ជាតិ
គជប នឹងបញ្ជូនសេចក្ដីព្រាងបទបញ្ជា និងនិតិវិធីបោះឆ្នោតទៅកាន់ដៃគូរបរទេសនាខែក្រោយ
× គណៈកម្មាធិការជាតិរៀបចំការបោះឆ្នោត គ.ជ.ប នឹងផ្ដល់សេចក្ដីព្រាងបទបញ្ជា និងនិតិវិធីពាក់ព័ន្ធនឹងការចុះឈ្មោះបោះឆ្នោតទៅកាន់ភាគីជប៉ុន និងសហភាពអឺរ៉ុប នៅថ្ងៃទី២មិថុនាខាងមុខនេះ។ នេះបើតាមសេចក្ដីប្រកាសព័ត៌មានរបស់គជប ចុះថ្ងៃទី២២ ឧសភា។
ក្រោយពីជំនួបរវាងលោក គួយ ប៊ុនរឿន អនុប្រធានគ.ជ.ប និងជាប្រធានគណៈកម្មការចំពោះកិច្ច ជាមួយប្រតិភូបច្ចេកទេសមកពីជប៉ុន អំពីដំណើការរៀបចំ គ.ជ.ប កាលពីថ្ងៃទី២២ ឧសភា នៅទីស្ដីការ គ.ជ.បរួចមក ភាគគីគ.ជ.ប កម្ពុជាបានកំណត់យកថ្ងៃទី២មិថុនា ដើម្បីបញ្ជូននិតិវិធីរបស់ខ្លួនទៅកាន់ភាគីជប៉ុន និងសហភាពអឺរ៉ុប។ ហើយក្រោយរយៈពេលបីសប្តាហ៍ ដៃគូបរទេសនេះត្រូវផ្តល់អនុសាសន៍លើសេចក្ដីព្រាងច្បាប់នោះមកឲ្យ គ.ជ.ប វិញ ។
ជាមួយគ្នានេះ គ.ជ.ប ក៏នឹងបញ្ជូនសេចក្តីព្រាងបទបញ្ជា និងនីតិវិធីពាក់ព័ន្ធនឹងការចុះឈ្មោះឆ្នោតនេះ គជប ក៏ផ្ញើទៅភាគី គណបក្សនយោបាយ និងអង្គការមិនមែនរដ្ឋាភិបាលផ្តល់អនុសាសន៍បន្ថែមដែរ ។
សេចក្តីប្រកាសព័ត៌មានដដែលបន្តថា អ្នកបច្ចេកទេសព័ត៌មានវិទ្យាជប៉ុន នឹងមកដល់កម្ពុជាក្នុងពេលឆាប់ៗនេះ ដើម្បីសិក្សាបន្ថែមពីលក្ខណៈបច្ចេកទេសសម្រាប់ដំណើរការចុះឈ្មោះបោះឆ្នោត ពិសេសប្រព័ន្ធកុព្យូទ័រ ។ ដោយអ្នកបច្ចេកទេសព័ត៌មានវិទ្យាជប៉ុន នឹងបង្កើតកម្មវិធីសុវត្ថិភាពការពារពីជនលួចចូលបំផ្លាញ ឬកែទិន្និន័យអ្នកបោះឆ្នោតក្នុងប្រព័ន្ធកុំព្យូទ័រ។ ការទប់ស្កាត់ការចុះឈ្មោះបោះឆ្នោតលើសពីម្តង។ កម្មវិធីត្រួតពិនិត្យឈ្មោះអ្នកឆ្លងខេត្ត នៅទូទាំងប្រទេស និងកត្តាអសកម្មនៃប្រព័ន្ធអ៊ិនធឺណេត ដែលរំខានដល់កិច្ចប្រតិបត្តិការចុះឈ្មោះបោះឆ្នោត។
កាលពីថ្ងៃទី២២ ឧសភា សហភាពអឺរ៉ុប ក៏ជំរុញឲ្យគណៈកម្មាធិការជាតិរៀបចំការបោះឆ្នោត គ.ជ.ប ពន្លឿនរៀបចំនិតិវិធី និងបទបញ្ជារផ្ទៃក្នុងរបស់ខ្លួនឲ្យបានរួចរាល់ ដែលជាការងាយស្រួលសម្រាប់សហភាពអឺរ៉ុបក្នុងការជួយរៀបចំ គ.ជ.បនេះ ឲ្យបានល្អទាន់ពេលវេលាកំណត់។
ប្រធានក្រុមការងារបេសកកម្មរបស់សហភាពអឺរ៉ុប លោក Silvio Gonsatoបានបញ្ជាក់ថា ក្រុមការងារសហភាពអឺរ៉ុបរបស់លោក បានត្រៀមខ្លួនរួចជាស្រេចហើយ ក្នុងការជួយរៀបចំដំណើរការ គ.ជ.បនៅក្នុងប្រទេសកម្ពុជាឲ្យទាន់ពេលវេលា។ តែលោកក៏បានបញ្ជាក់ដែរថា ការផ្ដល់ជំនួយក្នុងការរៀបចំ គ.ជ.បនេះ ខាងក្រុមការងាររបស់លោកមិនទាន់អាចកំណត់បានទេ ដោយតម្រូវឲ្យខាង គ.ជ.បរៀបចំនិតិវិធីរបស់ខ្លួន ឲ្យបានរួចរាល់ ទើបវាយតម្លៃតាមក្រោយ៕
© រក្សាសិទ្ធិដោយ thmeythmey.com