីសុំព្រះរាជទានទោសពីព្រះមហាក្សត្រ និងជនរួមជាតិ ព្រោះខ្លួនបានសម្តែងឈុតមួយដោយយកលុយក្រដាសមួយម៉ឺនរៀលទៅគាបនឹងជើងដោយអចេតនា។
ជាមួយនឹងសក់សំពីងសំពោង អង្គុយក្បែរភរិយា នាយ ពែកមី បាននិយាយថា ការសម្តែងរបស់ខ្លួននៅឈុតកំប្លែងមួយក្នុងរឿង «សាច់ឯង» នៅកម្មវិធីរាត្រីកម្សាន្តរបស់ទូរទស្សន៍ CTN កាលពីល្ងាចថ្ងៃទី៩ ខែឧសភា គឺជាកំហុសមួយដែលខ្លួនមិនបានចាប់អារម្មណ៍ទាល់តែសោះ។
តារាកំប្លែងរូបនេះ បានបញ្ជាក់ថា៖ «ពេលមកដល់ផ្ទះប្រពន្ធខ្ញុំបាទថា បងឯងខុសធ្ងន់ណាស់ បងឯងមិនគួរយកលុយក្រដាសមួយម៉ឺនដែលមានរូបព្រះករុណា ព្រះឆាយាលក្ខណ៍ព្រះកូណា មកគាបនឹងជើងទេ បងឯងខុសធ្ងន់។ ពេលលឺអ៊ីចឹងបានខ្ញុំភ័យខ្លួន ខ្ញុំអត់ដឹង អត់ចាប់អារម្មណ៍ ប្រពន្ធប្រាប់បានភ័យខ្លួន»។
ពែកមីរំពឹងថា ខ្លួននឹងទទួលបានព្រះរាជអភ័យព្រះមហាក្សត្រ និងការយោគយល់ពីសំណាក់ជនរួមជាតិ ព្រោះខ្លួនសម្តែងដើម្បីបម្រើការសប្បាយ ដោយមិនដឹងថាខុស ប៉ុន្តែការសម្តែងនោះ ខ្លួនទទួលស្គាល់ថា ខុស៕
© រក្សាសិទ្ធិដោយ thmeythmey.com