លោក Ohara៖ ជ័យជម្នះលើក្រុមMCL Japanese Selection មិនមែនជាលទ្ធផលឡើយ

កីឡាជាតិ

លោក Ohara៖ ជ័យជម្នះលើក្រុមMCL Japanese Selection មិនមែនជាលទ្ធផលឡើយ

18, May 2015 , 10:16 am

រូបភាព

ដោយ:

លោកគ្រូបង្គោលបណ្ដោះអាសន្នជនជាតិជប៉ុន Ohara Kazunori នៃក្រុមកីឡាបាល់ទាត់ជម្រើសជាតិកម្ពុជាលើកឡើងក្រោយចប់ប្រកួតមិត្តភាពជាមួយក្រុមMCL Japanese SelectionTeam (កីឡាករជប៉ុនប្រកបអាជីពនៅកម្ពុជា) ល្ងាចថ្ងៃទី១៧ ខែ ឧសភា ម្សិលមិញថា ជ័យជម្នះ៤ ទល់ ១ មិនមែនជាលទ្ធផលនោះទេ នេះជាការធ្វើតេស្តសមត្ថភាពកីឡាករប៉ុណ្ណោះ។

លោកគ្រូបង្វឹករូបនេះបន្តថាជ័យជម្នះមែនទែនគឺពេលប្រកួតផ្លូវការហើយពេលនេះកូនក្រុមលោកនៅមានបញ្ហាមួយចំនួនត្រូវកែតម្រូវឡើងវិញផងដែរ។លោកមានគម្រោងប្រកួតមិត្តភាព២ ឬ ៣ ប្រកួតទៀតមុនប្រកួតលើកដំបូងវគ្គជម្រុះពូលE ប្រចាំទ្វីបអាស៊ីនៃពានរង្វាន់បាល់ទាត់ពិភពលោកឆ្នាំ២០១៨ នៅប្រទេសរុស្ស៊ី2018 FIFA World Cup Russia។

លោកថាក្រុមលោកនៅមានបញ្ហាបន្តិចពេលលេងលើស្មៅសិប្បនិមិត្តព្រោះទីលានកំពុងហ្វឹកហាត់នៅមជ្ឈមណ្ឌលនិងសាលាបាល់ទាត់ជាតិបាទីធ្វើឡើងនៅលើស្មៅធម្មជាតិ។ប៉ុន្ដែលោកនឹងព្យាយាមឲ្យកីឡាករដែលនៅសល់២៥ នាក់នេះផ្សាំនឹងទីលានស្មៅសិប្បនិមិត្ត។

៤ គ្រាប់របស់កម្ពុជាទាត់បំប៉ោងសំណាញ់ទីក្រុមMCL Japanese SelectionTeam រកបានដោយកីឡាករគូច សុកុម្ភៈ របស់ក្លិបណាហ្គាវើល, ឃួន ឡាបូរ៉ាវីរបស់ក្លិបបឹងកេតអង្គរ, ទៀប វឌ្ឍនៈរបស់ក្លិបណាហ្គាវើល និងវ៉ា សុខថន របស់ភ្នំពេញក្រោន។

នេះជាប្រកួតមិត្តភាពក្រៅផ្លូវការទី៣ហើយសម្រាប់ក្រុមកម្ពុជាខណៈ២ លើកមុនធ្លាប់ប្រកួតឈ្នះក្រុមTiger Cambodia (អតីតត្រាយអាស៊ីភ្នំពេញ) កាលពីថ្ងៃទី៩ ខែ ឧសភា នៅទីលានរបស់ក្រុមវេស្ទើនម្ដុំទួលគោក ដោយលទ្ធផល ២ទល់ ១ ហើយនៅថ្ងៃទី ១៣ ខែឧសភា ក្រុមកម្ពុជាប្រកួតចាញ់ក្រុមជើងឯកHun Sen Cup 2015 ខេត្តស្វាយរៀង៣ ទល់ ០ នៅមជ្ឍមណ្ឌលនិងសាលាបាល់ទាត់ជាតិបាទី។

អ្វីដែលគួរឲ្យកត់សម្គាល់នោះ ការប្រកួតមិត្តភាពកម្តៅសាច់ដុំនៅពហុកីឡដ្ឋានជាតិអូឡាំពិក ក្រោយការជួសជុលនេះ ទាក់ទាញអ្នកទស្សនាបានជាង១ម៉ឺននាក់៕