ពិភពតារា៖ ធី ស្រីពៅ ថាមិនប្រាថ្នាស្នេហាដោះដូរ
×
ភ្នំពេញ៖អ្នកចម្រៀងថ្មោងថ្មីកញ្ញា ធីស្រីពៅបានបង្ហើបឲ្យដឹងថានាងនៅមិនទាន់មានជំពាក់ជំពិនរឿងស្នេហាជាមួយបុរសណាម្នាក់នៅឡើយទេ។ទោះយ៉ាងណានាងថាក៏មិនប្រាថ្នាស្នេហាដែលដោះដូរនឹងមាសប្រាក់ឬលុយឡាននោះដែរ។
កញ្ញាធីស្រីពៅដែលទើបបន្សាត់ខ្លួនចូលប្រឡូកក្នុងវិស័យសិល្បៈបានជាងកន្លះឆ្នាំមកនេះកំពុងទទួលបានការចាប់អារម្មណ៍ពីមហាជនគួរឲ្យកត់សម្គាល់ជាមួយនឹងទឹកដមសម្លេងបូករួមទាំងរូបសម្ផស្សដ៏ស្រស់ផូរផង់បានស្ទួយឲ្យនាងកាន់តែមានភាពលេចធ្លោក្នុងរយៈពេលមួយដ៏ឆាប់រហ័សក្នុងសង្គមសិល្បៈដែលពោរពេញទៅដោយភាពប្រកួតប្រជែងនេះ។
ក្រោយពីឈានជើងចូលប្រឡូកក្នុងវិស័យសិល្បៈកាលពីដើមឆ្នាំ២០១៣អ្នកចម្រៀងវ័យក្មេងធីស្រីពៅបើទោះបីជាមិនទាន់អាចរកទ្រនំបានច្រៀងនៅឡើយប៉ុន្តែនាងត្រូវបានមហាជនទទួលស្គាល់តាមរយៈទឹកដមសម្លេងដ៏ក្រអូនក្រអៅដែលជាអំណោយពីធម្មជាតិទើបជម្រុញឲ្យអ្នកចម្រៀងស្រស់សោភារូបនេះលេចធ្លោក្នុងរយៈពេលមួយដ៏ខ្លី។
ជួបសម្ភាសជាមួយថ្មី”នៅស្ថានីយទូរទស្សន៍អប្សរាកាលពីពេលកន្លងតទៅថ្មីៗនេះធីស្រីពៅបានឲ្យដឹងថានាងមានចំណង់ចំណូលចិត្តលើវិស័យចម្រៀងតាំងពីតូចខណៈបងស្រីនាងក៏ជាតារាចម្រៀងម្នាក់ផងដែរទើបនាងមានឱកាសបានដើរលើគន្លងនេះបន្ទាប់ពីបោះបង់ការសិក្សាត្រឹមថ្នាក់ទី១២នៅវិទ្យាល័យឥន្ទ្រទេវីនាឆ្នាំ២០១០។
អ្នកចម្រៀងដែលមានប្រភពមកពីខេត្តព្រៃវែងធីស្រីពៅបាននិយាយបន្តឲ្យដឹងថាសព្វថ្ងៃនាងកំពុងច្រៀងនៅក្នុងភោជនីយដ្ឋានសុខាពីរនាក់បងស្រីរបស់នាងឈ្មោះធីណាតា។បទចម្រៀងដែលធីស្រីពៅលើកយកមកច្រៀងគឺនាងចូលចិត្តបទចម្រៀងរបស់កញ្ញាមាសសុខសោភា។បើទោះបីជាទឹកដមសម្លេងនៅមានកម្រិតមិនពីរោះដូចម្ចាស់ដើមយ៉ាងណាក៏ដោយប៉ុន្តែនាងទទួលបានការកោតសរសើរពីបណ្តាភ្ញៀវមួយចំនួនផងដែរ។
ទាក់ទិននឹងជីវិតឯកជនធីស្រីពៅបានបង្ហើបឲ្យដឹងថានាងនៅមិនទាន់មានជំពាក់ជំពិនរឿងស្នេហាជាមួយបុរសណាម្នាក់នៅឡើយទេ។ទោះយ៉ាងណានាងថាក៏មិនប្រាថ្នាស្នេហាដែលដោះដូរនឹងមាសប្រាក់ឬលុយឡាននោះដែរ។នាងនិយាយថានាងចង់បានត្រឹមតែស្នេហាស្មោះមួយប៉ុណ្ណោះនិងសាមញ្ញាៗអាចរស់នៅជាមួយគ្នាប្រកបដោយសុភមង្គល។
អ្នកចម្រៀងដែលមិនទុកមាសប្រាក់ជាធំក្នុងរឿងស្នេហាកញ្ញាធីស្រីពៅមានបងប្អូន៥នាក់ស្រីទាំងអស់នាងជាកូនពៅនិងមានកម្ពស់១,៦២ម៉ែត្រទម្ងន់៤៦គីឡូក្រាម។នាងទើបតែមករស់នៅភ្នំពេញបាន៥ឆ្នាំប៉ុណ្ណោះដោយស្នាក់នៅជាមួយបងស្រី។សព្វថ្ងៃក្រៅពីច្រៀងនៅតាមភោជនីយដ្ឋាននាងក៏កំពុងសិក្សាភាសាអង់គ្លេសក្រៅម៉ោងផងដែរ៕
© រក្សាសិទ្ធិដោយ thmeythmey.com