ជាតិ
មជ្ឈមណ្ឌលអាស៊ាន-កូរ៉េផ្តល់វគ្គបណ្តុះបណ្តាលស្តីពីវប្បធម៌ និងទេសចរណ៍កូរ៉េ
× សៀមរាប៖ វិស័យទេសចរណ៍ បានរួមចំណែកអភិវឌ្ឍសេដ្ឋកិច្ចជាតិមួយផ្នែកធំជារៀងរាល់ឆ្នាំ។ ក្រៅពីភ្ញៀវទេសចរចិន ដែលគេដឹងថាឈរនៅកំពូល ដែលមកទស្សនាកម្ពុជា ហើយនោះ បន្ទាប់មកគេឃើញមានជនជាតិកូរ៉េ។ ដើម្បីស្វែងយល់ពីវប្បធម៌ និងប្រពៃណីកូរ៉េឲ្យកាន់តែប្រសើរឡើង សិក្ខាសាលាមួយត្រូវបានរៀបចំឡើង ស្តីពីវប្បធម៌ និងទេសចរណ៍កូរ៉េ ដល់ប្រតិបត្តិករទេសចរណ៍ទាំងអស់ ដែលកំពុងបម្រើសេវាកម្មដល់ភ្ញៀវទេសចរណ៍កូរ៉េនៅក្នុងប្រទេសកម្ពុជា។
ដើម្បីស្វែងយល់ពីវប្បធម៌ ភាសា និងទំនៀមទំលាប់ប្រពៃណីជនជាតិកូរ៉េឲ្យកាន់តែច្បាស់ថែមទៀតនោះ មជ្ឈមណ្ឌលអាស៊ាន-កូរ៉េ (ASEAN-Korea Center) បានរៀបចំសិក្ខាសាលាមួយស្តីពី វប្បធម៌ និងទេសចរណ៍កូរ៉េ ដល់សិក្ខាកាមប្រមាណ១០០នាក់ ដែលខ្លះជានិស្សិត និងមួយចំនួនធំ គឺជាប្រតិបត្តិករទេសចរណ៍នៅទីក្រុងសៀមរាប។
អគ្គលេខាធិការមជ្ឈមណ្ឌលអាស៊ាន-កូរ៉េ លោក Kim Young –Sun បានឲ្យដឹងថា កម្ពុជាគឺជាទិសដៅមួយសំខាន់សម្រាប់ជនជាតិកូរ៉េ។ លោកបញ្ជាក់ថា កាលពីឆ្នាំ២០១៤កន្លងទៅ មានទេសចរកូរ៉េជាង ៣៥ម៉ឺននាក់ ដែលមកកម្សាន្តនៅកម្ពុជា ហើយចំនួននេះនឹងបន្តកើនឡើងទៀត។ លោក Young –Sun បានរម្លឹកថា រយៈពេល៦ឆ្នាំមកនេះ មជ្ឈមណ្ឌល អាស៊ាន-កូរ៉េ បានខិតខំប្រឹងប្រែងយ៉ាងខ្លាំង ធ្វើយ៉ាងណាឲ្យមានភាពប្រសើរឡើងរវាងអាស៊ាន និងកូរ៉េ ដែលផ្តោតសំខាន់លើវិស័យទេសចរណ៍។ លោករំពឹងថា សិក្ខាសាលាខាងលើ នឹងអាចរួមចំណែក ចែករំលែកបទពិសោធន៍ជាច្រើនលើវិស័យទេសចរណ៍កូរ៉េ ដល់អ្នកប្រកបអាជីវកម្មផ្នែកទេសចរណ៍ទាំងអស់ នៅទីក្រុងសៀមរាប។
រយៈពេលបីខែដើមឆ្នាំ២០១៥ កម្ពុជាទទួលបានភ្ញៀវទេសចរអន្តរជាតិចំនួន ១,៣០៧,០០០ នាក់ គឺកើនឡើង ៣,១ភាគរយ បើធៀបនឹងរយៈពេលដូចគ្នាកាលពីឆ្នាំ២០១៤ ក្នុងនោះ ភ្ញៀវជនជាតិកូរ៉េឈរនៅលេខរៀងទី៣ ដែលមានចំនួន ១៥៦,០០០នាក់។ នេះបើតាមការលើកឡើងរបស់រដ្ឋលេខាធិការក្រសួងទេសចរណ៍ លោក ឪក តារារិទ្ធ។ លោក តារារិទ្ធ រំពឹងថា ចំនួនភ្ញៀវជនជាតិកូរ៉េនឹងកើនឡើងជាបន្តបន្ទាប់ តាមរយៈការបង្កើនជើងហោះហើរត្រង់ពីកូរ៉េមកកម្ពុជា។
យ៉ាងណា បើទោះជាចំនួននៅតែបន្តកើនឡើងក៏ពិតមែន ប៉ុន្តែគេក៏មិនភ្លេចគិតគូរពីចំណង់ចំណូលចិត្ត ភាពចាំបាច់ និងវិធីសាស្ត្រ ដើម្បីទាក់ទាញពួកគេនោះទេ។ តាមរយៈសិក្ខាសាលាស្តីពី វប្បធម៌ និងទេសចរណ៍កូរ៉េ ដែលធ្វើរយៈពេល២ថ្ងៃ គឺចាប់ពីថ្ងៃទី១៨ និង១៩ ឧសភា លោក តារារិទ្ធ មានសុទិដ្ឋិនិយមថា នឹងផ្តល់នូវចំណេះដឹងទាក់ទងនឹងការសិក្សានានា និងនិន្នាការទេសចរណ៍ វប្បធម៌ និងចរិកលក្ខណៈទេសចរណ៍ ដល់អ្នកដែលកំពុងបម្រើការងារលើវិស័យទេសចរណ៍៕
© រក្សាសិទ្ធិដោយ thmeythmey.com