ជាតិ
×![]()
ភ្នំពេញ៖ មន្ត្រីសារមន្ទីរ The Cleveland Museum of Art សហរដ្ឋអាមេរិក បានប្រគល់រូបបដិមាហនុមានសតវត្សទី១០ ឲ្យកម្ពុជាវិញ នៅថ្ងៃទី១២ ម្សិលមិញនេះ។ លោក សុខ អានបានថ្លែងថា រូបបដិហនុមាននេះ ជារូបបដិមាទី៦ដែលកម្ពុជាបានទទួលពីសហរដ្ឋអាមេរិក ក្នុងរយៈពេល២ឆ្នាំកន្លងមកនេះ។
បើរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីលោក សុខ អាន រូបបដិមាហនុមាននេះគឺជារូបទី៦ដែលយើងបានទទួលពីសហរដ្ឋអាមេរិក ក្នុងរយៈពេល២ឆ្នាំកន្លងមកនេះ។
ក្នុងពិធីទទួលដែលបានប្រារព្ធក្នុងទីស្តីការគណៈរដ្ឋមន្ត្រីនោះ លោក សុខ អាន បានបញ្ជាក់ថា កាលពីខែ មិថុនា ឆ្នាំ២០១៣កម្ពុជាបានទទួលរូបបដិមា Duryodhana មកពី Sotheby’s (New York)។ នៅខែមិថុនា ឆ្នាំ២០១៤ កម្ពុជាទទួលបានរូបបដិមា Bhima ពីសារមន្ទីរ Norton Simon ( California)។ រូបបដិមាBalarama មកពី Christie’s (New York)។ រូបបដិមាបងប្អូនប្រុស២នាក់ Pandava មកពីសារៈមន្ទីរMetropolitan (New York) និងរូបបដិមាហនុមាននៅថ្ងៃនេះ គឺជារូបទី៦ដែលបានមកពីសារមន្ទីរ Clevelandសហរដ្ឋអាមេរិក។
ដោយឡែក បើតាមសេចក្ដីប្រកាសរួមគ្នា រវាងរដ្ឋាភិបាលកម្ពុជា និងសារមន្ទីរ The Cleveland Museum of Art ការប្រគល់រូបបដិមាហនុមានត្រឡប់មកកម្ពុជាវិញនេះគឺអនុញ្ញាតឲ្យប្រទេសកម្ពុជារៀបចំកសាងឡើងវិញនូវរូបដិមាហនុមានជាច្រើន ដែលស្ថិតនៅច្រកខាងកើតនៃប្រាសាទចិននៃរមណីយដ្ឋានប្រវត្តិសាស្ត្រកោះកេរ។
លោក William M. Griswold អភិបាលនៃសារមន្ទីរ The Cleveland Museum of Artបាននិយាយថា ការប្រគល់រូបបដិមានេះនឹងជួយដល់ប្រទេសកម្ពុជាក្នុងគម្រោងកសាងប្រាសាទខ្មែរឡើងវិញហើយទង្វើរនេះក៍ជាការត្រួសត្រាយផ្លូវសម្រាប់កិច្ចសហប្រតិបត្តិការរវាងប្រទេសកម្ពុជា និងសារមន្ទីរ The Cleveland Museum of Art នៅថ្ងៃអនាគតដែរ។
គួរបញ្ជាក់ថា រូបបដិមាហនុមាននៅសតវត្សទី១០ ត្រូវបានសារមន្ទីរ Cleveland ទិញកាលពីឆ្នាំ ១៩៨។ បដិមានេះ ត្រូវបានយកចេញពីប្រាសាទចិននៃរមណីយដ្ឋានប្រវត្តិសាស្ត្រកោះកេរព្រមជាមួយនឹងបដិមាផ្សេងៗទៀតដែលត្រូវបានជនទុច្ចរិតលួចគាស់កកាយយកពីកន្លែងផ្សេងៗគ្នា ក្នុងអំឡុងទសវត្សទី ៧០ ៕
© រក្សាសិទ្ធិដោយ thmeythmey.com
