អន្តរជាតិ
នយោបាយអន្តរជាតិ
ជនភៀសខ្លួនបំភ័យអឺរ៉ុបទៀតហើយ!
×
ខណៈបណ្តាប្រទេសសហភាពអឺរ៉ុបកំពុងទាស់ទែងគ្នា ក្នុងការដោះស្រាយបញ្ហាជនភៀសខ្លួននៅសមុទ្រមេឌីទែររ៉ាណេ កាលពីថ្ងៃចន្ទ ប្រធានអង្គការអូតង់Jens Stoltenberg បានលើកឡើងពីបញ្ហាទាក់ទងប្រធានបទនេះដែរថា សកម្មជនជីហាតអាចនឹងបង្កប់ខ្លួន ក្នុងចំណោមជនភៀសខ្លួនទាំងនោះ ដើម្បីឡើងមកវាយប្រហារអឺរ៉ុប។ តើជនភៀសខ្លួនដែលឆ្លងទូកមកអឺរ៉ុបពិតជាអាចបង្កគ្រោះថ្នាក់ដល់សហភាពអឺរ៉ុបដែររឺយ៉ាងណា?
មានសំឡេង
មូលហេតុដែលអឺរ៉ុបនិងអង្គការអូតង់បារម្ភថា អាចមានសកម្មជនជីហាតបន្លំធ្វើជាជនភៀសខ្លួនឆ្លងសមុទ្រមកវាយប្រហារអឺរ៉ុបនេះ បើមើលអោយជាក់ស្តែងទៅ គឺដោយសារថា នៅថ្ងៃអង្គារ១៩ឧសភាដើមសប្តាហ៍នេះ អាជ្ញាធរអ៊ីតាលីបានចាប់ខ្លួនយុវជនម៉ារ៉ុកម្នាក់ ដែលធ្វើដំណើរតាមទូកខុសច្បាប់មកពីលីប៊ី។ យុវជនរូបនេះត្រូវបានអាជ្ញាធរទុយនីស៊ីសង្ស័យថា បានធ្វើភេរវកម្មនៅសារមន្ទីរBardo នៅទុយនីស៊ី កាលពីថ្ងៃ១៨មិនា ធ្វើអោយមនុស្ស២២នាក់ បាត់បង់ជីវិត។
សហភាពអឺរ៉ុបកំពុងតែហែកហួរគ្នាក្នុងការដោះស្រាយបញ្ហាជនភៀសខ្លួន បណ្តាជនដែលគេចពីសង្គ្រាម ពីភាពក្រីក្រ ពីការគំរាមកំហែងរបស់ក្រុមជីហាត។ ឥឡូវ ស្រាប់តែអ៊ីតាលីរកឃើញថា មានជនសង្ស័យភេរវកម្មមកលាក់ខ្លួនក្នុងចំណោមជនភៀសខ្លួនទៀត។ អឺរ៉ុបពិតជាភ័យមិនតិចទេ។ ប្រធានអង្គការអូតង់ លោកJens Stoltenbergបានលើកឡើងថា សកម្មជនប្រយុទ្ធបរទេសរឺក៏ភេរវជនអាចនឹងលាក់ខ្លួនលាយឡំគ្នាជាមួយជនភៀសខ្លួន។ អង្គការអូតង់តំរូវអោយរកដំណោះស្រាយចំពោះបញ្ហាថ្មីនេះ។
ដោយសាររឿងចាប់ខ្លួនជនសង្ស័យភេរវកម្មជនជាតិម៉ារ៉ុកនេះ បក្សស្តាំនិយមជ្រុលអឺរ៉ុប បែបយ៉ាងសម្ព័ន្ធភាគខាងជើងអ៊ីតាលី រឺក៏បក្សយូឃីបនៅអង់គ្លេស បានឆ្លៀតឱកាសរករឿងរដ្ឋាភិបាលអឺរ៉ុប។ ជនភៀសខ្លួនជានិមិត្តរូបមិនល្អ សម្រាប់អឺរ៉ុប ឥឡូវនេះ រឹតតែក្លាយជាឆ្អឹងទទឹងកដល់បណ្តាប្រទេសអឺរ៉ុបទៀតហើយ។ ប្រាកដណាស់ ពេលឈានជើងក្នុងប្រទេសអឺរ៉ុបណាមួយហើយ ភេរវជនអាចបន្តដំណើរទៅប្រទេសអឺរ៉ុបផ្សេងៗទៀតបាន។ នេះហើយជាបញ្ហាបំភ័យសុវត្ថិភាពសន្តិសុខអឺរ៉ុប។ ប៉ុន្តែ យើងសួរថា ដើម្បីការពារសន្តិសុខប្រជាពលរដ្ឋអឺរ៉ុប តើមេដឹកនាំអឺរ៉ុបគួរតែភ័យនឹងបញ្ហាដែលចោទឡើងថ្មីនេះដែររឺទេ?
យោងតាមអ្នកជំនាញ បញ្ហាថា សកម្មជនប្រយុទ្ធជីហាតបង្កប់ខ្លួនក្នុងចំណោមជនភៀសខ្លួន មិនមែនជាបញ្ហាធ្ងន់ធ្ងរឡើយ បើប្រៀបនឹងការគំរាមកំហែងភេវកម្មដែលអាចបង្កឡើងដោយពលរដ្ឋអឺរ៉ុប ដែលត្រលប់មកពីស៊ីរីនិងអ៊ីរ៉ាក់។ ក្រុមជីហាតកំពុងដណ្តើមបានទីតាំងជាច្រើននៅក្នុងប្រទេសទាំង២នេះ ហើយមានពលរដ្ឋអឺរ៉ុបមិនតិចទេដែលបានចាកចេញទៅធ្វើសង្គ្រាមជីហាតនៅតាមប្រទេសទាំង២នេះ។ ដូច្នេះពេលជនជាតិអឺរ៉ុបទាំងនោះត្រលប់មកវិញ វាគឺជាបញ្ហាចោទធ្ងន់ ព្រោះថា ជនជាតិអឺរ៉ុបទាំងនោះសុទ្ធតែមានក្រដាសស្នាមស្របច្បាប់ ដូច្នេះងាយនឹងបង្កភេរវកម្មនៅអឺរ៉ុបបានងាយស្រួល។
ផ្ទុយទៅវិញ ជនភៀសខ្លួនតាមទូក សុទ្ធតែគ្មានក្រដាសស្នាមត្រឹមត្រូវ បើប្រទេសនៅអឺរ៉ុបទទួលយកពួកគេ ក៏ប្រទេសទាំងនោះត្រូវតែចំរាញ់ពួកគេល្អិតល្អន់ដែរ ពោលអោយចំគឺថា ប្រទេសទាំងនោះពិតជានឹងរកអត្តសញ្ញាណ កំណត់ភិនភាគពួកគេអោយបានច្បាស់លាស់ មុននឹងសម្រេចអោយពួកគេជ្រកកោនក្នុងទឹកដីខ្លួន។ បើពិនិត្យទៅ នេះមិនមែនជានិតិវិធីខ្ជីខ្ជា ចំពោះសុវត្ថិភាពសន្តិសុខអឺរ៉ុបទេ។
គួរបញ្ជាក់ដែរថា ភេរវកម្មនានានៅអឺរ៉ុប ក្នុងឆ្នាំ២០១៤និងឆ្នាំ២០១៥កន្លងមក សុទ្ធតែបង្កឡើងដោយពលរដ្ឋអឺរ៉ុប ដូច្នេះមិនប្រាកដថា ជនជីហាតបង្កប់ខ្លួនក្នុងចំណោមជនភៀសខ្លួនតាមទូក ប្រថុយជីវិតមកសុំសិទ្ធិជ្រកកោននៅអឺរ៉ុប ជាបញ្ហាបំភ័យអឺរ៉ុប លើសពីបញ្ហាពលរដ្ឋអឺរ៉ុបខ្លួនឯងនោះទេ។ ការបដិសេធមិនទទួលយកជនភៀសខ្លួនតាមទូកនៅសមុទ្រមេឌីទែររ៉ាណេ រឺក៏ការប្រើវិធានការក្តៅទៅលើពួកគេដោយប្រការណាមួយ អាចចាត់ទុកថាជាលេសរបស់អឺរ៉ុបប្រឆាំងជនភៀសខ្លួនទៅវិញទេ៕
© រក្សាសិទ្ធិដោយ thmeythmey.com