ជាតិ
នយោបាយជាតិ
EU ជំរុញឲ្យក្រុមការងារ គ.ជ.ប ពន្លឿននិតិវិធីរបស់ខ្លួនជាមុន
×
សហភាពអឺរ៉ុប ជំរុញឲ្យគណៈកម្មាធិការជាតិរៀបចំការបោះឆ្នោត គ.ជ.ប ពន្លឿនរៀបចំនិតិវិធី និងបទបញ្ជារផ្ទៃក្នុងរបស់ខ្លួនឲ្យបានរួចរាល់ ដែលជាការងាយស្រួលសម្រាប់សហភាពអឺរ៉ុបក្នុងការជួយរៀបចំ គ.ជ.បនេះ ឲ្យបានល្អទាន់ពេលវេលាកំណត់។
ប្រធានក្រុមការងារបេសកកម្មរបស់សហភាពអឺរ៉ុប លោក Silvio Gonsatoបានបញ្ជាក់ជាថ្មីទៀតថា ក្រុមការងារសហភាពអឺរ៉ុបរបស់លោក បានត្រៀមខ្លួនរួចជាស្រេចហើយ ក្នុងការជួយរៀបចំដំណើរការ គ.ជ.បនៅក្នុងប្រទេសកម្ពុជាឲ្យទាន់ពេលវេលា។ តែលោកក៏បានបញ្ជាក់ដែរថា ការផ្ដល់ជំនួយក្នុងការរៀបចំ គ.ជ.បនេះ ខាងក្រុមការងាររបស់លោកមិនទាន់អាចកំណត់បានទេ ដោយតម្រូវឲ្យខាង គ.ជ.បរៀបចំនិតិវិធីរបស់ខ្លួន ឲ្យបានរួចរាល់ ទើបវាយតម្លៃតាមក្រោយ។
លោកឯកអគ្គរដ្ឋទូត Jean-Francois Cautain បានបន្ថែមថា សហភាពអឺរ៉ុប បានបញ្ជូនអ្នកជំនាញការបោះឆ្នោតមកកម្ពុជានៅពេលខាងមុខនេះ ដើម្បីត្រួតពិនិត្យ និងវាយតម្លៃ ថាតើ គជប ត្រូវមានចំណុចណាខ្លះ ដែលអាចឲ្យសហភាពអឺរ៉ុបអាចជួយផ្ដល់ជំនួយលក្ខណៈបច្ចេកទេសបាន។
គណៈកម្មាធិការជាតិរៀបចំការបោះឆ្នោត ត្រៀមរៀបចំការចុះឈ្មោះបោះឆ្នោត និងបង្កើតបញ្ជីបោះឆ្នោតថ្មី ឲ្យរួចរាល់សម្រាប់ការបោះឆ្នោត ឃុំ សង្កាត់ នៅខែកុម្ភៈឆ្នាំ២០១៧ ខាងមុខ ។ បើតាមលោក ស៊ិក ប៊ុនហុក បានជម្រាបជូនគណៈប្រតិភូអឺរ៉ុប ដែលដឹកនាំដោយលោក ឯកអគ្គរដ្ឋទូត Jean-Francois Cautainនិងលោក Silvio Gonsato កន្លងមកថា ចង់ឲ្យសហគមន៍អឺរ៉ុបជួយជាចម្បងនោះគឺ មធ្យោបាយរៀបចំការចុះឈ្មោះបោះឆ្នោត និងការអប់រំប្រជាពលរដ្ឋអំពីសិទ្ធិនយោបាយ ដើម្បីឲ្យប្រជាពលរដ្ឋជាម្ចាស់ឆ្នោតមានការយល់ដឹងពីសិទ្ធិរបស់ខ្លួនទាក់ទងនឹងការបោះឆ្នោត។
ការចុះឈ្មោះបោះឆ្នោតលើកនេះ ត្រូវធ្វើឡើងតាមប្រព័ន្ធកុំព្យូទ័រ ដោយប្រើស្នាមមេដៃ និងរូបថតអ្នកបោះឆ្នោតបញ្ចូលទៅក្នុងកុំព្យូទ័រ ដើម្បីបង្កើតបញ្ជីបោះឆ្នោត ហើយការរៀបចំនេះត្រូវធ្វើឲ្យរួចរាល់សម្រាប់ការបោះឆ្នោត ឃុំ សង្កាត់ នៅដើមឆ្នាំ២០១៧ ។ប្រធាន គ.ជ.ប រូបនេះ បានបន្ថែមថា ការអប់រំដល់ក្រុមការងាររៀបចំការចុះឈ្មោះបោះឆ្នោត និងប្រជាពលរដ្ឋ គឺជារឿងចម្បងដើម្បីឲ្យមានការយល់ដឹងពីការចុះឈ្នោះបោះឆ្នោត និងពេលបោះឆ្នោត៕
© រក្សាសិទ្ធិដោយ thmeythmey.com