ជាតិ
សេដ្ឋកិច្ច
×![]()
ដោយ: ធឿន បញ្ញាឬទិ្ធ
លោកនាយករដ្ឋមន្ត្រី ហ៊ុន សែន បានសម្រេចអនុម័តដាក់យុទ្ធសាស្ត្រ «កៀងគរចំណូល» សម្រាប់រយៈពេលមធ្យម ឆ្នាំ២០១៤ ដល់ ឆ្នាំ ២០១៨ ហើយលោក ទាមទារឲ្យភាគីដៃគូរពាក់ព័ន្ធទាំងអស់ ចូលរួមសហការជាមួយរដ្ឋាភិបាលផងដែរ។ ការថ្លែងរបស់លោក ហ៊ុន សែនបែបនេះធ្វើឡើងនៅក្នុងកិច្ចប្រជុំត្រួតពិនិត្យប្រចាំឆ្នាំនៃកម្មវិធីកែទម្រង់ ការគ្រប់គ្រងហិរញ្ញវត្ថុសាធារណៈ នៅថ្ងៃទី២០ ខែឧសភានេះ។ អ្នកវិភាគសង្គម ស្វាគមន៍ចំពោះយុទ្ធសាស្ត្រថ្មីនេះ។ តែយ៉ាងណាអ្នកវិភាគទាំងនោះ ក៏ជំរុញឲ្យរដ្ឋាភិបាលពង្រឹងយុទ្ធសាស្ត្ររបស់ខ្លួនឲ្យបានត្រឹមត្រូវដែរ ចៀសវាងការបាត់បង់ចំណូលរដ្ឋ។
ប្រមុខរដ្ឋាភិបាលកម្ពុជា កំពុងតែមានភាពជឿជាក់យ៉ាងខ្លាំងទៅលើយុទ្ធសាស្ត្រ«កៀងគរចំណូល» ថ្មីនេះ ។ ហើយលោក កំពុងឲ្យក្រសួងសេដ្ឋកិច្ច និង ហិរញ្ញវត្ថុ ដឹកនាំនឹងរៀបចំនូវយុទ្ធសាស្ត្រនេះផងដែរ«យុទ្ធសាស្ត្រនេះទាមទារឲ្យមានការចូលរួមឲ្យគ្រប់ពីភាគីពាក់ព័ន្ធទាំងអស់។ ជាពិសេសពីគ្រប់ស្ថាប័នប្រមូលចំណូលទាំងអស់ ទើបអាចសម្រេចបានជោគជ័យតាមការគ្រោងទុក។ ថ្វីដ្បិតក្រសួងសេដ្ឋកិច្ច និង ហិរញ្ញវត្ថុ ត្រូវមានតួនាទីដឹកនាំអនុវត្តក៏ដោយ»។ នេះជាការបញ្ជាក់របស់លោក ហ៊ុន សែន។
សូមស្ដាប់សំឡេង៖
ទាក់ទងនឹងយុទ្ធសាស្ត្រថ្មីនេះ អ្នកវិភាគសង្គម លោក កែម ឡី មានប្រសាសន៍ថា កន្លងមកការប្រមូលពន្ធនៅកម្ពុជា មានភាពមិនប្រក្រតី ដែលធ្វើឲ្យបាត់បង់ចំណូលរដ្ឋ។ ហើយលោកថា បើសិនជារដ្ឋាភិបាលមានការកំណត់យុទ្ធសាស្ត្រច្បាស់លាស់នោះ ចំណូលដែលបានពីការប្រមូលពន្ធនិងមិនមានការបាត់បង់ ហើយប្រទេសកម្ពុជាក៏មិនខ្វះខាត និងត្រូវការជំនួយពីបរទេសទៀតដែរ។ តែយ៉ាងណាលោក កែម ឡី ក៏ស្នើឲ្យរដ្ឋាភិបាលធ្វើសវនកម្មអាជីវកម្ម និងពន្ធដារឲ្យបានច្បាស់លាស់។ ចូលរួមសហការជាមួយសង្គមស៊ីវិល ចំពោះការប្រមូលពន្ធនេះ ដើម្បីមានតម្លាភាព ។
អ្នកវិភាគរូបនេះពន្យល់ថា៖«ជាទូទៅកន្លងមកពន្ធដារធ្លុះធ្លាយ ពន្ធដារពុករលួយ។ ព្រោះស្ដង់ដារអន្តរជាតិ គេប្រមូលបាន៤៥ភាគរយ នៃផលិផលសរុប។ វៀតណាម២០ភាគរយ នៃផលិតផលសរុប។ តែកម្ពុជាបានតែ៩ ទៅ ១០ភាគរយ នៃផលិផលសរុប បានតែ២៤០០លានដុល្លារ។ តែបើមិនពុករលួយយើងអាចបានពី៤០០០លានដុល្លារ ទៅ៦០០០លានដុល្លារ។ តែខ្ញុំមិនដឹងថាលោក ហ៊ុន សែន គាត់អនុវត្តយុទ្ធសាស្ត្រច្បាស់យ៉ាងម៉េចទេ។ តែបើធ្វើបាននោះកម្ពុជាមិនចាំបាច់ត្រូវការជំនួយឥតសំណងពីគេទៀតទេ»។
ចំណែកលោក អ៊ូ វីរៈ អ្នកវិភាគសង្គម យល់ថា គោលនយោបាយថ្មីរបស់រដ្ឋាភិបាលនេះ គឺសមហេតុផល។ តែលោក អ៊ូ វីរៈ ក៏បានបញ្ជាក់បន្ថែមថា ដើម្បីកុំឲ្យមានការបាត់បង់ពន្ធដោយសារការពុករលួយ រដ្ឋាភិបាលគួរតែដាក់គោលការណ៍យកពន្ធទាបសមរម្យ ។ លើកទឹកចិត្តមន្ត្រីប្រមូលពន្ធ និង ដាក់ពិន័យដល់មន្ត្រីទាំងនោះជាដើម«ខ្ញុំគាំទ្រយុទ្ធសាស្ត្រថ្មីនេះ។ តែអាស្រ័យលើកត្តាប្រមូលពន្ធផងដែរ បើយកពន្ធថ្លៃនោះប្រជាពលរដ្ឋមិនពេញចិត្ត ពួកគេគ្មានលទ្ធភាពបង់ ធ្វើឲ្យពួកគេគេចវេសពីការប្រមូល។ តែបើពន្ធទាបពួកគេនឹងមិនគេចវេសទេ ដូចនេះការប្រមូលបង់ពន្ធគឺបានត្រឹមត្រូវ។ ទី២ លើកទឹកចិត្តមន្ត្រីប្រមូលពន្ធ បើឲ្យប្រាក់ខែពួកគេច្រើន ពួកគេនឹងមិនកេងប្រវ័ញ្ច មិនពុករលួយ។ ទី៣ ដាក់ពិន័យតាមច្បាប់ បើពួកគេពុករលួយមានទោសធ្ងន់ ។ ដូចនេះយើងនិងប្រមូលបានចំណូលត្រឹមត្រូវ មិនបាត់បង់។ ហើយយើងនឹងឈប់ក្លាយជាប្រទេសសុំទានគេ ពឹងផ្អែកលើបរទេសគ្រប់ពេលទៀតដែរ»។នេះជាការពន្យលរបស់លោក អ៊ូ វីរៈ៕
© រក្សាសិទ្ធិដោយ thmeythmey.com
